ຣັດເຊຍຍື່ນຟ້ອງໂຊຊຽວມີເດຍ 5 ແຫ່ງ ບໍ່ຍອມລຶບເນື້ອໃນຊວນຄົນປະທ້ວງ
ລັດຖະບານຣັດເຊຍຕັດສິນໃຈຍື່ນຟ້ອງໂຊຊຽວມີເດຍຊື່ດັງຫລາຍແຫ່ງ ທີ່ປ່ອຍໃຫ້ມີການເຊີນຊວນຄົນລຸ້ນໃໝ່ອອກໄປປະທ້ວງໃນແພກຟອມຂອງຕົນ.
ວັນທີ 9 ມີນາ 2021, ສຳນັກຂ່າວຣອຍເຕີ (Reuters) ລາຍງານວ່າ: ທາງການຣັດເຊຍກຳລັງຍື່ນຟ້ອງຜູ້ໃຫ້ບໍລິການໂຊຊຽວມີເດຍ ທີ່ບໍ່ຍອມລຶບເນື້ອໃນທີ່ເຊີນຊວນໃຫ້ເຍົາວະຊົນອອກມາຊຸມນຸມຢ່າງຜິດກົດໝາຍ.
ບໍລິສັດທີ່ຖືກຟ້ອງມີທັງໝົດ 5 ແພກຟອມ ໂດຍແພກຟອມທີ່ຖືກ 3 ຂໍ້ຫາ ໄດ້ແກ່: ເຟສບຸກ, ທະວິດເຕີ ແລະ ກູເກິລ, ແຕ່ລະຂໍ້ຫາມີໂທດປັບໄໝສູງສຸດ 4 ລ້ານຣູເບິລ.
ນອກຈາກນັ້ນ, ຕິກຕ໊ອກ ແລະ ເທເລແກຣມ ກໍຖືກຍື່ນຟ້ອງເຊັ່ນກັນ. ຕາມລາຍງານບໍ່ໄດ້ມີການລະບຸວ່າທາງການຣັດເຊຍແຈ້ງໄປຈັກຂໍ້ຫາ.
ການດຳເນີນທາງກົດໝາຍຄັ້ງນີ້ເກີດຂຶ້ນຈາກກໍລະນີທີ່ຊາວຣັດເຊຍນັດຊຸມນຸມກັນທົ່ວປະເທດ ຫລັງບໍ່ພໍໃຈຄຳພິພາກສາຈຳຄຸກ ອາເລັກເຊ ນາວັລນີ ຜູ້ນຳຝ່າຍຄ້ານ ທີ່ວິພາກວິຈານປະທານາທິບໍດີ ວະລາດິເມຍ ປູຕິນ ຕະຫລອດ ໂດຍ ນາວັລນີ ແລະ ຜູ້ສະໜັບສະໜູນຂອງລາວເບິ່ງວ່າ: ໂທດຈຳຄຸກ 30 ເດືອນຈາກການຝ່າຝືນກົດປາບປາມໃນຄະດີຟອກເງິນນັ້ນ ເປັນຄະດີທີ່ຕັ້ງໃຈລົງໂທດດ້ວຍເຫດຜົນທາງການເມືອງ.
ສຳລັບສາເຫດທີ່ທ່ານ ນາວັລນີ ຕ້ອງລະເມີດການປາບປາມ ເກີດຈາກການທີ່ລາວຖືກວາງຢາພິດ ແລະ ເມຍຂອງລາວຕັດສິນໃຈສົ່ງຜົວ ໄປປິ່ນປົວຢູ່ປະເທດເຢຍລະມັນ ເນື່ອງຈາກສົງໄສວ່າລັດຖະບານຣັດເຊຍອາດຢູ່ເບື້ອງຫລັງການວາງຢາພິດ.
