ເຄັດລັບຮັບມືກັບວຽກບ້ານກອງໃຫຍ່ຈາກຄູອາຈານ
March 25, 2021 - 4:24 PM
ແນ່ນອນວ່າໃນຫ້ອງຮຽນ ຄູອາຈານເພິ່ນກໍຕ້ອງໃຫ້ວຽກບ້ານ ຫລື ບົດຝຶກຫັດມາໃຫ້ເຮັດເພື່ອເປັນການຝຶກວິຊາ ຝຶກຄວາມສາມາດທີ່ເຮົາໄດ້ຮຽນກັນມາຈາກໂຮງຮຽນ, ແຕ່ບັນຫາຄື ໃນ 1 ມື້ ເຮົາບໍ່ໄດ້ຮຽນແຕ່ວິຊາດຽວ ມື້ໜຶ່ງເຮົາຮຽນຫລາກຫລາຍວິຊາ ແລະ ຖ້າຄູອາຈານທຸກວິຊາລ້ວນແຕ່ໃຫ້ວຽກບ້ານມາພ້ອມໆກັນ ເຮົາຈະຮັບມືກັນແນວໃດ ? ມື້ນີ້ພວກເຮົາຈຶ່ງມີເຄັດລັບການຮັບມືກັບວຽກບ້ານກອງໃຫຍ່ທີ່ໄດ້ມາຈາກໂຮງຮຽນ ມາແນະນຳວ່າຈະຈັດການແນວໃດຈຶ່ງເອີ້ນວ່າເຮັດວຽກບ້ານໄດ້ຢ່າງມີລະບຽບ ແລະ ເປັນມືອາຊີບ.
- ຕັ້ງໃຈຮຽນໃນຫ້ອງຮຽນ : ແນ່ນອນວ່າຄູອາຈານຈະຕ້ອງສອນເນື້ອໃນສິ່ງທີ່ຈະເອົາໃຫ້ມາເປັນວຽກບ້ານຢູ່ແລ້ວ ດັ່ງນັ້ນ ການຕັ້ງໃຈຮຽນເພື່ອເກັບຂໍ້ມູນຈຶ່ງເປັນເລື່ອງທີ່ສຳຄັນໃນການນຳເອົາຄວາມຮູ້ໄປໃຊ້ຕໍ່ສຳລັບການເຮັດວຽກບ້ານ ທັງນີ້ໃນຫ້ອງຮຽນເຮົາຍັງສາມາດຍົກມືຖາມຄູອາຈານໄດ້ໃນພາກສ່ວນທີ່ເຮົາຮູ້ສຶກບໍ່ເຂົ້າໃຈ ຫລື ນຳບໍ່ທັນ.
- ເຮັດວຽກບ້ານພາຍໃນມື້ນັ້ນ : ການເຮັດວຽກບ້ານໃນມື້ທີ່ໄດ້ຮັບມອບໝາຍມາເລີຍນັ້ນມີຂໍ້ດີບໍ່ພຽງແຕ່ເຮົາຈະບໍ່ຕ້ອງດອງວຽກບ້ານໄວ້ຫລາຍໆພຽງຢ່າງດຽວ, ແຕ່ເຮົາຍັງສາມາດເຮັດວຽກບ້ານໄດ້ຢ່າງດີນຳອີກ ເພາະວ່າເຮົາຍັງມີຄວາມຮູ້ທີ່ສົດໃໝ່ຈາກການຮຽນ ຈຶ່ງສາມາດເຮັດໃຫ້ເຮົາເຮັດວຽກບ້ານໄດ້ຢ່າງວ່ອງໄວຂຶ້ນ ຫລາຍກ່ວາການເຮັດວຽກບ້ານຫລັງຈາກທີ່ດອງປະໄວ້ມາຫລາຍມື້ ຈົນອາດຈະລືມຄວາມຮູ້ໄປແດ່ແລ້ວ ແລະ ເສຍເວລານັ່ງອ່ານເນື້ອໃນບົດຮຽນຊ້ຳອີກຮອບ.
- ວາງແຜນໃຫ້ດີ : ສຳລັບນ້ອງນັກຮຽນທີ່ມີວຽກບ້ານຫລາກຫລາຍວິຊາທີ່ໄດ້ຮັບມາໃນມື້ດຽວກັນ ລອງວາງແຜນໃຫ້ດີກ່ອນວ່າວຽກບ້ານໃດມີກຳນົດສົ່ງກ່ອນກຳນົດສົ່ງພາຍຫລັງໄດ້ ໃຫ້ເລືອກເຮັດວຽກບ້ານທີ່ມີກຳນົດສົ່ງກ່ອນໄປກ່ອນ ລຽງຕາມລຳດັບໄປຈົນເຖິງວຽກບ້ານທີ່ມີກຳນົດສົ່ງພາຍຫລັງໄດ້ ໂດຍອາດຈະເຮັດບັນທຶກໄວ້ໃນໂທລະສັບ ຫລື ໃນປື້ມບັນທຶກແຜນການສົ່ງວຽກບ້ານກໍໄດ້.
- ມີແຮງກະຕຸ້ນໃຫ້ເຮັດວຽກບ້ານ : ລອງວາງແຜນວ່າຖ້າເຮັດວຽກບ້ານແລ້ວໃນແຕ່ລະວິຊາ ເຮົາຈະໃຫ້ລາງວັນຕົນເອງ ເຊັ່ນ : ກິນເຂົ້າໜົມໄດ້ ຫລື ເບິ່ງກະຕູນ, ຮູບເງົາໄດ້ໜຶ່ງຕອນ ເພື່ອເປັນແຮງກະຕຸ້ນໃນການຢາກທີ່ຈະເຮັດວຽກບ້ານໃຫ້ແລ້ວໄວໆ ເພື່ອຈະໄດ້ເຮັດໃນສິ່ງທີ່ມັກ ກໍຖືວ່າເປັນໄອເດຍທີ່ດີຄືກັນ ແຕ່ຢ່າກິນເພີນ ຫລື ເບິ່ງເພີນຈົນລືມເຮັດວິຊາຕໍ່ໄປກໍພໍ.
- ເຮັດໃຫ້ເປັນເລື່ອງປົກກະຕິ : ເອົາຄຳແນະນຳຂອງພວກເຮົາໄປໃຊ້ໃນຊີວິດປະຈຳວັນໃນການເຮັດວຽກບ້ານ ຫລື ການເຮັດວຽກໃນທຸກໆມື້ ມັນກໍຈະຊ່ວຍຝຶກນິໄສໃຫ້ເຮົາເປັນຄົນທີ່ຫ້າວຫັນ ເຮັດວຽກທີ່ໄດ້ຮັບມອບໝາຍມາໄດ້ຢ່າງວ່ອງໄວ, ບໍ່ດອງວຽກ ນອກຈາກຈະເຮັດໃຫ້ເຮົາສາມາດສະສາງວຽກຕົນເອງໄດ້ຢ່າງດີແລ້ວ ຍັງເຮັດໃຫ້ຊີວິດຂອງເຮົາມີລະບຽບຫລາຍຂຶ້ນນຳອີກ.
