ກົດ 3 ຂໍ້ຂອງການສື່ສານໃຫ້ປະສົບຄວາມສຳເລັດ
March 24, 2021 - 4:15 PM
ເມື່ອຮອດຕອນທີ່ຕ້ອງນຳສະເໜີຜົນງານຍາມໃດ ເປັນຫຍັງຫົວໜ້າ ຫລື ເພື່ອນຮ່ວມງານຈຶ່ງມັກປະຕິເສດໄອເດຍດີໆຂອງເຮົາໄດ້ທຸກເທື່ອ ເຖິງວ່າຄວາມຈິງເຮົາຈະຕັ້ງໃຈເຮັດຢ່າງເຕັມທີ່ແລ້ວກໍຕາມ. ການສື່ສານບໍ່ໄດ້ໝາຍເຖິງການຖ່າຍທອດໄອເດຍໃຫ້ຄົນອື່ນຮູ້, ແຕ່ຍັງຄວບຄຸມເຖິງວິທີທີ່ເຮົາຖ່າຍທອດໄອເດຍຂອງຕົນເອງໃນສະຖານະການທີ່ເປັນຈິງນຳ. ບາງຄົນອາດບໍ່ໄດ້ນຶກເຖິງຫລັກຈິດຕະວິທະຍາພື້ນຖານທີ່ຊ່ວຍໃຫ້ສື່ສານໄດ້ຜົນ, ບາງຄຳເວົ້າທີ່ບໍ່ເຂົ້າຫູ ເຮັດໃຫ້ພວກເຂົາບໍ່ຍອມຮັບໄອເດຍດີໆເຫລົ່ານັ້ນກໍເປັນໄດ້. ຫາກຢາກປະສົບຄວາມສຳເລັດໃນການສື່ສານ ລອງໃຊ້ກົດ 3 ຂໍ້ນີ້ເປັນໂຕຊ່ວຍ :
- “ຖ້າຂ້ອຍຖືກ ເຈົ້າກໍຜິດ”: ຄົນທົ່ວໄປບໍ່ຄ່ອຍມີຄວາມນຶກເຖິງແຮງຊຸກຍູ້ – ແຮງດັນຂອງຄຳເວົ້າໃນດ້ານ “ຂ້ອຍຖືກ” ຫລື “ວິທີຂອງຂ້ອຍດີກ່ວາ” ຖ້າເວົ້າວ່າ ທ່ານຖືກ ກໍເທົ່າກັບເໝົາລວມວ່າອີກຝ່າຍຜິດໄປໂດຍອັດຕະໂນມັດ, ຖ້າບອກວ່າວິທີຂອງທ່ານດີກ່ວາ ກໍເທົ່າກັບເໝົາລວມວ່າວິທີຂອງອີກຝ່າຍນັ້ນບໍ່ດີໄປໂດຍອັດຕະໂນມັດ, ຄຳເວົ້າທຳນອງວ່າ ຂ້ອຍຖືກ ເຈົ້າຜິດ ບີບໃຫ້ຄົນສະແດງທ່າທີຕໍ່ຕ້ານ ເພື່ອປົກປ້ອງອັດຕາ ຫລື ຊື່ສຽງຂອງຕົນເອງ ເມື່ອອີກຝ່າຍຖືກບີບໃຫ້ສະແດງທ່າທີແບບນີ້ແລ້ວ ກໍຍ່ອມບໍ່ຄິດຈະຮັບຟັງໄອເດຍໃໝ່ໆ ເລື່ອງຈະຍອມຮັບຍິ່ງບໍ່ຕ້ອງເວົ້າເຖິງ.
- ແບ່ງເຂົາ-ແບ່ງເຮົາ ຫລື ແບ່ງຂ້ອຍ – ແບ່ງເຈົ້າ : ການໃຊ້ສັບພະນາມ “ເຈົ້າ” ກັບ “ຂ້ອຍ” ສ້າງບັນຍາກາດແບ່ງແຍກເປັນຄົນລະພວກ, ຄຳວ່າ “ເຈົ້າ” ກັບ “ຂ້ອຍ” ເຮັດໃຫ້ຜູ້ຟັງຮູ້ສຶກແບ່ງພັກແບ່ງພວກ. ທາງທີ່ດີລອງປ່ຽນໄປໃຊ້ສັບພະນາມວ່າ “ພວກເຮົາ” ເພື່ອສະແດງຄວາມເປັນທີມງານດຽວກັນຈະດີກ່ວາ.
- ອັດຕາ : ທຳມະຊາດຄົນເຮົາມັກຖືເອົາຕົນເອງເປັນສູນກາງຂອງໂລກ ເມື່ອເຮົາເຜີຂົ່ມເພິ່ນຍໍໂຕ ອີກຝ່າຍຈະຖືວ່າເປັນການທຳຮ້າຍອັດຕາຂອງເຂົາໂດຍບໍ່ຮູ້ໂຕ. ພໍ້ແບບນີ້ກໍພໍເດົາໄດ້ຢູ່ແລ້ວວ່າອີກຝ່າຍຈະຄິດແນວໃດ ນັ້ນແມ່ນຂັດແຍ່ງເຮົາສຸດທາງເທົ່າທີ່ຈະເປັນໄປໄດ້, ອັດຕາທຳລາຍຄົນ ແລະ ທຸບໄອເດຍດີໆຖິ້ມໄປຫລວງຫລາຍເກີນກກ່ວາທີ່ໃຜຈະຢາກຍອມຮັບ.
ເມື່ອເຂົ້າໄປສະເໜີໄອເດຍເທື່ອຕໍ່ໄປ ທ່ານຄົງຮູ້ແລ້ວວ່າການສ້າງຄວາມຮູ້ສຶກເປັນທີມໜຶ່ງທີມດຽວກັນ ແລະ ຍອມຫລຸດອັດຕາຂອງໂຕເອງອອກໄປແດ່ ຍ່ອມເປັນວິທີທີ່ດີກ່ວາໃນການສື່ສານໃຫ້ປະສົບຄວາມສຳເລັດ.
