ແມ່ຕູ້ຊາວຈີນທີ່ຖືກທຳຮ້າຍຢູ່ອາເມລິກາ ປະກາດມອບເງິນທີ່ໄດ້ຮັບບໍລິຈາກ 921.000 ໂດລາສະຫະລັດ ໃຫ້ຊຸມຊົນຊາວອາຊີ-ອາເມລິກາຕໍ່ສູ້ບັນຫາກຽດຊັງເຊື້ອຊາດ
ຈາກກໍລະນີຂອງແມ່ຕູ້ ເຊຍສ່ຽວເຈິ້ນ ເຊື້ອສາຍຈີນຢູ່ອາເມລິກາ ອາຍຸ 75 ປີ ທີ່ກາຍເປັນຂ່າວດັງໄປທົ່ວໂລກ ຫລັງປາກົດວິດີໂອທີ່ລາວຖືກຜູ້ຊາຍບໍ່ຮູ້ຈັກຊົກໃບໜ້າລະຫວ່າງຢືນຖ້າຂ້າມທາງໃນຊານຟຣານຊິສໂກ ຈົນເຮັດໃຫ້ຕາບວມຊ້ຳ ແລະ ມີເລືອດອອກ ກ່ອນລາວຈະຕອບໂຕ້ດ້ວຍການຈັບໄມ້ຟາດໃສ່ຜູ້ຊາຍຄົນນັ້ນຈົນໄດ້ຮັບບາດເຈັບ ເຊິ່ງສາເຫດເຊື່ອວ່າມີແຮງຈູງໃຈຈາກຄວາມກຽດຊັງຊາວອາຊີ.
ພາຍຫລັງເກີດເຫດ ຫລາຍຊາຍຂອງແມ່ຕູ້ປະກາດລະດົມເງິນບໍລິຈາກຜ່ານເວັບໄຊ GoFundMe ເພື່ອຂໍການຊ່ວຍເຫລືອໃນການປິ່ນປົວແມ່ຕູ້ທັງທາງກາຍ ແລະ ໃຈ, ແຕ່ຫລ້າສຸດມີລາຍງານວ່າ: ແມ່ຕູ້ຕັດສິນໃຈເອົາເງິນບໍລິຈາກທັງໝົດ 921.000 ໂດລາສະຫະລັດ ມອບໃຫ້ຊຸມຊົນຊາວອາເມລິກາເຊື້ອສາຍອາຊີ ເພື່ອຕໍ່ສູ້ບັນຫາການກຽດຊັງເຊື້ອຊາດທີ່ເກີດຂຶ້ນຢູ່ອາເມລິກາ.
ຈອນ ເສິນ ຫລານຊາຍຜູ້ເປີດລະດົມທຶນ ເປີດເຜີຍອາການຫລ້າສຸດຂອງແມ່ຕູ້ ພົບວ່າຕາມີອາການບວມຫລຸດລົງ ແລະ ເປີດຕາໄດ້ແລ້ວ. ຂະນະທີ່ແມ່ຕູ້ມີກຳລັງໃຈດີຂຶ້ນ.
ສຳລັບຜູ້ຊາຍທີ່ທຳຮ້າຍແມ່ຕູ້ຊື່ວ່າ ສະຕີບ ເຈນກິນ ອາຍຸ 39 ປີ ເຊິ່ງຕຳຫລວດພົບວ່າໃນມື້ດຽວກັນນັ້ນ ລາວຍັງທຳຮ້າຍ ງ໊ອກ ຝ່າມ ພໍ່ຕູ້ເຊື້ອສາຍຫວຽດນາມ ອາຍຸ 83 ປີ ກຳລັງຊື້ເຄື່ອງຢູ່ຮ້ານມິນິມາກໃນບໍລິເວນໃກ້ຄຽງ ຈົນເຮັດໃຫ້ໃບໜ້າໄຄ່ແດງ ແລະ ມີເລືອດອອກດັງ ເຊິ່ງສູນເຍົາວະຊົນຊຸມຊົນແຫ່ງຊານຟຣານຊິສໂກ (CYCSF) ໄດ້ປະກາດລະດົມເງິນບໍລິຈາກເພື່ອຊ່ວຍຄ່າປິ່ນປົວຜ່ານເວັບໄຊ GoFundMe ເຊັ່ນກັນ ໂດຍໄດ້ເງິນບໍລິຈາກແລ້ວຫລາຍກວ່າ 283.000 ໂດລາສະຫະລັດ.
ອ້າງອີງ:
https://news.yahoo.com/chinese-grandma-fought-off…
