ມອບ-ຮັບໜ້າທີ່ຫົວໜ້າຫ້ອງວ່າການປະທານປະເທດ ຜູ້ເກົ່າ ແລະ ໃໝ່

ໃນວັນທີ 25 ມີນາ 2021 ທີ່ຫ້ອງວ່າການປະທານປະເທດ ນະຄອນຫລວງວຽງຈັນ, ໄດ້ຈັດພິທີມອບ-ຮັບໜ້າ ທີ່ຫົວໜ້າຫ້ອງວ່າການປະທານປະເທດ ຜູ້ເກົ່າ ແລະ ຜູ້ໃໝ່ ລະຫວ່າງ ທ່ານ ຄຳເມິງ ພົງທະດີ ຫົວໜ້າຫ້ອງວ່າການປະທານປະເທດ (ຜູ້ເກົ່າ) ແລະ ທ່ານ ນາງ ເຂັມມະນີ ພົນເສ ນາ ຫົວໜ້າຫ້ອງວ່າການປະທານປະເທດ (ຜູ້ໃໝ່) ໂດຍການເຂົ້າຮ່ວມຂອງ ທ່ານ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ພ້ອມດ້ວຍພະນັກງານຫລັກແຫລ່ງ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ດວງຕາ ຈູມພາວັນ ຫົວໜ້າຫ້ອງການຄະນະຈັດຕັ້ງສູນກາງພັກ ໄດ້ຂຶ້ນຜ່ານເອກະສານສຳຄັນ ໂດຍໄດ້ອະນຸມັດໃຫ້ ທ່ານ ຄຳເມິງ ພົງທະດີ ຫົວໜ້າຫ້ອງວ່າການປະເທດ (ຜູ້ເກົ່າ) ອອກພັກການຮັບອຸດໜູນບຳນານ ​ແລະ ໄດ້ແຕ່ງຕັ້ງໃຫ້ ທ່ານ ນາງ ເຂັມມະນີ ພົນເສນາ ເປັນຫົວໜ້າຫ້ອງວ່າການສຳນັກງານປະທານປະເທດຄົນໃໝ່.

ພ້ອມນີ້, ທ່ານ ນາງ ສີໃສ ລືເດດມູນສອນ ໄດ້ເນັ້ນວ່າ: ເອົາໃຈໃສ່ວຽກງານສຶກສາອົບຮົມການເມືອງ-ແນວຄິດຕໍ່ພະນັກງານ-ສະມາຊິກພັກໃຫ້ມີທັດສະນະການເມືອງໜັກແໜ້ນ, ມີຄວາມສາມັກຄີເປັນປຶກແຜ່ນ, ແໜ້ນໜາ, ມີຄວາມຈົງຮັກພັກດີຕໍ່ພັກ ແລະ ເຊື່ອໝັ້ນຕໍ່ການນໍາພາຂອງພັກ, ມີຄວາມອຸນອຽນທຸ່ນທ່ຽງ, ມີຄວາມຮັບຜິດຊອບ ແລະປະຕິບັດໜ້າທີ່ວຽກງານທີ່ໄດ້ຮັບການມອບໝາຍໃຫ້ມີຜົນສໍາເລັດ, ພ້ອມທັງເຊີດຊູຄວາມເປັນແບບຢ່າງຂອງສະມາຊິກພັກ-ພະນັກງານໃນການດໍາລົງຊີວິດທີ່ປອດໃສ, ປະຢັດ, ຕ້ານການຟູມເຟືອຍ, ເປັນແບບຢ່າງໃນການປະຕິບັດກົດລະບຽບພັກ, ກົດໝາຍ ແລະ ລະບຽບການຕ່າງ; ເອົາໃຈໃສ່ຊີ້ນຳແກ້ໄຂສິ່ງຫຍໍ້ທໍ້ຕ່າງໆໃຫ້ດີຂຶ້ນ; ສືບຕໍ່ເປັນເສນາທິການທີ່ດີໃຫ້ແກ່ທ່ານປະທານປະເທດ, ຮອງປະທານປະເທດ ໃນການກະກຽມດ້ານເນື້ອໃນ, ສະຖານທີ່ ແລະ ຄວາມພ້ອມຕ່າງໆ ຢ່າງຮອບດ້ານໃຫ້ແກ່ການເຄື່ອນໄຫວລັດຖະກິດທັງພາຍໃນ ແລະ ຕ່າງ ປະເທດ ລວມທັງທຸກວຽກງານປີ່ນອ້ອມ ຢູ່ຫ້ອງວ່າການປະທານປະເທດໃຫ້ມີຄວາມຮັບປະກັນ ແລະມີປະສິດທິຜົນຍິ່ງໆຂຶ້ນ.