ລວມ 5 ພາສາທີ່ຄວນສົນໃຈ ອະນາຄົດຊ່ວຍໃຫ້ຊອກວຽກງ່າຍທີ່ສຸດ
March 25, 2021 - 4:32 PM
ການໄດ້ພາສາທີ 3 ນັ້ນຖືວ່າໄດ້ປຽບໃນການຊອກວຽກ ເພາະວ່າການເຮັດວຽກໃນປັດຈຸບັດນັ້ນຕ້ອງມີການຕິດຕໍ່ສື່ສານກັບຕ່າງປະເທດຫລາຍກ່ວາໃນອະດີດ. ດັ່ງນັ້ນ, ໃນແຕ່ລະບໍລິສັດກໍລ້ວນແຕ່ແນມຫາພະນັກງານທີ່ມີຄວາມສາມາດໃນການສື່ສານພາສາມາຮ່ວມງານນຳ. ມື້ນີ້ພວກເຮົາຈຶ່ງລວບລວມພາສາທີ່ໜ້າສົນໃຈນອກຈາກພາສາອັງກິດທີ່ຄວນຈະຮຽນຮູ້ເອົາໄວ້ເປັນພາສາທີ 3 ເພື່ອເປັນປະໂຫຍດໃນອະນາຄົດການເຮັດວຽກ ຈະມີພາສາຫຍັງແດ່ນັ້ນມາເບິ່ງກັນເລີຍ.
- ພາສາຈີນ : ເປັນພາສາທີ່ໄດ້ຮັບຄວາມນິຍົມບໍ່ໜ້ອຍກ່ວາພາສາອັງກິດ ເພາະປະເທດຈີນເປັນປະເທດມະຫາອຳນາດ ແລະ ບໍລິສັດຈີນສ່ວນຫລາຍກໍເລີ່ມເຂົ້າມາເຮັດທຸລະກິດໃນປະເທດລາວຫລາຍຂຶ້ນ ເຊິ່ງຄົນຈີນສ່ວນຫລາຍບໍ່ໄດ້ເວົ້າພາສາອັງກິດ ດັ່ງນັ້ນ ເຮັດໃຫ້ຄົນທີ່ສາມາດເວົ້າ ແລະ ສື່ສານພາສາຈີນໄດ້ຈຶ່ງກາຍເປັນທີ່ຕ້ອງການໃນບໍລິສັດຕ່າງໆທີ່ຕ້ອງມີການຕິດຕໍ່ກັບປະເທດຈີນ.
- ພາສາຍີ່ປຸ່ນ : ເປັນພາສາທີ່ເອີ້ນວ່າສາມາດຍົກສູງເງິນເດືອນຂອງເຮົາຂຶ້ນໄດ້ຫລາຍຄືກັນ ເພາະໂຮງງານອຸດສາຫະກຳສ່ວນຫລາຍມັກຈະເປັນບໍລິສັດຈາກຍີ່ປຸ່ນ ຄືກັນກັບຄົນຈີນ ຄົນຍີ່ປຸ່ນມັກທີ່ຈະບໍ່ເວົ້າພາສາອັງກິດ ດັ່ງນັ້ນ ການສາມາດສື່ສານພາສາຍີ່ປຸ່ນໄດ້ກໍເອີ້ນວ່າໄດ້ປຽບສຳລັບຄົນທີ່ຢາກເຮັດວຽກໃນບໍລິສັດທີ່ຕ້ອງມີການຕິດຕໍ່ກັບປະເທດຍີ່ປຸ່ນ.
- ພາສາເຢຍລະມັນ : ເພາະປະເທດເຢຍລະມັນເປັນປະເທດມະຫາອຳນາດທາງດ້ານເສດຖະກິດຂອງເອີຣົບ ແລະ ຂອງໂລກ ດັ່ງນັ້ນ ການເຮັດວຽກກັບບໍລິສັດທາງເຢຍລະມັນຈຶ່ງເປັນເລື່ອງທີ່ໜ້າສົນໃຈ ແລະ ເຖິງວ່າພາສາເຢຍລະມັນຈະເປັນພາສາທີ່ຮຽນຍາກ, ແຕ່ໜ້ອຍຄົນທີ່ເວົ້າພາສາເຢຍລະມັນໄດ້ ດັ່ງນັ້ນ ຈຶ່ງເອີ້ນວ່າເປັນໂອກາດທີ່ສູງທີ່ຈະຫາວຽກເຮັດໃນສາຍນີ້.
- ພາສາຝຣັ່ງ : ພາສາຝຣັ່ງເປັນພາສາສຳລັບຄົນທີ່ມີຄວາມສົນໃຈໃນວຽກສິລະປະ ແລະ ຄົນໃນປະເທດຝຣັ່ງສ່ວນຫລາຍກໍບໍ່ຄ່ອຍເວົ້າພາສາອື່ນນຳອີກ. ດັ່ງນັ້ນ ການເວົ້າພາສາຝຣັ່ງໄດ້ຈຶ່ງກາຍເປັນຂໍ້ໄດ້ປຽບສຳລັບຄົນທີ່ມີຄວາມສົນໃຈທາງດ້ານສິລະປະ ແລະ ຢາກເຮັດວຽກໃນປະເທດນີ້.
- ພາສາເກົາຫລີ : ຈາກການທີ່ເກົາຫລີຟີເວີໃນປະເທດລາວ ແລະ ປະເທດເພື່ອນບ້ານມາຫລາຍປີ ຈຶ່ງເຮັດໃຫ້ປະເທດເກົາຫລີຈຶ່ງມາເປີດທຸລະກິດໃນປະເທດລາວຫລາຍຂຶ້ນກ່ວາເກົ່າ ຈຶ່ງເຮັດໃຫ້ຄວາມຕ້ອງການສຳລັບຜູ້ທີ່ສາມາດເວົ້າພາສາເກົາຫລີໄດ້ ກາຍເປັນທີ່ຕ້ອງການສຳລັບການເຮັດວຽກຫລາຍຍິ່ງຂຶ້ນ.
