ເຄັດລັບຝຶກສະໝອງໃຫ້ເປັນຄົນຄວາມຈື່ຈຳດີ

ຕອນເຊົ້າກ່ອນຈະອອກໄປເຮັດວຽກ ຫລື ອອກໄປໂຮງຮຽນ ການຫລົງລືມສິ່ງຂອງບາງຢ່າງທຸກຄົນເຄີຍເປັນກັນຢູ່ ອາການຫລົງໆລືມໆ ທ່ານອາດຈະເບິ່ງວ່າເປັນເລື່ອງປົກກະຕິ, ແຕ່ຖ້າຫາກທ່ານມີອາການຫລົງລືມຢູ່ຕະຫລອດ ອາດບໍ່ເປັນຜົນດີໃນການໃຊ້ຊີວິດປະຈຳວັນຂອງທ່ານແນ່ນອນ. ມື້ນີ້ພວກເຮົາຈຶ່ງນຳເອົາວິທີຝຶກສະໝອງໃນຕອນເຊົ້າໃຫ້ເປັນຄົນຄວາມຈື່ຈຳດີມາແນະນຳ ດັ່ງຕໍ່ໄປນີ້ :

1. ເວົ້າກັບຕົນເອງກ່ອນລຸກອອກຈາກບ່ອນນອນທຸກເຊົ້າ : ປຸກສະໝອງ ໂດຍການເວົ້າທັກທາຍສະບາຍດີຍາມເຊົ້າ “Morning” ກັບຕົນເອງຕອນມືນຕາຕື່ນນອນຂຶ້ນມາ ເປັນການເປີດສະວິດໄຟໃຫ້ກັບສະໝອງໂດຍການສື່ສານ. ການເວົ້າກັບຕົນເອງແບບນີ້ຈະຊ່ວຍກະຕຸ້ນສະໝອງຂອງທ່ານໃຫ້ເຮັດວຽກໄດ້ດີຂຶ້ນໃນຍາມເຊົ້າ.
2. ບອກກັບຕົນເອງວ່າ ມື້ນີ້ຕ້ອງເຮັດຫຍັງແດ່ : ໃນຕອນເຊົ້າທ່ານຄວນບອກຕົນເອງວ່າມື້ນີ້ທ່ານຕ້ອງເຮັດຫຍັງແດ່ ເປັນການເຕືອນຄວາມຈຳ ແລະ ກຽມຄວາມພ້ອມໃນການເຮັດພາລະກິດຕ່າງໆ ໃຫ້ບອກກັບຕົນເອງທຸກເຊົ້າວ່າ : “ມື້ນີ້ເຮົາຕ້ອງເຮັດຫຍັງແດ່” ຫລື ຈະຂຽນເປັນລາຍການໄວ້ໃນປື້ມບັນທຶກບອກກັບຕົນເອງ ຖ້າເຮັດແບບນີ້ໃນທຸກໆມື້ຢ່າງສະໝໍ່າສະເໝີ ທ່ານກໍຈະຫລຸດອາການຫລົງໆລືມໆຂອງທ່ານໄດ້ ແລະ ຍັງເຮັດໃຫ້ສິ່ງທີ່ທ່ານຈະເຮັດສຳເລັດໄດ້ຢ່າງແນ່ນອນ.
3. ໃຊ້ມືເບື້ອງທີ່ບໍ່ຖະໜັດຖູແຂ້ວ : ເມື່ອທ່ານໃຊ້ມືເບື້ອງທີ່ບໍ່ລຶ້ງຖູແຂ້ວ ຮ່າງກາຍຂອງທ່ານຈະໃຊ້ພະລັງງານສະໝອງຫລາຍກ່ວາປົກກະຕິ 1,6 ເທົ່າ ສະນັ້ນ ການໃຊ້ມືເບື້ອງທີ່ບໍ່ລຶ້ງສາມາດເປັນການກະຕຸ້ນສະໝອງໃຫ້ຕື່ນໂຕ ແລະ ຍັງເຮັດໃຫ້ທ່ານມີສະມາທິກັບການຈົດຈໍ່ການເຄື່ອນໄຫວຂອງມື ແລະ ປາກ ເປັນການປຸກສະໝອງດ້ານການເຄື່ອນໄຫວໄດ້ດີຂຶ້ນ.
4. ສຳຫລວດຕົນເອງຢູ່ໜ້າແວ່ນ : ໃນຕອນເຊົ້າເມື່ອທ່ານເຮັດທຸກຢ່າງແລ້ວໝົດແລ້ວ ກ່ອນອອກຈາກເຮືອນໄປເຮັດວຽກ ຫລື ເຮັດພາລະກິດ ໃຫ້ພາຕົນເອງໄປຢູ່ໜ້າແວ່ນແຍງເພື່ອສຳຫລວດຮ່າງກາຍຕົນເອງ ແລະ ເຄື່ອນໄຫວໃບໜ້າ ໂດຍການຍິ້ມ, ຫົວ ຫລື ສະແດງອາລົມອອກມາ ຈະເປັນການຊ່ວຍຜ່ອນຄາຍກ້າມຊີ້ນເທິງໃບໜ້າ ແລະ ຍັງປຸກສະໝອງດ້ານອາລົມໃຫ້ຮູ້ສຶກຕື່ນໂຕ ພ້ອມຖາມຕົນເອງວ່າ ລືມຫຍັງບໍ່ ? ແລະ ກວດເຊັກສິ່ງຂອງຕ່າງໆກ່ອນເດີນທາງອອກຈາກເຮືອນ.

5. ນອນຫລັບຢ່າງມີຄຸນນະພາບ : ຂໍ້ນີ້ສຳຄັນຫລາຍ ການນອນຫລັບຢ່າງມີຄຸນນະພາບເຮັດໃຫ້ທ່ານບໍ່ຕ້ອງຕື່ນມາພົບກັບມື້ທີ່ຟ້າວຟັ່ງ ເພາະການນອນຫລັບຢ່າງມີຄຸນນະພາບ ເຮັດໃຫ້ເວລາທ່ານຕື່ນນອນຂຶ້ນມາສະໝອງຂອງທ່ານຈະປອດໂປ່ງແຈ່ມໃສ ພ້ອມເຮັດຕາມຂັ້ນຕອນຂ້າງເທິງ ເມື່ອສະໝອງໄດ້ພັກຜ່ອນຢ່າງເຕັມທີ່ ສະໝອງຂອງທ່ານກໍຈະຈື່ຈຳໄດ້ດີຂຶ້ນ ການນອນຫລັບຢ່າງມີຄຸນນະພາບຈຶ່ງເປັນສິ່ງສຳຄັນສຳລັບການແກ້ອາການຫລົງໆລືມໆໄດ້.