ຍີ່ປຸ່ນຍົກເລີກພາວະສຸກເສີນໃນນະຄອນ ໂຕກຽວ ແລ້ວ

ສຳນັກຂ່າວຕ່າງປະເທດລາຍງານເມື່ອວັນທີ 22 ມີນານີ້ ໃຫ້ຮູ້ວ່າ ຍີ່ປຸ່ນ ໄດ້ຍົກເລີກພາວະສຸກເສີນໃນນະຄອນໂຕກຽວ ແລະ ແຂວງໃກ້ຄຽງ ຂະນະທີ່ຍັງພົບຜູ້ຕິດເຊື້ອໃໝ່ຢ່າງຕໍ່ເນື່ອງ ຜູ້ຊ່ຽວຊານມີຄວາມເປັນຫວ່ງ ໄວຣັດ ຈະລະບາດຮອບໃໝ່ອີກຄັ້ງ.

ເວບໄຊ ເຈເປນ ທາມ ລາຍງານວ່າ ຍີ່ປຸ່ນ ຍົກເລີກພາວະສຸກເສີນໃນນະຄອນໂຕກຽວ ແລະ ພື້ນທີ່ໃກ້ຄຽງ ມີຜົນໃນວັນທີ 22 ມີນານີ້ ຫຼັງທ່ານນາຍົກລັດຖະມົນຕີຂອງຍີ່ປຸ່ນ ໂຢຊີຮິ ເດະຊູກະ ໄດ້ປະກາດຍົກເລີກການບັງຄັບໃຊ້ພາວະສຸກເສີນໃນນະຄອນໂຕກຽວ ແລະ ແຂວງໃກ້ຄຽງອີກ 3 ແຫ່ງໄດ້ແກ່ ແຂວງ ດານາງາວະ, ໄຊຕາມະ, ແລະ ຊີບະ ເພື່ອຫຼຸດຜົນກະທົບຕໍ່ທຸລະກິດໃນປະເທດ ແລະ ເດີນໜ້າເສດຖະກິດຂອງຍີ່ປຸ່ນ ດ້ານລັດຖະບານໄດ້ຂໍຄວາມຮ່ວມມືໃຫ້ຮ້ານອາຫານປິດໃນເວລາ 20:00 ໂມງ ແລະ ປະຕິບັດຕາມມາດຕະການຄວບຄຸມການແພ່ລະບາດຂອງໂຄວິດ-19 ຢ່າງເຄັ່ງຄັດ.

ຂະນະດຽວກັນຜູ້ຊ່ຽວຊານ ດ້ານສາທາລະນະສຸກ ໄດ້ສະແດງຄວາມກັງວົນວ່າ ອາດຈະເກີດການແພ່ລະບາດຮອບໃໝ່ ຫຼັງຍົກເລີກການສຸກເສີນ ເນື່ອງຈາກພົບຄວາມລະຫຼວມໃນການປະຕິບັດມາດຕະການຄວບຄຸມໂຣກຂອງປະຊາຊົນ ແລະ ຍັງຄົງພົບຜູ້ຕິດເຊື້ອໃໝ່ໃນນະຄອນຫຼວງ ໂຕກຽວ ຢ່າງຕໍ່ເນື່ອງ ຫຼ້າສຸດເວບໄຊເວີດໂອມີເຕີ ລາຍງາຍຍີ່ປຸ່ນມີຜູ້ຕິດເຊື້ອສະສົມ 455.638 ຄົນ ແລະ ເສຍຊີວິດ 8,812 ຄົນ.