ແຄນ​ລາວ ມໍລະດົກ​ລາວ ມໍລະດົກ​ໂລກ

ແຄນ​ລາວ ມໍລະດົກ​ລາວ ມໍລະດົກ​ໂລກ - aHR0cHM6Ly9zLmlzYW5vb2suY29tL2xhLzAvdWQvNS8yODE5NS8yODE5NS5qcGc - ແຄນ​ລາວ ມໍລະດົກ​ລາວ ມໍລະດົກ​ໂລກ
ແຄນ​ລາວ ມໍລະດົກ​ລາວ ມໍລະດົກ​ໂລກ - Untitled design - ແຄນ​ລາວ ມໍລະດົກ​ລາວ ມໍລະດົກ​ໂລກ

ໂດຍ: ທິດ​ກໍ່າ

​     ນັບ​ແຕ່​ສຽງ​ແຄນ​ລາວ​ໄດ້​ຈົດ​ທະບຽນ​​ເຂົ້າ​ເປັນ​ມໍລະດົກ​ໂລກ​ໃນ​ວັນ​ທີ 14 ມີນາ 2018 ​ໄດ້​ເຮັດ​ໃຫ້​ຖານະ​ບົດບາດ​ອິດ​ທິພົນ​ຂອງ​ແຄນ​ລາວ​​ໄດ້​ແຜ່​ຂະຫຍາຍ​ໄປ​ທົ່ວ​ພາກພື້ນ ​ແລະ ​ໃນ​ໂລກ. ອັນ​ສຳຄັນ​ທີ່​ສຸດ​ແມ່ນ​ເຮັດ​ໃຫ້​ຊາວ​ໂລກ​ຮັບ​ຮູ້​ວ່າ​ແຄນ​ລາວ ຫລື​ວ່າ ສຽງ​ແຄນ​ລາວ​ແມ່ນ​ດົນຕີ​ພື້ນ​ເມືອງ​ລາວ, ມີ​ຕົ້ນກຳ​ເນີ​ດມາ​ຈາກ​ຊາດ​ລາວ, ຄົນ​ລາວ, ​ເຊື້ອຊາດ​ລາວ​ມາ​ຫລາຍ​ພັນ​ປີ​ໂດຍ​ແທ້. ດັ່ງ​ສຸພາສິດ​ລາວ​ເຄີຍ​ກ່າວ​ຂານ​ກັນ​ມາ​ວ່າ: “ຜູ້​ໃດ​ຢູ່​ເຮືອນ​ສູງ, ກິນ​ເຂົ້າໜຽວ, ຄ້ຽວ​ປາ​ແດກ, ​ເປົ່າ​ແຄນ​ສຸດສະ​ແນນ​ລ່ອງ​ຂອງ” ​ແມ່ນ​ຄົນ​ລາວ, ​ເຊື້ອຊາດ​ລາວ​ໂດຍ​ກຳ​ເນີ​ດ.

ຈາກ​ສາ​ເຫດ​ດັ່ງກ່າວ, ​ແຄນ​ລາວ ຫລື ສຽງ​ແຄນ​ລາວ​ຈຶ່ງ​ຕິດ​ພັນ​ກັບ​ວິຖີ​ຊີວິດ​ຂອງ​ຄົນ​ລາວ​ມາ​ໂດຍ​ຕະຫລອດ ນັບ​ແຕ່​ສະ​ໄໝ​ບູຮານ​ຈົນ​ມາ​ຮອດ​ປັດຈຸບັນ. ນັບ​ແຕ່​ສຽງ​ແຄນ​ໄດ້​ຮັບ​ຈົດ​ທະບຽນ​ເຂົ້າ​ເປັນ​ມໍລະດົກ​ໂລກ ສະ​ເພາະ​ຢູ່​ພາຍ​ໃນ​ປະ​ເທດ​ກໍ​ເລີ່​ມມີ​ການ​ເຄື່ອນ​ໄຫວ ​ແລະ ມີ​ກິດຈະກຳ​ເກີດ​ຂຶ້ນຫລາຍ​ຢ່າງ​ເຊັ່ນ: ສະມາຄົມ​ແຄນ​ລາວ​ກໍ​ໄດ້​ຮັບ​ການ​ສ້າງຕັ້ງຂຶ້ນຢ່າງ​ເປັນ​ທາງ​ການ ​ແລະ ​ເປັນ​ຕົນ​ເປັນ​ໂຕ​ຂຶ້ນຢ່າງ​ເປັນ​ຮູ​ບປະ​ທຳ. ນອກຈາກ​ນັ້ນ ກໍ​ເກີດ​ມີ​ສະ​ໂມ​ສອນ​ຫລາຍ​ແຫ່ງ ນັບ​ທັງ​ສະ​ຖາ​ບັນ​ສິລະ​ປະ​ສຶກສາ​ໄດ້​ມີ​ການ​ສິດສອນ​ວິຊາ​ເປົ່າ​ແຄນ​ໃຫ້​ນ້ອງ​ນ້ອຍ​ເຍົາວະ​ຊົນ ​ແລະ ນັກຮຽນ​ນັກ​ສຶກສາ​ສິລະ​ປະ​ດົນຕີ​ຢ່າງ​ເປັນ​ຂະ​ບວນກວ້າງຂວາງ.

ມາ​ຮອດ​ປັດຈຸບັນ ​ເຄື່ອງ​ດົນຕີ​ທີ່​ເອີ້ນ​ວ່າ: “​ແຄນ” ​ແມ່ນ​ໄດ້​ຮັບ​ຄວາມ​ສົນ​ໃຈ​ຈາກ​ຊາວ​ໂລກ ກໍ​ຄື​ຊາວ​ຕ່າງ​ຊາດ​ໃນ​ຫລາຍ​ປະ​ເທດ​ທີ່​ສົນ​ໃຈ​ຮຽນ​ເປົ່າ​ແຄນ ​ເປັນຕົ້ນຄົນ​ຍີ່ປຸ່ນ, ຄົນ​ອັງກິດ, ຄົນ​ອາ​ເມ​ລິ​ກາ ​ແລະ ປະ​ເທດ​ອື່ນໆ. ​ໃນ​ຈຳນວນ​ຄົນ​ຕ່າງປະ​ເທດ​ທີ່​ເປົ່າ​ແຄນ​ເກັ່ງ​ທີ່​ສຸດ ກໍ​ຄື​ທ່ານ ຈອນ​ນີ້ ​ໂອ​ເຊ​ນ ທີ່​ສາມາດ​ເປົ່າ​ໄດ້​ທຸກ​ລາຍ​ແຄນ ​ແລະ ຍັງ​ສາມາດ​ເປົ່າ​ທຸກ​ຂັບ​ລຳ​ທ້ອງ​ຖິ່ນ​ຂອງ​ລາວ​ເຮົາ​ໄດ້​ຢ່າງ​ໄພ​ເລາະ​ເຊາະ​ຫູ ​ແລະ ຊຳນິ​ຊຳນານ​ເໝືອນ​ກັບ​ໝໍ​ແຄນ​ທີ່​ເກັ່ງໆ​ຂອງ​ລາວ​ເຮົາ.

​ເພື່ອ​ເຮັດ​ໃຫ້​ພາລະກິດ​ການ​ປັບປຸງ​ສົ່ງ​ເສີມ​ສິລະ​ປະ​ແຄນ​ລາວ​ໄດ້​ມີ​ການ​ພັດທະນາ​ແບບ​ຍືນ​ຍົງ ​ແລະ ຂະຫຍາຍຕົວ​ຍິ່ງໆ​ຂຶ້ນ ​ແລະ ກ້າວ​ສູ່​ສາກົນ​ໃນ​ອະນາຄົດ ​ໃນ​ວັນ​ທີ 11 ມີນາ 2021 ມາ​ນີ້ ​ໄດ້​ມີ​ພິທີ​ເຊັນ​ສັນຍາ​ໂຄງການ​ຜະລິດ ​ແລະ ຈຳໜ່າຍ​ຜະລິດ​ຕະພັນ​ສັນຍາ​ລັກ​ແຄນ​ລາວ ຈຳໜ່າຍ​ຜະລິດ​ຕະພັນ​ສັນຍາ​ລັກ​ແຄນ​ລາວ.

ແຄນ​ລາວ ມໍລະດົກ​ລາວ ມໍລະດົກ​ໂລກ - Wave100S AD to Website 2020 0 - ແຄນ​ລາວ ມໍລະດົກ​ລາວ ມໍລະດົກ​ໂລກ

ຈຸດປະສົງ​ຫລັກ​ໃນ​ພິທີ​ລົງ​ນາມ​ດັ່ງກ່າວ​ແມ່ນ​ເພື່ອ​ສົ່ງ​ເສີມ​ແຄນ​ລາວ ​ເຊິ່ງ​ເປັນ​ເຄື່ອງດົນຕີ​ເອກະລັກ​ພື້ນ​ເມືອງ​ລາວ​ໃຫ້​ເປັນ​ທີ່​ເອກອ້າງ​ສົມ​ກັບ​ເປັນ​ມໍລະດົກ​ໂລກ ​ແນ​ໃສ່​ສົ່ງ​ເສີມ​ດົນຕີ​ພື້ນ​ເມືອງ​ລາວ​ສຽງ​ແຄນ-ສິລະ​ປະວັດ​ທະນະ​ທຳ​ລາວ​ໃຫ້​ຕິດ​ພັນ​ກັບ​ການທ່ອງທ່ຽວ ​ເພື່ອ​ໃຫ້​ທົ່ວ​ສັງຄົມ​ນິຍົມ ​ແລະ ​ຊົມ​ໃຊ້​ແຄນ​ລາວ​ຢ່າງ​ກວ້າງຂວາງ. ອີກ​ປະການ​ໜຶ່ງ ກໍ​ເພື່ອ​ໃຫ້​ນັກ​ທ່ອງ​ທ່ຽວ ຫລື ຄົນ​ຕ່າງປະ​ເທດ​ເຫັນ​​ໄດ້​ຄວາມ​ເປັນ​ເອກະລັກ​ດົນຕີ​ພື້ນ​ເມືອງ​ລາວ, ຊຸກຍູ້​ການ​ຕະຫລາດ​ແຄນ​ຢູ່​ພາຍ​ໃນ ​ແລະ ສົ່ງ​ອອກ​ສູ່​ຕ່າງປະ​ເທດ ​ເພື່ອ​ສົ່ງ​ເສີມ​ວຽກ​ເຮັດ​ງານ​ທຳ​ໃຫ້​ແກ່​ບຸ​ກຄະລາ​ກອນ​ພາກ​ລັດ ​ແລະ ປະຊາຊົນ, ສ້າງ​ກອງ​ທຶນ​ຂອງ​ສະມາຄົມ​ແຄນ​ລາວ​ໃຫ້​ເຕີບ​ໃຫຍ່​ເຂັ້ມ​ແຂງ​ຂຶ້ນ​ເລື້ອຍໆ ​ເຊິ່ງທັງ​ໝົດ​ທີ່​ກ່າວ​ມາ​ນີ້​ແມ່ນ​ຈະ​ມີ​ການ​ຮ່ວມ​ມື​ກັນ​ເປັນ​ເວລາ 5 ປີ.

ກໍ​ຂໍ​ຊົມ​ເຊີຍ​ເປັນ​ຢ່າງ​ຍິ່ງ​ຕໍ່​ພາລະກິດ​ຂອງ​ສະມາຄົມ​ສຽງ​ແຄນ​ລາວ​ທີ່​ຈະ​ສືບ​ສານ​ຕຳນານ “​ແຄນ​ລາວ” ​ໃຫ້​ກ້າວ​ໄກ​ສົມ​ກັບ​ວ່າ​ສຽງ​ແຄນ​ລາວ​ໄດ້​ກາຍ​ເປັນ​ມໍລະດົກ​ຂອງ​ໂລກ​ທີ່​ຈັບ​ຕ້ອງ​ບໍ່​ໄດ້​ໄປ​ແລ້ວ ​ເຊິ່ງພວກ​ເຮົາ​ຄົນ​ລາວ​ທັງຫລາຍ​ຕ້ອງ​ພູມ​ໃຈ ​ແລະ ພ້ອມ​ກັນ​ສົ່ງ​ເສີມ​ໃຫ້​ສຽງ​ແຄນ​ລາວ​ກາຍ​ເປັນ​ເອກະລັກ​ຂອງ​ເຊື້ອຊາດ​ລາວ​ຢ່າງ​ແທ້​ຈິງ.

​ເຖິງ​ຢ່າງ​ໃດ​ກໍ​ດີ, ​ເພື່ອ​ໃຫ້​ມີ​ການ​ຄວບ​ຄູ່​ກັນ​ມີ​ແຄນ​​ແລ້ວ​ກໍ​ຕ້ອງ​ມີ​ໝໍ​ແຄນ, ມີ​ໝໍ​ລຳ ​ເພາະ​ໝໍ​ລຳ​ກັບ​ໝໍ​ແຄນ​ມັນ​ເປັນ​ຄູ່​ມາດຕະ​ເກນ​ຕິດ​ພັນ​ກັນ​ປານ​ປີ່​ກັບ​ຂຸ່ຍ. ມາ​ຮອດ​ປັດຈຸບັນ ​ເຮົາ​ເຫັນ​ວ່າ​ວົງ​ການ​ໝໍ​ລຳ​ມັນ​ກຸດ​ຫ້ຽນ​ໄປ​ຕາມ​ການ​ເວລາ ​ແລະ ຍຸກ​ສະ​ໄໝ ​ເປັນຕົ້ນໝໍ​ລຳ​ເລື່ອງ, ໝໍ​ລຳ​ກອນ ​ເຫັນ​ວ່າ​ນັບ​ມື້​ເຫືອດ​ຫາຍ​ໄປ​ຈາກ​ສັງຄົມ​ລາວ. ຜ່ານ​ມາ​ອາ​ໄສ​ແຕ່​ໝໍ​ລຳ​ ສະໝານ ​ເປັນ​ໝໍ​ລຳ​ກອນ​ຄວບ​ຄູ່​ກັບ​ໝໍ​ແຄນ ​ເພື່ອ​ກູ້​ໜ້າ​ກູ້​ຕາ​ຂອງ​ຊາດ​ຍາມ​ເມື່ອ​ມີ​ພິທີ​ທາງ​ການ, ຍາມ​ບຸນ, ຍາມ​ທານ, ​ແຕ່​ພາຍຫລັງ​ໝໍ​ລຳ ສະໝານ ລາ​ໂລກ​ໄປ​ແລ້ວ ໝໍ​ລຳ​ຄູ່​ລຳ​ກອນ​ກໍ​ມິດ​ຈີ່​ຫລີ່ ​ເພາະ​ລະຫວ່າງ​ນັກ​ປະດິດ​ຄິດ​ແຕ່ງ, ໝໍ​ແຄນ, ໝໍ​ລຳ​ມັນ​ເປັນ​ສິລະ​ປະ​ຮ່ວມ​ວົງ​ທີ່​ຂາດ​ບໍ່​ໄດ້ ສົມຄວນ​ແລ້ວ​ທີ່​ພວກ​ເຮົາ​ຕ້ອງ​ຟື້ນຟູ​ຖ້າ​ບໍ່​ຢາກ​ໃຫ້​ມັນ​ເຫືອດ​ຫາຍ​ໄປ​ຈາກ​ສັງຄົມ​ລາວ.

ແຄນ​ລາວ ມໍລະດົກ​ລາວ ມໍລະດົກ​ໂລກ - WhatsApp Image 2020 05 27 at 5 - ແຄນ​ລາວ ມໍລະດົກ​ລາວ ມໍລະດົກ​ໂລກ
ແຄນ​ລາວ ມໍລະດົກ​ລາວ ມໍລະດົກ​ໂລກ - WhatsApp Image 2020 05 27 at 5 - ແຄນ​ລາວ ມໍລະດົກ​ລາວ ມໍລະດົກ​ໂລກ
error: Alert: ເນື້ອຫາຂ່າວມີລິຂະສິດ !!