5 ສິ່ງສຳຄັນຊ່ວຍເບິ່ງແຍງປ້ອງກັນບໍ່ໃຫ້ລູກເຈັບປ່ວຍໃນຍາມໜາວ

ເຂົ້າສູ່ຍາມໜາວຍາມໃດ ພໍ່ແມ່ເລີ່ມກັງວົນກັບສຸຂະພາບຮ່າງກາຍຂອງລູກຢູ່ບໍ່ໜ້ອຍ ເນື່ອງຈາກໃນຍາມໜາວຈະມີອາກາດທີ່ເຢັນ ແລະ ແຫ້ງ ທັງຍັງມີໂອກາດທີ່ເຊື້ອພະຍາດຫລາກຫລາຍຊະນິດຈະແຜ່ກະຈາຍໄດ້ງ່າຍຫລາຍ ນັ້ນຈຶ່ງບໍ່ແປກໃຈເລີຍວ່າເດັກນ້ອຍມັກເຈັບປ່ວຍໃນຍາມນີ້ຫລາຍ. ມື້ນີ້ພວກເຮົາມີ 5 ເລື່ອງສຳຄັນທີ່ພໍ່ແມ່ຄວນຮູ້ ເຊິ່ງສາມາດປ້ອງກັນບໍ່ໃຫ້ລູກເຈັບປ່ວຍໄດ້ງ່າຍໃນຍາມໜາວມາແນະນຳບັນດາທ່ານດັ່ງນີ້ :

1. ລ້າງມືໃຫ້ສະອາດກ່ອນສຳຜັດລູກ : ດັ່ງທີ່ກ່າວມາຂ້າງເທິງວ່າໃນຍາມໜາວນັ້ນ ເຊື້ອພະຍາດຕ່າງໆສາມາດແຜ່ກະຈາຍໄດ້ງ່າຍ ສົ່ງຜົນໃຫ້ລູກເຈັບປ່ວຍ ຫລື ເປັນໄຂ້ຫວັດຕະຫລອດ. ດັ່ງນັ້ນ, ວິທີທີ່ຈະຊ່ວຍຫລຸດການແຜ່ກະຂາຍຂອງເຊື້ອພະຍາດທີ່ຈະເຂົ້າສູ່ຮ່າງກາຍລູກກໍຄື ການເຮັດຄວາມສະອາດມື ເຊິ່ງພໍ່ແມ່ຄວນລ້າງມືໃຫ້ສະອາດກ່ອນສຳຜັດລູກສະເໝີ.
2. ເຮັດຄວາມສະອາດເຄື່ອງໃຊ້ຂອງລູກ : ເຄື່ອງໃຊ້ສ່ວນໂຕ ລວມທັງເຄື່ອງຫລິ້ນທີ່ລູກມັກສຳຜັດຢູ່ຕະຫລອດ ພໍ່ແມ່ຄວນໝັ່ນເຮັດຄວາມສະອາດ ເພື່ອໃຫ້ລູກປອດໄພຈາກເຊື້ອພະຍາດຕ່າງໆທີ່ອາດຕິດມາຈາກເຄື່ອງໃຊ້ ຫລື ເຄື່ອງຫລິ້ນໃກ້ໂຕໄດ້ ຫລື ແມ່ນແຕ່ເຄື່ອງນຸ່ງຂອງພໍ່ແມ່ກໍຄວນສະອາດກ່ອນສຳຜັດໂຕລູກ, ບໍ່ຄວນຫລິ້ນກັບລູກທັນທີຫລັງຈາກກັບມາຈາກບ່ອນເຮັດວຽກ ເພາະພໍ່ແມ່ບໍ່ມີທາງຮູ້ເລີຍວ່ານຳເຄື່ອງນຸ່ງທີ່ນຸ່ງຢູ່ຈະມີເຊື້ອພະຍາດຢູ່ຫລາຍໜ້ອຍປານໃດ.
3. ໃຫ້ລູກກິນອາຫານທີ່ມີປະໂຫຍດ ແລະ ດື່ມນຳ້ອຸ່ນ : ອາຫານທີ່ມີປະໂຫຍດ ຍ່ອມສົ່ງຜົນໃຫ້ຮ່າງກາຍມີພູມຕ້ານທານສູງ ເຊິ່ງໃນເດັກນ້ອຍເກີດໃໝ່ຈົນເຖິງ 6 ເດືອນ ຄວນກິນນົມແມ່ ເນື່ອງຈາກເປັນອາຫານທີ່ຊ່ວຍປົກປ້ອງລູກຈາກອາການເຈັບປ່ວຍໄດ້ດີ. ໃນຂະນະລູກໄວເຕີບໃຫຍ່ຄວນກິນອາຫານທີ່ມີສານອາຫານຄົບທັງ 5 ໝວດ ແລະ ໝັ່ນດື່ມນຳ້ອຸ່ນເປັນປະຈຳ ຈະຊ່ວຍໃຫ້ຮ່າງກາຍສາມາດປັບໂຕກັບອາກາດພາຍນອກໄດ້ດີ.
4. ໝັ່ນໃຫ້ຮ່າງກາຍລູກອຸ່ນຢູ່ສະເໝີ : ເນື່ອງຈາກຜິວເດັກຈະມີຄວາມບອບບາງຫລາຍ ລວມທັງຊັ້ນໄຂມັນໃຕ້ຜິວໜັງກໍຍັງບໍ່ສາມາດເຮັດວຽກໄດ້ເຕັມທີ່ ດັ່ງນັ້ນ ພໍ່ແມ່ຈຶ່ງຄວນເຮັດໃຫ້ຮ່າງກາຍຂອງລູກອຸ່ນຢູ່ສະເໝີ ໂດຍການຫົ່ມຜ້າໜານຸ້ມ, ຄວນລະມັດລະວັງບໍ່ໃຊ້ຜ້າຊະນິດໜາຈົນເກີນໄປ ເພາະຈະເຮັດໃຫ້ລູກອຶດອັດບໍ່ສະບາຍໂຕ ແລະ ຍັງສ່ຽງຕໍ່ການເສຍຊີວິດກະທັນຫັນໄດ້ນຳ.
5. ເບິ່ງແຍງສຸຂະພາບຜິວຂອງລູກບໍ່ໃຫ້ແຫ້ງ – ຄັນ : ດັ່ງທີ່ພໍ່ແມ່ຮູ້ກັນດີວ່າອາກາດໃນຍາມໜາວຈະເຢັນ ແລະ ແຫ້ງເຊິ່ງມັກສົ່ງຜົນໃຫ້ຜິວລູກເກີດອາການຄັນ, ແຫ້ງແຕກ ຫລື ລອກເປັນເກັດໄດ້ງ່າຍ. ດັ່ງນັ້ນ, ຈຶ່ງຄວນອາບນຳ້ໃຫ້ລູກດ້ວຍນຳ້ອຸ່ນມື້ລະເທື່ອກໍພຽງພໍແລ້ວ ຕິດຕາມດ້ວຍການທາຄຣີມບຳລຸງຜິວສຳລັບເດັກນ້ອຍຫລັງອາບນຳ້ທັນທີ ເພື່ອຮັກສາຄວາມຊຸ່ມຊື່ນໃຫ້ແກ່ຜິວຂອງລູກ.