ແກ້ອາການເບື່ອການຮຽນ ໃຫ້ພ້ອມກັບມາຕັ້ງໃຈຮຽນກ່ວາເກົ່າ
March 20, 2021 - 10:43 AM
ແນ່ນອນວ່າຫລາຍໆຄົນຕ້ອງເຄີຍມີຄວາມຮູ້ສຶກເບື່ອເລື່ອງການຮຽນ ຫລື ຮູ້ສຶກໝົດພະລັງໃນການຮຽນໄປແດ່ ໃນຊີວິດນັກຮຽນ ຫລື ຊີວິດນັກສຶກສາ ເຊິ່ງມັນບໍ່ແມ່ນເລື່ອງແປກທີ່ຈະມີຄວາມຮູ້ສຶກແບບນີ້ ອາການແບບນີ້ມັນອາດຈະມາຈາກສະພາບແວດລ້ອມອ້ອມໂຕເຮົາກໍເປັນໄດ້. ດັ່ງນັ້ນ, ມື້ນີ້ພວກເຮົາຈຶ່ງນຳເອົາວິທີແກ້ອາການເບື່ອການຮຽນ ໃຫ້ພ້ອມກັບມາມີຄວາມຕັ້ງໃຈຮຽນຫລາຍກ່ວາເກົ່າມາແນະນຳ.
- ນຶກເຖິງເຫດຜົນທີ່ເຮັດໃຫ້ຢາກຮຽນ : ບາງເທື່ອການຕັ້ງໃຈຮຽນຫລາຍໆອາດເຮັດໃຫ້ເຮົາຮູ້ສຶກເຄັ່ງຄຽດ ແລະ ເຮັດໃຫ້ເຮົາລືມຈຸດປະສົງຫລັກໃນການຕັ້ງໃຈຮຽນຈົນຮູ້ສຶກເບື່ອ, ເຄັ່ງຄຽດ ຕະຫລອດຮອດການໝົດພະລັງໃນການຮຽນກໍມີ. ດັ່ງນັ້ນ, ລອງຄິດຍ້ອນກັບໄປເບິ່ງວ່າເປັນຫຍັງເຮົາຈຶ່ງຢາກຮຽນ ເຊັ່ນ : ເປົ້າໝາຍຂອງເຮົາແມ່ນຢາກມີອາຊີບນີ້ ຈຶ່ງເຮັດໃຫ້ເຮົາຕ້ອງຕັ້ງໃຈຮຽນເພື່ອກຽມໂຕເພື່ອອະນາຄົດ ເປັນຕົ້ນ.
- ຢຸດອ່ານໜັງສື : ຖ້າເຮົາເບິ່ງວ່າມັນເປັນໜ້າທີ່ໆຈະຕ້ອງຮຽນ, ຕ້ອງອ່ານເພື່ອທີ່ຈະເຮັດວຽກບ້ານ, ຕ້ອງອ່ານຍ້ອນຈະສ້າງຄະແນນ ມັນກໍອາດຈະເປັນສາເຫດທີ່ເຮັດໃຫ້ເຮົາຮູ້ສຶກເບື່ອ ແລະ ໝົດພະລັງກັບການຮຽນໄດ້. ສະນັ້ນ, ເຮົາຄວນຈະພັກຜ່ອນ, ລອງໄປຫາຫຍັງທີ່ເຮົາມັກເຮັດໃຫ້ເຕັມທີ່ກ່ອນ ບໍ່ວ່າຈະແມ່ນຫລິ້ນເກມ, ເບິ່ງຮູບເງົາ ຫລື ຫົດນ້ຳຕົ້ນໄມ້ ເພື່ອຕື່ມແຮງບັນດານໃຈ, ຕື່ມພະລັງໃຫ້ຕົນເອງກ່ອນ ຄ່ອຍກັບມາອ່ານໜັງສືອີກຄັ້ງ.
- ເບິ່ງຜ່ານຈຸດທີ່ບໍ່ຈຳເປັນ : ຄວາມເບື່ອ ຄວາມໜ່າຍນັ້ນບາງເທື່ອກໍມາກັບສະພາບແວດລ້ອມ ເຊັ່ນ : ໝູ່, ອາຈານ ເຊິ່ງບາງເລື່ອງນັ້ນອາດຈະມາຈາກອັກຄະຕິ ຫລື ຄວາມຮູ້ສຶກສ່ວນໂຕຂອງເຮົາເອງ ຖ້າເຮົາຮູ້ຈັກເປີດໃຈ ເບິ່ງໂລກໃນແງ່ດີ ເບິ່ງໂລກໃນແງ່ບວກ ອັນໃດທີ່ຄິດ ຫລື ສົນໃຈແລ້ວມັນບໍ່ຊ່ວຍໃຫ້ຄວາມຄິດຂອງເຮົາດີຂຶ້ນ ກໍເບິ່ງຜ່ານມັນໄປ ປ່ອຍມັນໄປ ເອົາເວລາທີ່ມີຢູ່ມາຈົດຈໍ່ກັບຈຸດທີ່ຄວນຈະສົນໃຈ ເພື່ອເຮັດໃຫ້ການຮຽນຂອງເຮົາດີຂຶ້ນຈະດີກ່ວາ.
