ອາຍຸ 30+ ແຕ່ຢາກໜ້າອ່ອນກ່ວາອາຍຸຄືເດັກນ້ອຍ ຕ້ອງໃຊ້ເຄັດລັບຕໍ່ໄປນີ້

ປັດຈຸບັນ ແມ່ຍິງອາຍຸ 30+ ຫລື 30 ປີຂຶ້ນໄປ ຫັນມາເບິ່ງແຍງດູແລເອົາໃຈໃສ່ສຸຂະພາບ ແລະ ຄວາມງາມກັນຫລາຍຂຶ້ນ ບໍ່ດັ່ງນັ້ນອາຍຸຈະບໍ່ເປັນພຽງໂຕເລກອີກຕໍ່ໄປ. ມື້ນີ້ພວກເຮົາຈຶ່ງມີເຄັດລັບເຮັດໃຫ້ໜ້າເບິ່ງອ່ອນກ່ວາອາຍຸມາແນະນຳ ດັ່ງນີ້ :

1. ອອກກຳລັງກາຍຢ່າງສະໝໍ່າສະເໝີ : ຢາກຈະໜ້າອ່ອນກ່ວາອາຍຸກໍຕ້ອງເສຍເຫື່ອກັນແດ່ ເພາະການອອກກຳລັງກາຍອາທິດລະ 3 – 4 ເທື່ອ, ເທື່ອລະ 15 – 30 ນາທີ ນອກຈາກຈະຊ່ວຍໃຫ້ຮ່າງກາຍແຂງແຮງ, ຊ່ວຍສ້າງກ້າມຊີ້ນໃຫ້ຮ່າງກາຍຊ່ວຍເຜົາຜານພະລັງງານບໍ່ໃຫ້ຕຸ້ຍແລ້ວ ຍັງຊ່ວຍໃຫ້ສຸຂະພາບຜິວສົດໃສ ແລະ ບໍ່ຫ່ຽວຍານນຳອີກ.
2. ພັກຜ່ອນໃຫ້ພຽງພໍ : ການພັກຜ່ອນຢ່າງໜ້ອຍໃຫ້ຄົບ 8 ຊົ່ວໂມງຕໍ່ມື້ເປັນຢ່າງໜ້ອຍ ກໍມີສ່ວນຊ່ວຍຫລຸດການເກີດຮອຍຫ່ຽວຍານເທິງຜິວໜັງໄດ້ ເພາະໃນຕອນກາງຄືນຜິວຂອງທ່ານຈະຟື້ນຟູຕົນເອງໃນຂະນະນອນຫລັບ ຖ້າພັກຜ່ອນນອນຫລັບໃຫ້ພຽງພໍ ຜິວກໍຈະບໍ່ຫ່ຽວຍານ.
3. ເລືອກກິນອາຫານທີ່ມີປະໂຫຍດ : ອາຫານກໍມີສ່ວນເຮັດໃຫ້ງາມຈາກພາຍໃນສູ່ພາຍນອກໄດ້ ເພາະການເລືອກກິນອາຫານທີ່ມີປະໂຫຍດນອກຈາກຈະເຮັດໃຫ້ສຸຂະພາບດີແລ້ວ ຍັງມີຜົນເຮັດໃຫ້ຜິວສົດໃສໄດ້ ເຊັ່ນ : ການເລືອກກິນຜັກ – ໝາກໄມ້ທີ່ມີສານຕ້ານອະນຸມູນອິດສະລະ ແລະ ມີວິຕາມິນ C ກໍຈະຊ່ວຍໃຫ້ຫລຸດຮອຍຫ່ຽວຍານ ຫລື ຮອຍຕີນກາທີ່ເກີດຂຶ້ນຕາມໄວ ແລະ ຊ່ວຍບຳລຸງຜິວໃຫ້ສົດໃສ. ຜັກທີ່ແນະນຳໃຫ້ກິນແມ່ນຫົວກະຫລົດ, ໝາກເລັ່ນ, ຜັກຫົມ. ສ່ວນໝາກໄມ້ແມ່ນໃຫ້ເລືອກກິນໝາກເບີຣີ, ສະຕໍເບີຣີ, ແຄນເບີຣີ, ໝາກຫຸ່ງ, ໝາກແອັບເປິ້ນ, ໝາກພິລາ, ໝາກສີດາ, ໝາກລະແຊັງ, ໝາກກ້ວຍ, ໝາກມ່ວງ, ໝາກກີວີ່ ແລະ ໝາກໂມ ເຊິ່ງຜັກ ແລະ ໝາກໄມ້ເຫລົ່ານີ້ຈະມີສານຕ້ານອະນຸມູນອິດສະລະ ແລະ ອຸດົມໄປດ້ວຍວິຕາມິນ C, ແຮ່ທາດຕ່າງໆທີ່ຊ່ວຍບຳລຸງຜິວບໍ່ໃຫ້ເຖົ້າກ່ອນໄວ.
4. ກຳຈັດຄວາມເຄັ່ງຄຽດ : ຄວາມເຄັ່ງຄຽດເປັນໂຕບັນຫາຫລັກເລີຍກໍເວົ້າໄດ້ ເຮັດໃຫ້ໜ້າເຖົ້າໄວຍ້ອນຄິດຫລາຍ ຈົນເຮັດໃຫ້ຮ່າງກາຍບໍ່ສົດຊື່ນ ອາລົມເສົ້າໝອງນີ້ເຮັດໃຫ້ໂຊມຢ່າງໜັກ. ດັ່ງນັ້ນຄວນຫາກິດຈະກຳຄາຍຄຽດເຮັດແດ່ອາທິດລະ 1 – 2 ເທື່ອ ເຊັ່ນ : ການເບິ່ງຮູບເງົາຕະຫລົກ, ຟັງເພງ, ການຊັອບປິ້ງ ຫລື ການໄປທ່ອງທ່ຽວຕາມສະຖານທີ່ທຳມະຊາດເພື່ອຜ່ອນຄາຍກໍຊ່ວຍໄດ້.
5. ດື່ມນຳ້ບໍລິສຸດໃຫ້ຫລາຍກ່ວານຳ້ສີ : ແນ່ນອນວ່າການດື່ມນຳ້ບໍລິສຸດນັ້ນຍ່ອມມີປະໂຫຍດກ່ວານຳ້ສີຕ່າງໆ ເຊັ່ນ : ຊາ, ກາເຟ ຫລື ນຳ້ອັດລົມ ສິ່ງເຫລົ່ານັ້ນຈະທຳຮ້າຍທັງສຸຂະພາບ ແລະ ເຮັດໃຫ້ຜິວບໍ່ງາມໄປນຳ. ການດື່ມນຳ້ສະອາດຢ່າງໜ້ອຍມື້ລະ 8 ຈອກ ຫລື ໃຫ້ພຽງພໍທີ່ຮ່າງກາຍຕ້ອງການມັນດີກ່ວາ ທັງຍັງຊ່ວຍໃຫ້ຜິວມີຄວາມຊຸ່ມຊື່ນ, ບໍ່ແຫ້ງແຕກ. ຕື່ນເຊົ້າມາຕ້ອງດື່ມນຳ້ກ່ອນ 1 ຈອກທຸກເຊົ້າ ຈະຊ່ວຍໃຫ້ຮ່າງກາຍສົດຊື່ນ ແລະ ຊ່ວຍກະຕຸ້ນການຂັບຖ່າຍໃນຕອນເຊົ້າໄດ້ດີອີກທາງໜຶ່ງ.
6. ປ່ຽນແປງຮູບລັກພາຍນອກຫລຸດອາຍຸ : ນອກຈາກງາມຈາກພາຍໃນ ຄື ການພັກຜ່ອນ, ເຮັດຈິດໃຈໃຫ້ຜ່ອງໃສ, ເລືອກກິນອາຫານທີ່ມີປະໂຫຍດແລ້ວ ສິ່ງທີ່ເຮັດໃຫ້ເບິ່ງອ່ອນກ່ວາອາຍຸ ຍັງເປັນບ່າວສາວອີກຢ່າງໜຶ່ງກໍຄື ການປ່ຽນແປງພາຍນອກຮ່າງກາຍກັນແດ່ ເຊັ່ນ : ການປ່ຽນແປງຮູບແບບການແຕ່ງໂຕ ກໍເປັນສິ່ງທີ່ປ່ຽນແລ້ວຊ່ວຍຫລຸດອາຍຸລົງໄດ້, ການແຕ່ງໂຕທີ່ຫັນມາເລືອກເຄື່ອງນຸ່ງທີ່ມີສີສັນສົດໃສ, ນຸ່ງໂສ້ງຢີນແດ່ ຫລື ຈະນຸ່ງຊຸດກະໂປ່ງໜ້າຮັກຫລຸດອາຍຸກໍໄດ້, ແຕ່ເລືອກໃຫ້ເຂົ້າກັບສະຖານະການນຳ. ສ່ວນການແຕ່ງໜ້າ ລອງປ່ຽນການແຕ່ງໜ້າແບບເກົ່າ ຈາກຄິ້ວກົ່ງ ຫລື ຄິ້ວທີ່ຮົກໆ ປ່ຽນເປັນຄິ້ວຊື່ໆຕາມແບບເກົາຫລີ ຫລື ຈັດແຕ່ງໃຫ້ມັນໄດ້ຮູບຊົງຫລາຍຂຶ້ນກ່ວາເກົ່າ ບອກເລີຍວ່າຊີວິດປ່ຽນຫລາຍຍ້ອນໜ້າອ່ອນລົງກ່ວາອາຍຸ ຫລື ໃຜທີ່ບໍ່ເຄີຍແຕ່ງໜ້າກໍລອງມາແຕ່ງເບິ່ງແດ່ ໃຫ້ໜ້າຕາສົດໃສແດ່ ເປັນສະເໜ່ອີກຢ່າງໜຶ່ງທີ່ແມ່ຍິງທຸກຄົນຄວນມີ. ນອກຈາກເຄື່ອງນຸ່ງ, ໜ້າຕາແລ້ວ ມາຕໍ່ໂດຍການປ່ຽນຊົງຜົມ ລອງຕັດຜົມສັ້ນເບິ່ງ ຈະຊ່ວຍໃຫ້ເບິ່ງອາຍຸນ້ອຍລົງໄດ້ຫລາຍຄືກັນ.