ປະທານ ສຸພານຸວົງ ນັກປະຕິວັດຜູ້ກ້າແກ່ນ

- advert banner 728 90 728x90 - ປະທານ ສຸພານຸວົງ ນັກປະຕິວັດຜູ້ກ້າແກ່ນ

- image5 1 - ປະທານ ສຸພານຸວົງ ນັກປະຕິວັດຜູ້ກ້າແກ່ນ

- new3 - ປະທານ ສຸພານຸວົງ ນັກປະຕິວັດຜູ້ກ້າແກ່ນ

ໂດຍ: ກ້ອງສ່ອງ ອິດສະຫລະ

​​ຄົນ​ເຮົາເກີດ​ມາ​ໃນ​ໂລກ​​ນີ້ໄດ້​ມີຫລາຍ​ຄົນ, ຫລາຍ​ທ່ານກາຍເປັນຜູ້​ນໍາ​ຂອງ​ປະ​ເທດ ​ໂດຍ​ສະ​ເພາະ​ແມ່ນ​ຜູ້​ເປັນ​ເຈົ້າ​ຊີວິດ ຫລື ​ໃນ​ເຊື້ອ​ສາຍກະສັດ​ບໍ່​ມີ​ອົງ​ໃດ​ທີ່​ຢາກ​ໃຫ້​ຕົນ​​ເອງທຸກ​ຂະ​ເວດທະນາ ແລະ ​ເກີດ​ເປັນ​ຄົນ​ໃນ​ຊາດ​ດຽວ​ກໍ​ຕ້ອງການ​ຄວາມສຸກກ່ອນ​ທີ່​ຈະ ກ້າວ​ໄປເຫັນ​ຜົນ​ປະ​ໂຫຍ​ດຂອງຄົນອື່ນ ຫລື​ວ່າ​ ຂອງ​ປະ​ເທດ​ຊາດ, ແຕ່​ສໍາລັບສະ​ເດັດ​ເຈົ້າ​ສຸພາ​ນຸວົງ ​ເພິ່ນ​ພັດ​ເປັນ​ຜູ້​ໜຶ່ງ​ທີ່​​ມີ​ແນວ​ຄິດ​ ແລະ​ ການ​ກະທໍາ​​ແບບ​ກົງກັນຂ້າມ​ ຄືຕ້ອງການ​ໃຫ້​ປະ​ເທດ​ຊາດ​ມີ​ສັນຕິພາບ, ເອກະລາດ, ອະທິປະ​ໄຕ, ໃຫ້​ປະຊາລາດ​ຊະ​ດອນ​ມີ​ສິດ​ເສລີພາບ, ສະ​ເໝີ​ພາບ​ ຍ້ອນ​ວ່າ​ນັບ​ແຕ່​ມື້​​ເພິ່ນເກີດ​ມາ​ຈົນ​ເຕີບ​ໃຫຍ່​​ ບ້ານເມືອງ​ເຮົາ​ໄດ້​ຕົກຢູ່​ໃນ​ເງື່ອນ​ໄຂ​ປະ​ເທດ​ຊາດ​ເປັນ​ຫົວ​ເມືອງ​ຂຶ້ນ​ຂອງຈັກກະພັດ​ຕ່າງ​ຊາດ​ມາ​ຮຸກ​ຮານ.

ສະ​ເດັດ​ເຈົ້າ​ສຸພາ​ນຸວົງ ​ເພິ່ນ​ເປັນ​ຄົນ​ທີ່​ມີ​ທັກ​ສະ ​ແລະ ​​ຄວາມ​ສາມາດ​ແຕ່​ຍັງ​ນ້ອຍ​ ຄືເປັນ​ຄົນ​ທີ່​ມີ​ສຸຂະພາບ​ແຂງ​ແຮງ,  ​ມີ​ພອນ​ສະຫວັນຮຽນ​ໜັງສື​ເກັ່ງ, ​​ເມື່ອ​ເຕີບ​ໃຫຍ່​ຂຶ້ນ​ມາ​ກໍ​ໄດ້​ໄປ​ຮຽນ​ຢູ່​ຕ່າງປະເທດ ຄືປະ​ເທດ​ຝຣັ່ງ​​ໃນ​ສາຂາ​ວິຊາວິສະວະ​ກໍາ​ຂົວ​ທາງ, ​ເມື່ອ​ຮຽນ​ຈົບ​ມາ​ເພິ່ນ​ກໍເປັນ​ນັກ​ວິສະວະກອນ​ຂົວ​ທາງ ແລະ ໄດ້ຮັບໃຊ້ພາລະກິດຂອງຊາດຕາມວິຊາສະເພາະທີ່​ຮຽນ​ຈົບມາເປັນເວລາ ຫລາຍປີສົມຄວນ. ຈາກຜົນງານອັນໂດດເດັ່ນຂອງ​ເພິ່ນທີ່​ເປັນ​ສັນຍາ​ລັກ​ໃຫ້​ເຮົາ​ເຫັນຮອດ​ປັດຈຸບັນ​ ກໍຄືການກໍ່ສ້າງຂົວນ້ຳໄຮຢູ່ ເມືອງພີນ ແຂວງສະຫວັນນະເຂດ ແລະ ຂົວອື່ນໆທີ່ຢູ່ຫວຽດນາມ ແລະ ກໍາປູເຈຍ ເຊິ່ງເວລານັ້ນປະເທດລາວເຮົາຍັງຂຶ້ນກັບເຄືອສະ ຫະພັນອິນດູຈີນຝຣັ່ງ. ພ້ອມ​ດຽວ​ກັນ​ນັ້ນ, ໃນ​ເວລາ​ສຶກສາ​ຢູ່​ປະ​ເທດ​ຝຣັ່ງ​ ເພິ່ນ​ຍັງ​ເປັນ​ນັກ​ກິລາ​​ທີ່​ເກັ່ງຜູ້​ໜຶ່ງ​ຂອງ​ໂຮງຮຽນ​ມະຫາ ວິທະຍາ​ໄລ​ໃນ​ຕໍາ​ແໜ່​ງຜູ້​ຮັກສາ​ປະຕູມືໜຽວ.

ເມື່ອຖາມວ່າດ້ວຍສາເຫດໃດ ສະເດັດເຈົ້າສຸພານຸວົງ ຈຶ່ງກາຍເປັນນັກປະຕິວັດຜູ້ກ້າແກ່ນ ? ຄໍາຕອບກໍຄື ຍ້ອນປະເທດຊາດຕົກ ເປັນຫົວເມືອງຂຶ້ນຂອງ​ຈັກກະພັດ​ຜູ້​ຮຸກ​ຮານ, ປະຊາຊົນລາວທຸກຍາກລໍາບາກ, ຂາດສິດເສລິພາບ, ປະເທດຊາດບໍ່ມີເອກະລາດ ແລະ ອະທິປະໄຕ ສົມທົບກັບເພິ່ນເອງເປັນນັກກໍ່ສ້າງໄດ້ສໍາຜັດກັບສະພາບແວດລ້ອມ ເຫັນພວກລ່າເມືອງຂຶ້ນຝຣັ່ງກົດ​ຂີ່​ຂູດ​ຮີດ ​ແລະ ຂົ່ມເຫັງຄົນລາວ, ພົນລະເມືອງລາວ ຈົນ​ກາຍເປັນບໍ່ເກີດແຫ່ງອຸດົມ​ການ ​ແລະ ຄວາມຄຽດແຄ້ນ. ດັ່ງ​ຕົວຢ່າງຄັ້ງໜຶ່ງໃນເວ ລາກໍ່ສ້າງຂົວນ້ຳໄຮເຫັນນາຍຝຣັ່ງໄດ້ບັງຄັບໃຫ້ຄົນ​ລາວພາກັນຫາມເສົາ, ບັງເອີນພາກັນຍົກບໍ່ຂຶ້ນນາຍຝຣັ່ງກໍໃຫ້ຫລຸດຈໍານວນ ຄົນຫາມລົງແລ້ວກໍບັງຄັບໃຫ້ຍົກຕໍ່, ເມື່ອຍົກບໍ່ຂຶ້ນນາຍຝຣັ່ງກໍ​ໃຫ້​ຫລຸດ​ຈໍານວນ​ຄົນ​ຫາມ​​ລົງ​ເລື້ອຍໆ​ແທນ​ທີ່​ຈະ​​ເພີ່​ມຄົນຫາມ. ເມື່ອ​ເຫັນເປັນເຊັ່ນນັ້ນ, ສະເດັດເຈົ້າສຸພານຸວົງ ເພິ່ນກໍຍ່າງໄປຫາແລ້ວເວົ້າວ່າ: ​ໃຫ້​ພວກ​ເຈົ້າ​ພາກັນ​ອອກໝົດ ຂ້ອຍ​ຈະ​ເປັນ​ຜູ້​ຫາມ​ກັບ​ຄົນ​ຝຣັ່ງ​ 2 ຄົນ. ​ເມື່ອ​ໄດ້​ຍິນ ​ແລະ ​ເຫັນເຊັ່ນ​ນັ້ນ​ນາຍ​ຝຣັ່ງກໍ​​​ຢ້ານ ​ແລະ ເປີດໜີອາດ​ຫລາດ. ນີ້ຄື​ປາກົດ​ການ​ບາງ​ຢ່າງ​ທີ່​ສະ​ເດັດ​ໄດ້​​ພົບ​ພໍ້ ​ແລະ ສໍາຜັດຕົວ​ຈິງ​ໃນ​ຊີວິດ​ປະ​ຈໍາ​ວັນຂອງ​ເພິ່ນ​ເວລາ​ຍັງ​ເປັນ​ນັກ​ຂົວ​ທາງ.

- lattana 1 - ປະທານ ສຸພານຸວົງ ນັກປະຕິວັດຜູ້ກ້າແກ່ນ

ສະ​ເດັດເຈົ້າສຸພາ​ນຸວົງ ​ໄດ້​​​ເລີ່ມເຂົ້າ​ຮ່ວມຂະ​ບວນການຕໍ່ສູ້​ເພື່ອຮຽກຮ້ອງ​ເອກະລາດ​ຈາກ​ພວກ​ຝຣັ່ງ​​ເລີ່​ມແຕ່​ປີ 1945 ​ພາຍໃຕ້​ຂະ​ບວນການ​ແນວ​ລາວ​ອິດສະຫລະ ​ເຊິ່ງ​ນໍາພາ​ໂດຍ​ເຈົ້າ​ເພັດ​ຊະລາ​ດ​ເປັນ​ແກນ​ນໍາ. ຂະ​ບວນການ​ດັ່ງ​ກ່າວ​ໄດ້​ດໍາ​ເນີນ​​ໄປຢ່າງ​ຂະ​ບວນ

ກວ້າງ​ຂວາງ ​​ແລະ ​ຂະຫຍາຍຕົວ​ຂຶ້ນ​ສູ່​ລະດັບ​ສູງເລື້ອຍໆ ຈົນ​ກ້າວ​ຂຶ້ນ​ມີ​ພັກ​ນໍາພາຍິ່ງ​ເຮັດ​ໃຫ້​ມີ​ການຕໍ່ສູ້​ທາງ​ດ້ານ​ການ​ເມືອງ ​ແລະ ​ການ​ທະຫານ​ໄດ້​ຮັບ​ໄຊຊະນະ​ຢ່າງ​ບໍ່​ຢຸດ​ຢັ້ງ. ຜ່ານ​ຊີວິດ​ຕົວຈິງຂອງ​ສະ​ເດັດ​ທີ່​ໄດ້​ເຂົ້າ​ຮ່ວມ​ຂະ​ບວນການ​ປະຕິວັ​ດຊາດ, ​ປະຊາທິປະ​ໄຕ ມີ​ຫລາຍ​ຄັ້ງຫລາຍ​ຫົນທີ່​​ເພິ່ນ​ໄດ້ຜະ​ເຊີນ​​ກັບ​ສິ່ງ​ທ້າ​ທາຍ​ໂດຍ​ເອົາ​ຊີວິດ​ເປັນ​ເດີມ​ພັນ ​ແລະ ​ສະ​ແດງ​ເຖິງ​ຄວາມ​ຕັດ​ສິນ​ໃຈ​ອັນ​ໜຽວ​ແໜ້ນ​ຂອງ​ເພິ່ນ. ດັ່ງຜູ້​ຂຽນ​ຍໍ​ຍົກ​ເອົາບາງຕອນ​ເດັດໆ​ມາ​ເລົ່າ​ສູ່​ຟັງ​ດັ່ງ​ນີ້: ຕອນ​ທີ​ໜຶ່ງ​ຝຣັ່ງ​ເສດ​ຕາມ​ລ່າຈັບ ​ແລະ ປາບ​ປາມຂະ​ບວນ​ແນວ​ລາວ​ອິດ

ສະລະກໍພາກັນ​ປົບ​ໄປ​ຢູ່​ເມືອງ​ໄທ, ບໍ່ພໍຄາວທ່ານ ຄໍາ​ມ້າວ ວິ​ໄລ ຜູ້​ຖືກແຕ່ງ​ຕັ້ງ​ເປັນ​ນາຍົກ​ລັດຖະບານ​ຕໍ່ຕ້ານ​ກໍ​ປະກາດ​ຍຸບ​ລັດຖະ ບານ​ແລ້ວ​ອວ່າຍ​ໜ້າ​ກັບ​ຄືນ​ມາ​ຫາ​ຝຣັ່ງ, ​ແຕ່ເພິ່ນ​ເອງ​ບໍ່​ຍອມ​ກັບ​ຄືນ ​ພ້ອມ​ທັງນໍາ​ພາ​ກໍາລັງທີ່​ສະໜັບສະໜູ​ນຈໍານວນ​ໜຶ່ງ​ຂ້າມ​ຂອງ​ໜີ​ເຂົ້າປ່າ ​ເພື່ອ​ຫາ​ຊ່ອງທາງ​ຕໍ່ສູ້​ຈົນກວ່າ​ຈະ​ໄດ້​ຮັບ​ໄຊຊະນະ. ຕອນ​ທີສອງແມ່ນ​​ບັ້ນ​ຮົບ 21 ມີນາ ​ໃນ​ການຕີ​ຕ້ານ​ຝຣັ່ງຢູ່​ເມືອງ​ທ່າ​ແຂກ, ​ເພິ່ນ​ເອງ​ຖືກ​ບາດ​ເຈັບ​ແຕ່​ກໍ​ເອົາ​ຕົວ​ລອດ​ດ້ວຍ​ຄວາມ​ປອດ​ໄພ. ຕອນ​ທີ​ສາມ​ແມ່ນ​ລັດຖະບານ​ກະຕ່າຍຈັບ​ເຂົ້າ​ຄຸກ​ໂພນ​ເຄັງ​ເປັນ​ເວລາ 300 ວັນກໍ​ສາມາດ​ແຫກ​ຄຸກ​ອອກໄດ້ດ້ວຍ​ຄວາມ​ປອດ​ໄພ. ສ່ວນວ່າ​ຕອນ​ທີສີ່​ນັ້ນ​ແມ່ນ​ເພິ່ນ​ກັບ​ບັນດາ​ຜູ້​ນໍາ​ການ​ປະຕິວັດ​ໄດ້​ນໍາພາ​ປົດ​ປ່ອຍປະ​ເທດ​ຊາດ​ໃນ​ປີ 1975 ​ແລ້ວ​ເພິ່ນ​ເອງ​ກໍໄດ້ເປັນ​ປະທານ​ປະ​ເທດ​ຜູ້​ທໍາ​ອິດ​ຂອງ​ລາວ. ນີ້​ລະ​ເຂົາ​ເອີ້ນ​ວ່າ​​ເປັນຄົນ​ດີ​ຂອງ​ຊາດ ​ແລະ ​ຂອງ​ປະຊາຊົນ, ​​ຄົນ​ມີ​ປັນຍາ​ຜີ​ບໍ່​ຂ້າ, ​ມ້າ​ບໍ່​ຢຽບ ​ເຖິງ​ຈະ​ຕົກ​ຢູ່​ໃນ​ສະພາບ​ອັນ​ຄັບຂັນ​ກໍລະ​ນີ​ໃດ​ກໍຕາມກໍ​ສາມາດ​ເອົາ​ຕົວ​ລອດ ​ແລະ ​ຕີ​ລົບ​ທົບ​ໄດ້​ ກາຍ​ເປັນ​ຍອດ​ຄົນ​ສົມ​ກັບ​ວ່າ​ເພິ່ນ​ເປັນ​ນັກ​ປະຕິວັດ​ຜູ້​ກ້າ​ແກ່ນອີ່ຫລີ.

error: Content is protected !!