ສາທາລະນະສຸກບຣາຊິລໃກ້ລົ້ມ ຮັບມືໂຄວິດບໍ່ໄຫວ
March 26, 2021 - 9:53 AM
ສະຖານະການການລະບາດໂຄວິດຢູ່ບຣາຊິລ ເຊິ່ງມີຜູ້ຕິດເຊື້ອສູງເປັນອັນດັບ 2 ຂອງໂລກ ໜ້າເປັນຫ່ວງຍາກ ເພາະໃນວັນທີ 25 ມີນາມື້ດຽວ ມີຜູ້ເສຍຊີວິດຈາກໂຄວິດສູງເຖິງ 3.000 ຄົນ.
ການລະບາດທີ່ເພີ່ມບໍ່ຢຸດ ເຊິ່ງທາງການບຣາຊິລບໍ່ສາມາດຄວບຄຸມໄດ້ແບບນີ້ ກຳລັງຈະເຮັດໃຫ້ລະບົບສາທາລະນະສຸກຂອງບຣາຊິລໃກ້ເຂົ້າສູ່ສະພາບລົ້ມເຫລວ ເພາະເກືອບບໍ່ສາມາດຮັບມືກັບຈຳນວນຜູ້ຕິດເຊື້ອໄດ້ອີກຕໍ່ໄປ.
ໃນນະຄອນຣີໂອ ເດິ ຈາເນໂຣ ມີຜູ້ຕິດເຊື້ອຈຳນວນຫລາຍໃນພະແນກຜູ້ປ່ວຍໜັກ ຫລື ICU ທີ່ຕ້ອງອາໄສເຄື່ອງຊ່ວຍຫາຍໃຈໃຫ້ມີຊີວິດລອດ ແລະ ຍັງພົບວ່າ: ພະແນກ ICU ໃນໂຮງໝໍ 18 ເຂດ ຂອງຣີໂອ ເດິ ຈາເນໂຣ ນັ້ນເຕັມທັງໝົດ ແລະ ຍັງມີຜູ້ຕິດເຊື້ອອີກຢ່າງໜ້ອຍ 528 ຄົນ ລໍຖ້າຄິວເພື່ອເຂົ້າຮັບການປິ່ນປົວໃນຫ້ອງ ICU.
