ພາລະກິດຂອງພັກຍາມໃດກໍຕິດພັນກັບພາລະກິດຂອງຊາດ
ໂດຍ: ທິດກໍ່າ
ວັນທີ 22 ເດືອນມີນາ ເປັນວັນສ້າງຕັ້ງພັກປະຊາຊົນປະຕິວັດລາວ. ມາຮອດປີ 2021 ນີ້ ພັກເຮົາມີອາຍຸໄດ້ 66 ປີເຕັມ (22/3/1955-22/3/2021). ໃນໂອກາດວັນສ້າງຕັ້ງພັກປີນີ້ຍິ່ງເປັນປີສຳຄັນ ແລະ ມີສັນຍາລັກສອງຢ່າງ ຄືເປັນມື້ເປີດສາກກອງປະຊຸມຄັ້ງປະຖົມຂອງສະພາແຫ່ງຊາດ ຊຸດທີ IX ເຊິ່ງໃນກອງປະຊຸມຄັ້ງນີ້ຈະໄດ້ພິຈາລະນາຮັບຮອງເອົາຫລາຍບັນຫາທີ່ພົວພັນເຖິງຊາຕາກຳຂອງປະເທດຊາດ ເປັນຕົ້ນຮັບຮອງເອົາການແຕ່ງຕັ້ງປະທານປະເທດ, ປະທານສະພາແຫ່ງຊາດ, ຮັບຮອງເອົາການແຕ່ງຕັ້ງນາຍົກລັດຖະມົນຕີ, ການປະກອບບຸກຄະລາກອນການນຳຂອງລັດຖະບານໃນແຕ່ລະຂົງເຂດວຽກງານໃນຊຸດທີ IX, ຮັບຮອງເອົາການປະກາດແຕ່ງຕັ້ງປະທານໄອຍະການສູງສຸດ ແລະ ປະທານສານສູງສຸດ. ນອກຈາກນັ້ນແລ້ວ ໃນວາລະກອງປະຊຸມດັ່ງກ່າວຍັງຈະໄດ້ຮັບຮອງເອົາແຜນພັດທະນາເສດຖະກິດ-ສັງຄົມ ຄັ້ງທີ IX ຂອງລັດຖະບານຊຸດທີ IX (2021-2025) ຢ່າງເປັນເອກະສັນ.
ແຕ່ແນວໃດກໍຕາມ, ວັນທີ 22 ມີນາ 2021 ປີນີ້ຖືເປັນວັນສ້າງຕັ້ງພັກຄົບຮອບ 66 ປີ. ຕະຫລອດໄລຍະ 66 ປີແຫ່ງພາລະກິດນຳພາຕໍ່ສູ້ເພື່ອປົດປ່ອຍປະເທດຊາດກ້ວສູ່ໄລຍະສ້າງສາພັດທະນາປະເທດຊາດ ພັກເຮົາຍາມໃດກໍໄດ້ເດັດດ່ຽວໜຽວແໜ້ນສາມາດບັນລຸເປົ້່າໝາຍຕາມອຸດົມການຂອງພັກວາງອອກຄື: ສາມາດນຳພາປົດປ່ອຍປະເທດຊາດອອກຈາກແອກຄອບຄອງຂອງຈັກກະພັດ ແລະ ລູກແແຫລ່ງຕີນມືໄດ້ຢ່າງຊິ້ນເຊີງ. ຈາກນັ້ນກໍໄດ້ນຳພາສ້າງຕັ້ງປະເທດຊາດໃໝ່ ຄືປະເທດ ສາທາລະນະລັດ ປະຊາທິປະໄຕປະຊາຊົນລາວ ອັນເປັນລະບອບໃໝ່ປະຊາທິປະໄຕປະຊາຊົນໃນປີ 1975 ຢ່າງສົມບູນແບບ. ສ່ວນໄລຍະທີສອງນັ້ນ ກໍແມ່ນນຳພາປົກປັກຮັກສາ ແລະ ສ້າງສາພັດທະນາປະເທດຊາດກ້າວຂຶ້ນສັງຄົມນິຍົມຕາມອຸດົມການຂອງພັກ ແລະ ຄວາມຫວັງຂອງປະເທດຊາດຢ່າງໜັກແໜ້ນ.
ສະຫລຸບລວມແລ້ວ ຕະຫລອດໄລຍະ 66 ປີແຫ່ງການນຳພາຕໍ່ສູ້ ກໍຄືນຳພາສ້າງສາພັດທະນາປະເທດຊາດ ພັກເຮົາໄດ້ອຸທິດຕົນເຮັດທຸກສິ່ງຢ່າງເພື່ອການປະຕິວັດ, ເພື່ອປະເທດຊາດ ແລະ ເພື່ອປະຊາຊົນ. ໃນໄລຍະນຳພາການຕໍ່ສູ້ເພື່ອປົດປ່ອຍປະເທດຊາດນັ້ນ ພັກເຮົາໄດ້ເປັນແກນກາງໃນການວາງຍຸດທະສາດ ນັບແຕ່ກອງປະຊຸມໃຫຍ່ຄັ້ງທີໜຶ່ງຂອງພັກ (22/3-6/4/1955) ຈົນຮອດກອງປະຊຸມໃຫຍ່ຄັ້ງທີສອງ (3-6/2/1972) ເຊິ່ງໄລຍະນັ້ນເປັນໄລຍະແຫ່ງການນຳພາການຕໍ່ສູ້ປະຕິວັດຢ່າງເດັດດ່ຽວຂ້ຽວຂາດເອົາເປັນເອົາຕາຍ ທັງເສຍສະຫລະເລືອດເນື້ອຂອງບັນດານັກຮົບປະຕິວັດ, ແຕ່ກໍໄດ້ຮັບໄຊຊະນະຢ່າງໃຫຍ່ຫລວງໃນທຸກບັ້ນຮົບ ບໍ່ວ່າໃນດ້ານການເມືອງ ແລະ ການທະຫານ ສາມາດຍາດເອົາເອົາໄຊຊະນະຈກຈັກກະພັດສອງໂຕໃຫຍ່ ຄືຈັກກະພັດຝຣັ່ງ ແລະ ອາເມລິກາ. ຜ່ານການນຳພາຂະບວນການຕໍ່ສູ້ເປັນເວລາຍາວນານເຖິງ 30 ກວ່າປີ ຈຶ່ງສາມາດປົດປ່ອຍປະເທດຊາດໄດ້ຢ່າງສົມບູນ. ນີ້ຄືໝາກຜົນລວມຍອດແຫ່ງໄຊຊະນະໃນການນຳພາການປະຕິວັດປົດປ່ອຍຊາດອອກຈາກການຄອບຄອງຂອງສັເຕູຜູ້ຮຸກຮານ.
ສ່ວນໄລຍະນຳພາການປົກປັກຮັກສາ ແລະ ສ້າງສາປະເທດຊາດນັ້ນ ແມ່ນນັບແຕ່ກອງປະຊຸມໃຫຍ່ຂອງພັກຄັ້ງທີ III (27-30/4/1982) ຫາຄັ້ງທີ XI (13-15/1/2021) ເປັນໄລຍະທີ່ພັກເຮົາໄດ້ປັບປ່ຽນແນວທາງ, ຍຸດທະສາດໃນການປົກປັກຮັກສາໝາກຜົນຂອງການປະຕິວັດ ແລະ ທັງສ້າງສາພັດທະນາປະເທດຊາດ. ສິ່ງທີ່ສະແດງໃຫ້ເຫັນຢ່າງໂດດເດັ່ນໃນການວາງແນວທາງຂອງພັກໃນຊ່ວງໄລຍະປົກປັກຮັກສາພັດທະນາປະເທດຊາດນັ້ນກໍຄື ການປະຕິວັດ 3 ປະການ ແລະ ການວາງແນວທາງປ່ຽນແປງໃໝ່ ໂດຍຫັນເອົາປະເທດຊາດກ້າວສູ່ຍຸກເສດຖະກິດຕະຫລາດດ້ວຍການລົງທຶນຈາກພາຍໃນ ແລະ ພາຍນອກຢ່າງກວ້າງຂວາງ.
ຕະຫລອດໄລຍະ 45 ປີແຫ່ງການປົກປັກຮັກສາ ແລະ ສ້າງສາປະເທດຊາດ ພັກເຮົາໄດ້ຜ່ານຂະບວນວິວັດແຫ່ງການປ່ຽນແປງຂອງໂລກໄດ້ຢ່າງລົງຕົວ ແລະ ສາມາດນຳພາປະເທດຊາດກ້າວສູ່ຄວາມຈະເລີນໃນຍຸກໃໝ່ສະໄໝໃໝ່. ຍ້ອນການນຳພາທີ່ສະຫລາດສ່ອງໃສຂອງພັກໄດ້ວາງແນວທາງຍຸດທະສາດໃນການສ້າງສາພັດທະນາປະເທດຊາດໃນແຕ່ໄລຍະໃຫ້ສອດຄ່ອງກັບສະພາບຄວາມເປັນຈິງຢູ່ພາຍໃນ ແລະ ພາຍນອກ ຈຶ່ງເຮັດໃຫ້ ສປປ ລາວ ຂອງພວກເຮົາກ້າວສູ່ຄວາມຈະເລີນຮຸ່ງເຮືອງໄປໜ້າຢ່າງບໍ່ຢຸດຢັ້ງ. ເພາະສະນັ້ນ ຈຶ່ງເວົ້າໄດ້ວ່າ ພາລະກິດຂອງພັກຍາມໃດກໍຕິດພັນກັບພາລະກິດຂອງຊາດຢ່າງສະໜິດແໜ້ນ ແລະ ບໍ່ສາມາດແຍກຕົວອອກຈາກກັນໄດ້ຢ່າງເດັດຂາດ.
