ວັກຊີນຕ້ານໂຄວິດ-19 ປະເພດກິນຈະໄດ້ຮັບການທົດລອງໃນໄວໆນີ້.
ອີງຕາມແຫຼ່ງຂ່າວຈາກ Worldometers ເມື່ອວັນທີ 23 ມີນານີ້ ໃຫ້ຮູ້ວ່າ ວັກຊີນປະເພດກິນນີ້ ມີຊື່ວ່າ ອໍຣາແວັກ( Oravax) ຊຶ່ງແມ່ນບໍລິສັດການຢາ ອໍຣາເໝັດ( Oramed) ຂອງສະຫະລັດ-ອິສລາເອລ ແລະ ບໍລິສັດຊີວະວິທະຍາ Premas ຂອງອິນເດຍພ້ອມກັນຮ່ວມມືພັດທະນາຂຶ້ນມາ.
ບໍລິສັດ Oramed ແລະ Premas ໄດ້ສ້າງຕັ້ງ ບໍລິສັດ Oravax Medical ຂຶ້ນມາດ້ວຍຄວາມຫວັງວ່າ ຈະນຳໃຊ້ການປະສົມປະສານດ້ານເທັກໂນໂລຊີ ເພື່ອຜະລິດວັກຊີນ ແບບກິນ ຂຶ້ນມາ ເພື່ອຈະສ້າງພູມຄຸ້ມກັນໃໝ່ຕ້ານກັບໂຄວິດ-19.
ໃນຂະນະທີ່ທົດລອງກັບສັດນັ້ນ ບັນດານັກຄົ້ນຄວ້າພົບວ່າ ວັກຊີນ ແບບກິນ ໄດ້ສ້າງພູມຄຸ້ມກັນທີ່ມີຄວາມສາມາດຕ້ານກັບເຊື້ອໄວຣັດ SARS-CoV-2 ໄດ້. ຈຸດພິເສດກໍຄືກີນພຽງເມັດດຽວເທົ່ານັ້ນ ສັດເຫຼົ່ານັ້ນເກີດມີພູມຕ້ານທານກັບ ໂຄວິດ-19 ໄດ້. ຜົນການທົດລອງດັ່ງກ່າວຖືກຕີລາຄາວ່າ ມີຄວາມໂດດເດັ່ນກວ່າ ວັກຊີນ ສັກ 2 ເຂັມ ທີ່ນຳໃຊ້ກັນຢູ່ໃນປັດຈຸບັນ.
Oravax Medical ຈະເລີ່ມດຳເນີນການທົດລອງກັບຄົນ ຢູ່ບາງປະເທດ, ໃນນັ້ນມີ ສະຫະລັດ, ອິສລາເອລ, ແມັກຊິກໂກ ແລະ ຢູ່ໃນທະວີບ ເອີຣົບ. ຄາດວ່າໄວສຸດແມ່ນຈະເລີ່ມຂຶ້ນໃນເດືອນກໍລະກົດທີ່ຈະມາເຖິງ.
Prabuddha Kundu ຜູ້ຮ່ວມກໍ່ຕັ້ງ ຂອງ Premas ໃຫ້ຮູ້ວ່າ ການນຳໃຊ້ວັກຊີນແບບກິນ ຈະບໍ່ແຕກຕ່າງຫຍັງກັບການກິນ ຢາວິຕາມິນນັ້ນເອງ ແລະ ພວກເຮົາຄິດວ່າ ຈະມີປະສິດທິພາບ 100%.
