ທຣຳ ຊັບສິນຫລຸດລົງ 700 ລ້ານໂດລາ ຫລັງພົ້ນຕຳແໜ່ງປະທານາທິບໍດີ
ຂໍ້ມູນຈາກການຈັດອັນດັບມະຫາເສດຖີຂອງ Bloomberg Billionires Index ພົບວ່າ: ຊັບສິນຂອງອະດີດປະທານາທິບໍດີ ໂດນັລ ທຣຳ ຫລຸດລົງປະມານ 700 ລ້ານໂດລາສະຫະລັດ ເຫລືອ 2.300 ລ້ານໂດລາສະຫະລັດ ຫລັງກ້າວລົງຈາກຕຳແໜ່ງຜູ້ນຳອາເມລິກາ.
Bloomberg ວິເຄາະເອກະສານທາງການເງິນ ແລະ ເອກະສານອື່ນໆ ນັບແຕ່ເດືອນພຶດສະພາ 2016 – ມັງກອນ 2021 ເພື່ອຄິດໄລ່ຄວາມໝັ້ນຄົງກ່ອນ ແລະ ຫລັງດຳລົງຕຳແໜ່ງປະທານາທິບໍດີຂອງ ທຣຳ ພົບວ່າ: ໂຄວິດ-19 ສົ່ງຜົນກະທົບຕໍ່ຊັບສິນຂອງ ທຣຳ ຢ່າງໜັກ ບໍ່ວ່າຈະເປັນອາຄານສຳນັກງານ, ໂຮງແຮມ ແລະ ລີສອດໃນເຄືອ ຕ່າງກໍສູນເສຍລາຍໄດ້ ແລະ ມີມູນຄ່າຫລຸດລົງ.
Bloomberg ລະບຸວ່າ: ອະສັງຫາລິມະຊັບທາງການຄ້າມີອັດຕາປະມານ 3 ໃນ 4 ຂອງຊັບສິນທັງໝົດ ແລະ ມີມູນຄ່າຫລຸດລົງປະມານ 26% ໂດຍອາຄານສຳນັກງານທີ່ ທຣຳ ເປັນເຈົ້າຂອງ ຫລື ເປັນເຈົ້າຂອງຮ່ວມມີມູນຄ່າຫລຸດລົງ ເນື່ອງຈາກຄົນສ່ວນຫລາຍຫັນມາເຮັດວຽກຢູ່ເຮືອນ ແລະ ອາດຈະເປັນແບບນີ້ໄປອີກໄລຍະໜຶ່ງ.
ນອກຈາກນີ້, ທຣຳ ຍັງເປັນເຈົ້າຂອງ, ເຂົ້າໄປບໍລິຫານຈັດການ ຫລື ອະນຸຍາດໃຫ້ໃຊ້ຊື່ຂອງຕົນເອງໃນໂຮງແຮມ ແລະ ລີສອດອີກຫລາຍແຫ່ງ ລວມທັງສະໜາມກ໊ອຟອີກ 19 ແຫ່ງ.
ເຖິງວ່າການອອກຮອບຕີກ໊ອຟຈະເປັນກິດຈະກຳຍອດນິຍົມໃນໄລຍະໂຄວິດ-19 ລະບາດ, ແຕ່ສະໜາມກ໊ອຟ 2 ແຫ່ງຂອງ ທຣຳ ໃນສະກອດແລນປະສົບສະພາບຂາດລາຍໄດ້ຢ່າງຕໍ່ເນື່ອງ ທັງຍັງຜະເຊີນຜົນກະທົບຫລັງຈາກຜູ້ສະໜັບສະໜູນ ທຣຳ ບຸກອາຄານລັດຖະສະພາ ໃນເດືອນມັງກອນຜ່ານມາ ໂດຍສະມາຄົມນັກກ໊ອຟມືອາຊີບ (PGA) ຂອງອາເມລິກາຢຸດຂໍ້ຕົກລົງທີ່ຈະຈັດການແຂ່ງຂັນກ໊ອຟປີ 2022 ຢູ່ສະໜາມກ໊ອຟໃນນິວເຈີຊີຂອງ ທຣຳ ເນື່ອງຈາກກັງວົນວ່າຍີ່ຫໍ້ PGA ຈະເສຍພາບພົດ.
ເຊັ່ນດຽວກັບເຮືອບິນຂອງ ທຣຳ ລວມທັງໂບອິ້ງ 757 ທີ່ມີມູນຄ່າຫລຸດລົງຕໍ່ເນື່ອງ ເມື່ອປີ 2015 ເຮືອບິນ 7 ລຳຂອງ ທຣຳ ມີມູນຄ່າປະມານ 59 ລ້ານໂດລາສະຫະລັດ ຂະນະທີ່ໃນປີ 2020 ເຮືອບິນ 5 ລຳມີມູນຄ່າ 6,5 ລ້ານໂດລາສະຫະລັດ.
ເຖິງຢ່າງໃດກໍດີ, ໃນຖານະອະດີດປະທານາທິບໍດີ ທຣຳ ສາມາດເຊັນສັນຍາກັບສື່ເຮັດສາລະຄະດີ ຫລື ໜັງສືເຊັ່ນ: ບັນທຶກຄວາມຊົງຈຳຫລັງການຮັບຕຳແໜ່ງປະທານາທິບໍດີ ເພື່ອທົດແທນຄວາມໝັ້ນຄົງທີ່ຫາຍໄປ ເຊັ່ນອະດີດປະທານາທິບໍດີ ບາຣັກ ໂອບາມາ ແລະ ນາງ ມິເຊລ ອະດີດແມ່ຍິງໝາຍເລກໜຶ່ງ ເຊັນສັນຍາມູນຄ່າ 65 ລ້ານໂດລາສະຫະລັດ ສຳລັບບັນທຶກຄວາມຊົງຈຳ, ສ່ວນອະດີດປະທານາທິບໍດີ ບິລ ຄລິນຕັນ ໄດ້ຮັບ 15 ລ້ານໂດລາສະຫະລັດ ສຳລັບໜັງສືເມື່ອປີ 2004.
