ທັດສະນະຂອງອົງການອະນາໄມໂລກກ່ຽວກັບ ພາສປອດ ວັກຊີນ ອິເລັກໂຕຣນິກ

ອົງການອະນາໄມໂລກ(WHO) ໃຫ້ທັດສະນະວ່າ ພາສປອດວັກຊີນ ອີເລັກໂຕຣນິກ  ອາດເປັນເຄື່ອງມືທີ່ມີຜົນປະໂຫຍດທີ່ສຸດ  ແຕ່ກໍກ່າວເຕືອນວ່າ ການນຳໃຊ້ພາສປອດດັ່ງກ່າວ ໂດຍສະເພາະແມ່ນຕໍ່ກັບການເດີນທາງກັບເຄື່ອງບິນ.

ໃນກອງປະຊຸມຖະແຫຼງຂ່າວທາງອອນລາຍ, ຜູ້ອຳນວຍການຮັບຜິດຊອບໂຄງການສຸກເສີນຂອງ ອົງການອະນາໄມໂລກ ທ່ານ Mike Ryan ກ່າວວ່າ ການມີໃຍຢັ້ງຢືນໃນພາສປອດວັກຊີນ ອີເລັກໂຕຣນິກ ເດີນທາງກັບຖ້ຽວບິນສາກົນນັ້ນ ອາດຈະບໍ່ມີຄວາມສະເໝີພາບ ເພາະການສັກວັກຊີນຕ້ານໂຄວິດ-19 ຍັງບໍ່ທັນໄດ້ປະຕິບັດກັນທົ່ວໄປ ແລະ ບໍ່ທັນໄດ້ແບ່ງປັນໃຫ້ເທົ່າທຽມກັນໃນທົ່ວໂລກ.

ນັກວິທະຍາສາດຂອງອົງການອະນາໄມໂລກ ທ່ານ Soumya Swaminathan ໃຫ້ຮູ້ວ່າ ອົງການອະນາໄມໂລກຂະນະນີ້ ກຳລັງປະສານສົມທົບກັບບັນດາຄູ່ຮ່ວມມືເພື່ອພັດທະນາໃບຮັບຮອງສັກວັກຊີນອີເລັກໂຕຣນິກຢູ່. ທ່ານກ່າວວ່າ: “ອີກສອງສາມອາທິດ ຫຼື ສອງສາມເດືອນຂ້າງໜ້າ ພວກເຮົາຈະເຮັດວຽກຮ່ວມກັບບັນດາປະເທດສະມາຊິກ ເພື່ອປຶກສາຫາລືກັນກ່ຽວກັບການຈັດຕັ້ງຜັນຂະຫຍາຍບັນຫາດັ່ງກ່າວ”.

ນອກຈາກນີ້ ບັນດາຜູ້ຊ່ຽວຊານຍັງມີຄວາມກັງວົນວ່າ ມັນຈະບໍ່ຮັກສາຄວາມລັບຂອງບຸກຄົນ, ມັນຈະເປັນການສ້າງການກວມອຳນາດ, ແບ່ງຊັ້ນວັນນະ ແລະ ບໍ່ມີຄວາມຍຸຕິທຳລະຫວ່າງຜູ້ທີ່ໄດ້ສັກ ແລະ ບໍ່ທັນໄດ້ສັກວັກຊີນຕ້ານໂຄວິດ-19 ດ້ວຍກັນ.