​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ

​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ - 13055023 496169723923139 5373205745313485861 o - ​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ
​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ - AGL banner - ​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ

ໂດຍ: ທິດ​ກໍ່າ

 

​ເມື່ອ​ຕັ້ງ​ໂຈດກັນ​ວ່າ​ແມ່ຍິງ​ລາວ​ໃນ​ຍຸກ​ນີ້​ແຕກ​ຕ່າງ​ກັບ​ສະ​ໄໝ​ກ່ອນ​ແນວ​ໃດ ? ຄຳ​ຕອບ​ກໍ​ມີ​ຢູ່​ວ່າ “​ແຕກ​ຕ່າງ​ກັນ​ຫລາຍ​ອີ່ຫລີ” ຍ້ອນ​ວ່າ​ໃນ​ສະ​ໄໝ​ກ່ອນ​ແມ່ຍິງ​ລາວ​ມີ​ຄວາມທຸກ ​ແລະ ຖືກ​ຜົນ​ກະທົບ​ຈາກ​ສະພາບ​ແວດ​ລ້ອມ​ຫລາຍ​ດ້ານ ​ເພາະວ່າ​ໃນ​ຍຸກ​ກ່ອນ​ ປະ​ເທດ​ຊາດ​ໄດ້​ຕົກ​ເປັນ​ຫົວ​ເມືອງ​ຂຶ້ນຂອງ​ສັກ​ດີ​ນາ​ຕ່າງ​ດ້າວ ​ແລະ ຈັກກະພັດ​ເຂົ້າມາ​ບຸກລຸກ​ຮຸກ​ຮານ​ແລ້ວ​ຍຶ​ດ​ເອົາ​ປະ​ເທດ​ເຮົາ​ເປັນ​ຫົວ​ເມືອງ​ຂຶ້ນ​ເປັນ​ເວລາ​ຍາວ​ນານ​ຫລາຍ​ຮ້ອຍ​ປີ. ຈາກ​ສະພາບ​ດັ່ງກ່າວ ປະ​ເທດ​ຊາດ​ຕ້ອງ​ຕົກ​ຢູ່​ໃນ​ຊາຕາ​ອາພັບ, ທຸກ​ຍາກ​ຂາດ​ເຂີນ ​ແລະ ດ້ອຍ​ພັດທະນາ​ມາ​ເປັນ​ເວລາ​ຫລາຍ​ທົດ​ສະ​ວັດ. ​ໃນ​ຍຸກ​ກ່ອນ, ​ແມ່ຍິງ​ລາວ​ບໍ່​ມີ​ໂອກາດ​ໄດ້​ໃຊ້​ສິດ​ປະຊາທິປະ​ໄຕ​ຂອງ​ຕົນ​ຢ່າງ​ເຕັມ​ປ່ຽມ​ເຂົ້າ​ໃນ​ພາລະກິດ​ການ​ສ້າງສາ​ພັດທະນາ​ປະ​ເທດ​ຊາດ, ຊ້ຳບໍ່​ໜຳ ຍັງ​ຖືກ​ຜົນ​ກະທົບ​ຈາກ​ເສິກ​ສົງຄາມ​ມາ​ເປັນ​ເວລາ​ຫລາຍ​ສິບ​ປີ ​ໂດຍ​ສະ​ເພາະ​ແມ່ນ​ແມ່ຍິງ​ໃນ​ເຂດ​ປົດ​ປ່ອຍ​ຕ້ອງ​ໄດ້​ແບກ​ຫາບ​ກັບ​ພາລະກິດ​ຕໍ່ສູ້​ປະຕິວັດ​ປົດ​ປ່ອຍ​ຊາດ​ມາ​ເປັນ​ເວລາ​ຍືດ​ເຍື້ອຍາວ​ນານ​ຈຶ່ງ​ສາມາດ​ປົດ​ປ່ອຍ​ໄດ້​ທົ່ວ​ປະ​ເທດ​ໃນ​ປີ 1975.

​ແຕ່​ວ່າ​ແນວ​ໃດ​ກໍ​ຕາມ, ຕໍ່​ສະພາບ​ແວດ​ລ້ອມ​ດັ່ງກ່າວ ​ແມ່ຍິງ​ລາວ​ໂດຍ​ລວມກໍ​ຍັງ​ເຮັດ​ໜ້າ​ທີ່​ຂອງ​ຕົນ​ດ້ວຍ​ມານະ​ຈິດ​ອັນ​ຜ່ອງ​ໃສ​ສູງ​ສົ່ງ​ຕາມ​ພາລະ​ບົດບາດ, ສິດ​ໜ້າ​ທີ່​ຂອງ​ຄວາມ​ເປັນ​ແມ່​ທີ່​ດີ​ເຊັ່ນ: ​ເປັນ​ແມ່​ເຮືອນ​ທີ່​ດີ, ລ້ຽງ​ລູກລ້ຽງ​ເຕົ້າ, ໜຶ້ງ​ເຂົ້າ​ເປົ່າ​ໄຟ, ​ເກັບຜັກຫັກ​ໜໍ່ ​ແລະ ​ເຮັດ​ໄຮ່​ເຮັດ​ນາ​ຢ່າງ​ໜັກໜ່ວງ​ພໍ​ສົມຄວນ. ສ່ວນ​ແມ່ຍິງ​ທີ່​ດຳລົງ​ຊີວິດ​ຢູ່​ຕາມ​ຕົວ​ເມືອງ​ກໍ​ເຮັດ​ໜ້າ​ທີ່​ຄ້າຂາຍ​ງາຍ​ມື​ຫາ​ເຊົ້າກິນ​ຄໍ່າ ການ​ທີ່​ຈະ​ໄດ້​ເປັນ​ພະນັກງານ, ຂ້າ​ລາດຊະ​ການ, ​ເປັນ​ເຈົ້າ​ເປັນ​ນາຍ​ແມ່ນ​ມີ​ໜ້ອຍ​ທີ່​ສຸດ ​ເພາະ​ທຸກ​ສິ່ງ​ຢ່າງ​ມັນ​ຂຶ້ນກັບ​ເຈົ້ານາຍ​ເໜືອ​ຫົວ​ເປັນ​ຜູ້​ຕັດສິນ. ສ່ວນວ່າ​ເປັນ​ນັກວິຊາການ, ​ເປັນ​ກຳມະກອນ​ໃນ​ໂຮງ​ຈັກ​ໂຮງງານ​ແມ່ນ​ຫາ​ຍາກ​ທີ່​ສຸດ ​ເພາະສະ​ໄໝ​ກ່ອນ​ປະ​ເທດ​ຊາດ​ຂອງ​ພວກ​ເຮົາ​ບໍ່​ທັນ​ມີ​ຮອດ​ໂຮງ​ຈັກ​ໂຮງງານ​ຄື​ສະ​ໄໝ​ນີ້. ​ແຕ່​ວ່າ​ແມ່ຍິງ​ເຮົາ​ທີ່ຢູ່​ໃນ​ເຂດ​ປົດ​ປ່ອຍ​ຍັງ​ໄດ້​ສະໝັກ​ເຂົ້າ​ເປັນ​ທະຫານ, ພະນັກງານ, ມີ​ຈຳນວນ​ຫລວງຫລາຍ​ໄດ້​ກາຍ​ເປັນ​ນັກ​ປະຕິວັດ​ເພື່ອ​ເຮັດ​ໜ້າ​ທີ່​ສູ້​ຮົບ​ກັບ​ສັດຕູ​ທີ່​ເຂົ້າມາ​ຮຸກ​ຮານ​ປະ​ເທດ​ຊາດ​ບ້ານ​ເມືອງ. ພາຍຫລັງ​ປະ​ເທດ​ຊາດ​ໄດ້​ຮັບ​ການ​ປົດ​ປ່ອຍ​ຢ່າງ​ສົມບູນ​ແລ້ວ ​ແມ່ຍິງ​ລາວ​ກໍ​ຄ່ອຍໆ​ພັດທະນາ​ຕົນ​ເອງ​ໃຫ້​ກ້າວ​ໄປ​ຕາມ​ແຕ່ລະ​ໄລຍະ​ໃນ​ຂະ​ບວນວິວັດ​ການ​ປ່ຽນ​ແປງ​ຂອງ​ສັງຄົມ​​ແຫ່ງ​ຍຸກ​ສະ​ໄໝ.

​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ - Wave100S AD to Website 2020 0 - ​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ

ພໍ​ຕົກ​ມາ​ຮອດ​ຍຸກ​ປັດຈຸບັນ​ນີ້, ​ແມ່ຍິງ​ລາວ​ໄດ້​ມີ​ການ​ປ່ຽນ​ແປງ​ຢ່າງ​ກ້າວ​ກະ​ໂດດ​ຂັ້ນ ອັນ​ສາ​ເຫດ​ຕົ້ນຕໍ​ກໍ​ເນື່ອງ​ມາ​ຈາກ​ພັກ ​ແລະ ລັດຖະບານ​ໄດ້​ມີ​ແນວທາງ​ຈັດຕັ້ງນຳພາ, ​ເອົາ​ໃຈ​ໃສ່​ສຶກສາ​ອົບຮົມ​ດ້ວຍ​ຮູບ​ການຈັດຕັ້ງອົງການ​ໜຶ່ງ​ຂຶ້ນມາ ​ເອີ້ນ​ວ່າ: ສະຫະພັນ​ແມ່ຍິງ​ລາວ ​ເປັນ​ຜູ້​ເຮັດ​ໜ້າ​ທີ່​ຄຸ້ມ​ຄອງ​ຈັດຕັ້ງນຳພາ, ສຶກສາ​ອົບຮົມ​ໃຫ້​ແມ່ຍິງ​ລາວ​ກ້າວ​ໄປ​ໃຫ້​ທັນ​ຍຸກ, ທັນ​ສະ​ໄໝ ​ແລະ ກ້າວ​ໄປ​ຢ່າງ​ບໍ່​ຢຸດ​ຢັ້ງ. ຜ່ານ​ພຶດຕິ​ກຳ​ຕົວ​ຈິງ​ໃນ​ຂະ​ບວນການ​ປະຕິວັດ​ແຕ່ລະ​ໄລຍະ​ຈຶ່ງ​ເຮັດ​ໃຫ້​ແມ່ຍິງ​ລາວ​ມີ​ອັນ​ປ່ຽນ​ແປງ​ໃໝ່​ຢ່າງ​ກ້າວ​ກະ​ໂດດ​ຂັ້ນ.

ມາ​ຮອດ​ປັດຈຸບັນ​ແມ່ຍິງ​ລາວ​ໄດ້​ເປັນ​ກຳລັງ​ແຮງ​ອັນ​ສຳຄັນ​ໃຫຍ່​ຫລວງ​ໃນ​ພາລະກິດ​ສ້າງສາ​ພັດທະນາ​ປະ​ເທດ​ຊາດ. ຍ້ອນ​ເຫັນ​ຄວາມ​ໝາຍ​ຄວາມ​ສຳຄັນ ​ແລະ ບົດບາດ​ໜ້າ​ທີ່​ຂອງ​ແມ່ຍິງ, ພັກ ​ແລະ ລັດຖະບານ ຈຶ່ງ​ຍົກ​ສູງ​​ໃຫ້​ແມ່ຍິງ​ປະກອບສ່ວນ​ເຂົ້າ​ໃນ​ທຸກ​ຂົງ​ເຂດ​ວຽກ​ງານ ບໍ່​ວ່າ​ໃນ​ຂົງ​ເຂດ​ບໍລິຫານ​ປົກຄອງ​ບ້ານ​ເມືອງ, ຂົງ​ເຂດ​ເສດຖະກິດ-ສັງຄົມ ນັບ​ທັງ​ວຽກ​ງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ. ຕົວຢ່າງ​ໃຫ້​ເຫັນ​ຢ່າງ​ຊັດ​ເຈນ​ກໍ​ຄື ​ແມ່ຍິງ​ລາວ​ໄດ້​ເປັນ​ຜູ້ນຳ​ຂັ້ນສູງ​ສຸດ​ຂອງ​ປະ​ເທດ, ​ເປັນ​ລັດຖະມົນຕີ, ອະທິບໍດີ, ​ເປັນ​ນາຍຮ້ອຍ, ນາຍ​ພັນ, ​ເປັນ​ນັກ​ວິສະວະກອນ, ​ເປັນ​ວິຊາ​ການ, ​ເປັນ​ຕຳຫລວດ, ທະຫານ, ພະນັກງານ, ​ເປັນ​ກຳມະກອນ​ຕາມ​ໂຮງ​ຈັກ​ໂຮງງານ​ຢ່າງ​ຫລວງຫລາຍ​ພາຍ​ມາກ. ​ໃນ​ພຶດຕິ​ກຳ​ຕົວ​ຈິງ​ທີ່​ສະ​ແດງ​ໃຫ້​ເຫັນ​ຄວາມ​ສາມາດ​ຂອງ​ຜູ້ຍິງ​ລາວ​ໃນ​ຍຸກ​ປັດຈຸບັນ ​ເຂົາ​ໄດ້​ເຮັດ​ໜ້າ​ທີ່​ຄຽງ​ຄູ່​ກັບ​ເພດ​ຊາຍ ​ແລະ ມີ​ບາງ​ຢ່າງ​ເຮັດ​ໄດ້​ດີກ​ວ່າ​ເພດ​ຊາຍ​ເປັນ​ການ​ເຂົ້າວັດ​ຟັງ​ທຳ​ກໍ​ມີ​ແຕ່​ແມ່ຍິງ​ເປັນ​ສ່ວນ​ໃຫຍ່, ຟ້ອນ​ລຳວົງ​ດ້ວຍ​ຈັງຫວະ​ຍາກໆ​ກໍ​ມີ​ແຕ່​ແມ່ຍິງ​ເປັນ​ພຶງ​ເປັນ​ແພ ຜູ້​ຊາຍ​ໄດ້​ແຕ່​ນັ່ງ​ອ້າ​ປາກ​ເບິ່ງ. ນີ້​ຄື​ສັດຈະທຳ​ຕົວ​ຈິງ​ທີ່​ເຫັນ​ວ່າ​ຜູ້ຍິງ​ລາວ​ສະ​ໄໝ​ນີ້​ເປັນ​ຜູ້ຍິງ​ຍຸກ​ໃໝ່​ໄຟ​ແຮງ.

​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ -    AD conten website - ​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ
​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ - lattana banner - ​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ
​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ - lattana banner 1 - ​ແມ່ຍິງ​ລາວ​ໃນ​ຍຸກ​ໃໝ່​ໄຟ​ແຮງ
error: Alert: ເນື້ອຫາຂ່າວມີລິຂະສິດ !!