5 ຈຸດສຳຄັນທີ່ລັດຖະບານລາວຈະເລັ່ງແກ້ໄຂໃນການຈັດຕັ້ງແຜນພັດທະນາເສດຖະກິດ-ສັງຄົມໃນ 5 ປີຕໍ່ໜ້າ

ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ຄຳກະຈ່າງແຈ້ງຕໍ່ຄຳເຫັນຂອງ ສະມາຊິກສະພາແຫ່ງຊາດ (ສສຊ) ໃນວາລະດຳເນີນກອງປະຊຸມ ຄັ້ງປະຖົມມະລືກຂອງ ສະພາແຫ່ງຊາກ ຊຸດທີ IX ວັນທີ 23 ມີນາ 2021 ນີ້, ກ່ຽວກັບຄວາມເຫັນໃນການແກ້ໄຂບັນຫາຕ່າງໆຕໍ່ກັບຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ແຜນງົບປະມານແຫ່ງລັດ 5 ປີ (2021-2025) ໂດຍລັດຖະບານຈະຕ້ອງໄດ້ເລັ່ງແກ້ໄຂ 5 ຈຸດສຳຄັນ ຄື:

1. ແຜນການດັ່ງກ່າວຍັງບໍ່ບຸກທະລຸໃນຕົວເລກອັດຕາການຂະຫຍາຍຕົວຂອງເສດຖະກິດ (GDP), ບໍ່ຂ້າມບຸກທະລຸໄປສູ່ຄຸນນະພາບ (ການສ້າງວຽກເຮັດງານທຳ ແລະຄວາມສະເໝີພາບໃນການກະຈາຍຄວາມຮັ່ງມີ ໃຫ້ແກ່ປະຊາຊົນບັນດາເຜົ່າຢ່າງທົ່ວເຖິງ).
2. ເສດຖະກິດຂອງປະເທດລາວໃນປັດຈຸບັນ ສ່ວນຫລາຍເປັນເສດຖະກິດນອກລະບົບ, ເສດຖະກິດນອກລະບົບມີຂະໜາດໃຫຍ່ກວ່າເສດຖະກິດໃນລະບົບ (ເສດຖະກິດນອກລະບົບ ເປັນເສດຖະກິດຜະລິດເປັນສິນຄ້າບໍ່ຍືນຍົງ ແລະ ບໍ່ມີຕະຫລາດຮອງຮັບ).
3. ກົດໝາຍ, ລະບຽບການດ້ານການຄ້າ, ການເງິນ, ພາສີອາກອນ ບາງອັນຍັງບໍ່ທັນສອດຄ່ອງກັບພາກປະຕິບັດຕົວຈິງ (ນິຕິກຳບໍ່ສອດຄ່ອງກັບພຶດຕິກຳ).
4. ບາງຂະແໜງການຂອງພາກລັດກຳບໍ່ໄດ້ ແລະ ບໍ່ເຂົ້າໃຈເຖິງກົນໄກເສດຖະກິດໃໝ່ ແລະ ການເຊື່ອມໂຍງກັບພາກພື້ນ ເຮັດໃຫ້ບໍ່ສາມາດອອກຂໍ້ກຳນົດ, ອອກລະບຽບການ ໃນການຄຸ້ມຄອງສົ່ງເສີມ ຫລື ຈຳກັດການເຄື່ອນໄຫວດຳເນີນທຸລະກິດຂອງນັກທຸລະກິດທັງພາຍໃນ ແລະ ຕ່າງປະເທດ.
5. ມີປະຫວັດຄວາມຊິນເຄີຍຕໍ່ການເພິງພາການຊ່ວຍເຫລືອຈາກພາຍນອກ ແລະ ມີແນວຄິດເອື່ອຍອີງ.

ສະນັ້ນ 5 ຈຸດດັ່ງ ຈະຕ້ອງໄດ້ພ້ອມກັນແກ້ໄຂ.