ວິນເທດແມ່ນຫຍັງ ? ໃຜສົງໄສພວກເຮົາມີຄຳຕອບ
ວິນເທດ (Vintage) ແມ່ນແຟຊັ່ນແນວຍ້ອນຍຸກ ຫລື ຂອງເກົ່າທີ່ປຽບດັ່ງການໝັກເຫລົ້າແວັງທີ່ຍິ່ງດົນຍິ່ງດີຍິ່ງແພງ ເປັນແບບແຟຊັ່ນທີ່ເອີ້ນໄດ້ວ່າມີພຽງອັນດຽວເລີຍກໍເວົ້າໄດ້, ບໍ່ໄດ້ເຮັດ ຫລື ຜະລິດອອກມາເປັນໂຫລ, ບໍ່ແມ່ນສິ່ງທີ່ຫາໄດ້ງ່າຍທົ່ວໄປຕາມຮ້ານຂາຍເຄື່ອງສົ່ງຕ່າງໆ ແລະ ເຖິງວ່າທ່ານຈະມີເງິນຫລວງຫລາຍພຽງໃດ ຫາກເປັນເຄື່ອງວິນເທດແລ້ວ ກໍບໍ່ສາມາດຫາຊື້ມາເກັບໄວ້ໄດ້ຫລາຍໆອັນ ແລະ ນີ້ເອງທີ່ເອີ້ນວ່າເປັນສະເໜ່ຂອງແຟຊັ່ນທີ່ເປັນວິນເທດ ເຊິ່ງບໍ່ຊ້ຳແບບໃຜ ແລະ ສາມາດເອົາມາໃຊ້ປະຍຸກໃຫ້ເຂົ້າກັບຄວາມເປັນໂຕຂອງເຮົາເອງໃນແບບງາມບໍ່ຊ້ຳ ເຮັດໃຫ້ມີຫລາຍຄົນເລີຍທີ່ມັກແຟຊັ່ນແບບນີ້.
ວິນເທດ ສາມາດເອີ້ນໄດ້ວ່າເປັນແນວແຟຊັ່ນທີ່ໄດ້ຮັບຄວາມນິຍົມມາແຕ່ດົນນານ ຕັ້ງແຕ່ອະດີດເລີຍກໍເວົ້າໄດ້ ເຊິ່ງແນວວິນເທດນີ້ມີຢູ່ຫລວງຫລາຍ ບໍ່ວ່າຈະເປັນການຕົບແຕ່ງ, ງານສິລະປະ, ລົດ ຫລື ເຄື່ອງນຸ່ງ ເປັນຕົ້ນ. ຫລາຍຄົນເຂົ້າໃຈຜິດຄິດວ່າວິນເທດຈະຕ້ອງເປັນສິນຄ້າມືສອງເທົ່ານັ້ນ ເຊິ່ງຄວາມຈິງແລ້ວວິນເທດບໍ່ຈຳເປັນຕ້ອງເປັນເຄື່ອງມືສອງ ຫລື ຜ່ານການໃຊ້ງານມາແລ້ວສະເໝີໄປ ເພາະເຖິງວ່າຈະເປັນສິ່ງທີ່ຢູ່ໃນກ່ອງໂດຍບໍ່ໄດ້ມີການແກະອອກມາ ເອີ້ນວ່າຍັງໃໝ່ຢູ່, ແຕ່ຜ່ານໄລຍະເວລາມາເຖິງ 20 – 30 ປີ ກໍສາມາດເປັນເຄື່ອງແບບວິນເທດໄດ້ຄືກັນ.
ຫລາຍຄົນທີ່ມັກຮູບແບບວິນເທດ ເນື່ອງຈາກມີຄວາມມ່ວນກັບການເອົາເຄື່ອງວິນເທດມາປະຍຸກໃຊ້ໃຫ້ເບິ່ງງົດງາມ ແລະ ແປກຕາໃນແບບທີ່ບໍ່ຊ້ຳກັບໃຜ ເຮັດໃຫ້ສິ່ງຂອງນັ້ນມີຄຸນຄ່າໃນໂຕເອງ ປະກອບອອກມາແລ້ວງົດງາມເບິ່ງເຂົ້າກັນ ບໍ່ຂັດຕາ ເຖິງວ່າຈະເປັນເຄື່ອງເກົ່າແບບວິນເທດກໍຕາມ ເຮັດໃຫ້ຫລາຍຄົນຮູ້ສຶກຢາກເກັບສະສົມໄວ້.
ນອກຈາກນີ້ ຄົນຮັກວິນເທດລ້ວນແຕ່ຮູ້ສຶກວ່າມີຄວາມສຸກທຸກເທື່ອທີ່ໄດ້ເບິ່ງຮູບແບບວິນເທດນີ້ ເຊິ່ງສິ່ງຂອງແຕ່ລະອັນຕ້ອງໃຊ້ເວລາໃນການຫາມາປະດັບຕົບແຕ່ງເພື່ອໃຫ້ເຂົ້າກັບການອອກແບບ ຈຶ່ງເຮັດໃຫ້ສິ່ງຂອງເຫລົ່ານີ້ເບິ່ງມີຄ່າ ແລະ ປຽບດັ່ງການອອກຕາມຫາສິ່ງຂອງໄປເລື້ອຍໆ ຫລື ຮູບແບບການແຕ່ງໂຕທີ່ຕ້ອງເອົາມາປະສົມປະສານໃຫ້ເຂົ້າຄູ່ກັນລະຫ່ວາງເສື້ອກັບໂສ້ງ ຫລື ປະໂປ່ງ ໂດຍຄວນເລືອກການເຂົ້າຄູ່ລະຫ່ວາງເຄື່ອງນຸ່ງວິນເທດ ແລະ ເຄື່ອງນຸ່ງສະໄໝປັດຈຸບັນ ເພາະນອກຈາກຈະເຮັດໃຫ້ເບິ່ງມີເປັນຄົນມີຄວາມເປັນໂຕຂອງໂຕເອງແລ້ວ ຍັງບໍ່ເຊີຍ ແລະ ເຂົ້າກັບຍຸກສະໄໝໄດ້ນຳອີກ.
