ຮ້ານເກມຍັງແອບແຝງຢາເສບຕິດກັບການພະນັນເຖື່ອນ
ໂດຍ: ທິດກໍ່າ
ບັນດາປາກົດການຫຍໍ້ທໍ້ໃນສັງຄົມບ້ານເຮົາໃນຍຸກທີ່ປະເທດຊາດພວມພັດທະນາ ຍ່ອມມີຫລາຍສິ່ງຫລາຍຢ່າງຕາມມາ, ໜຶ່ງໃນບັນດາປາກົດການຫຍໍ້ທໍ້ທີ່ເປັນແຫລ່ງມົ້ວສຸມສຳລັບເດັກເຍົາວະຊົນ ແລະ ໄວໜຸ່ມກໍແມ່ນຮ້ານເກມ. ເວົ້າເຖິງຮ້ານເກມ ຖ້າບໍລິການຄຸ້ມຄອງດີກໍຍ່ອມມີຜົນປະໂຫຍດຢ່າງຫລວງຫລາຍ ຍ້ອນວ່າເປັນການຝຶກສະໝອງລອງປັນຍາຂອງເດັກ ແລະ ໄວໜຸ່ມໃຫ້ເຂົາເຈົ້າມີທັກສະ, ພັດທະນາແນວຄິດມັນສະໝອງ, ການໄດ້ສຳຜັດກັບເກມຫລິ້ນທີ່ຫລາກຫລາຍເມື່ອເຂົາໃຫຍ່ຂຶ້ນມາກໍມີແນວຄິດມັນສະໝອງວ່ອງໄວ, ໃຝ່ຝັນຢາກໄປສຶກສາຮໍ່າຮຽນ ຫລື ຊອກຫາອາຊີບທີ່ເຂົາມັກ. ນອກຈາກນັ້ນ ການຫລິ້ນເກມຍັງສ້າງຄວາມສະໜຸກສະໜານ, ລະເລີງບັນເທີງຈິດໃຈໃຫ້ແກ່ເດັກໄດ້ເບົາສະໝອງ ແລະ ມ່ວນຊື່ນຫ່າງຈາກສິ່ງອະບາຍຍະມຸກຕ່າງໆ.
ແນວໃດກໍດີ, ເມື່ອມາເບິ່ງໃນດ້ານກົງກັນຂ້າມ ຮ້ານເກມຢູ່ບ້ານເຮົາມັນພັດແອບແຝງໄປດ້ວຍສິ່ງຫຍໍ້ທໍ້ຕ່າງໆຕາມມາເຊັ່ນ: ຫລິ້ນການພະນັນລົງເງິນກັນ, ເປັນບ່ອນມົ້ວສຸມຢາເສບຕິດ ຫລື ເຜີໆມາ ກໍກາຍເປັນບ່ອນຫລິ້ນການພະນັນທາງອອນລາຍຕົ້ມຕຸນກັນສາລະພັດຢ່າງ. ເພາະສະນັ້ນ ເຮົາຈຶ່ງເຫັນວ່າ ໃນໄລຍະຜ່ານມາໄດ້ມີເຈົ້າໜ້າທີ່ທີ່ກ່ຽວຂ້ອງສັ່ງຍຸບ ຫລື ຮື້ຖອນ, ນຳເອົາຕູ້ເກມໄປທຳລາຍຖິ້ມຫລາຍຄັ້ງຢ່າງນັບບໍ່ຖ້ວນ. ມາຮອດປັດຈຸບັນ ສະພາບຄວາມບໍ່ສະຫງົບໃນຮ້ານເກມກໍຍັງມີໃຫ້ເຫັນໃນບາງຊ່ວງບາງໄລຍະ ໂດຍສະເພາະແມ່ນຢູ່ນະຄອນຫລວງວຽງຈັນ ແລະ ໃນບັນດາຕົວເມືອງໃຫຍ່ໆໃນທົ່ວປະເທດ.
ເມື່ອຕັ້ງໂຈດກັນວ່າ ຕໍ່ປາກົດການຫຍໍ້ທໍ້ດັ່ງກ່າວ ພວກເຮົາຈະມີວິທີການແກ້ໄຂແນວໃດ ? ມັນກໍມີທາງເລືອກຢູ່ສອງຢ່າງຄື: ອັນທີໜຶ່ງ ຖ້າຍັງອະນຸຍາດໃຫ້ມີຮ້ານເກມຕ້ອງຄຸ້ມຄອງໃຫ້ມັນດີ, ຜູ້ປະກອບການດ້ານນີ້ຕ້ອງປະຕິບັດລະບຽບກົດໝາຍບ້ານເມືອງຢ່າງເຂັ້ມງວດ ແລະ ເດັດຂາດອີ່ຫລີ, ຖ້າບຸກຄົນໃດ ຫລື ຜູ້ປະກອບການທ່ານໃດຫາກຝ່າຝືນຕ້ອງປັບໄໝໃສ່ໂທດຕາມກໍລະນີໜັກ ຫລື ເບົາ. ອີກປະການໜຶ່ງ ທາງເບື້ອງມະຫາພາກກໍຕ້ອງເອົາໃຈໃສ່ຄຸ້ມຄອງ, ຕິດຕາມ ແລະ ກວດກາຢ່າງເນື່ອງນິດລຽນຕິດ ເພື່ອບໍ່ໃຫ້ຮ້ານເກມກາຍເປັນແຫລ່ງມົ້ວສຸມສິ່ງເສບຕິດ ແລະ ການພະນັນທຸກຢ່າງ. ສ່ວນກໍລະນີທີສອງ ແມ່ນເດັດຂາດບໍ່ໃຫ້ມີຮ້ານເກມເລີຍ ເພາະຍາມໃດຜູ້ປະກອບການກໍບໍ່ປະລະຫາຊອກທຸກວິທີ ເພື່ອດຶງດູດເອົາເດັກເຍົາວະຊົນ ແລະ ໄວໜຸ່ມເຂົ້າໄປຫລິ້ນເກມໃຫ້ຫລາຍເທົ່າທີ່ຈະຫລາຍໄດ້, ສຸດທ້າຍມາພວກເຍົາວະຊົນ ແລະ ໄວໜຸ່ມຈຳນວນບໍ່ໜ້ອຍກໍພາກັນຕິດເກມ ແລ້ວປະລະການຮຽນດັ່ງເຮົາເຄີຍໄດ້ຍິນ ແລະ ເຄີຍເຫັນມາແລ້ວໃນຫລາຍໆປີທີ່ຜ່ານມາ. ຍັງບໍ່ພຽງແຕ່ເທົ່ານັ້ນ ເພື່ອດຶງດູດເອົາເຍົາວະຊົນ ແລະ ໄວໜຸ່ມເຂົ້າຫລິ້ນເກມຕິດເກມ ທາງເຈົ້າຂອງຮ້ານເກມຍິ່ງຊອກເອົາເກມແນວດີໆ, ຫລາກຫລາຍ, ກ້າວໜ້າທັນສະໄໝມາສະໜອງໃຫ້ຜູ້ຫລິ້ນຕິດຫລິ້ນເກມຈົນກາຍເປັນຄົນຫລົງໄຫລບ້າໄບ້ເສຍຈິດເສຍຜູ້ເສຍຄົນຍ້ອນກໍມີ. ນີ້ລະຄືຜົນດີ ແລະ ຜົນຮ້າຍຂອງຮ້ານເກມທີ່ມີທັງເຊີງບວກ ແລະ ເຊີງລົບ.
ເຖິງຢ່າງໃດກໍດີ, ໃນສະພາບຜ່ານມານັ້ນ ເຮົາເຫັນວ່າບັນຫາເລື່ອງຮ້ານເກມ ມີບາງບ່ອນກໍບໍລິການດີແທ້, ແຕ່ມີຫລາຍບ່ອນກໍເຮັດແນວບໍ່ດີຈົນກາຍເປັນແຫລ່ງມົ້ວສຸມສິ່ງເສບຕິດ, ແຫລ່ງການພະນັນ, ກະທຳຜິດກົດໝາຍຂອງບ້ານເມືອງ ຍ້ອນຜູ້ປະກອບການເຫັນແກ່ໄດ້ ຈຶ່ງຫາຊ່ອງທາງຍົວະເຍົ້າເດັກເຍົາວະຊົນຊາວໜຸ່ມໃຫ້ພາກັນຕິດເກມຈົນປະລະການຮໍ່າຮຽນ, ບໍ່ສົນໃຈນຳເຮືອນຊານ, ພໍ່ແມ່ ແລະ ຄອບຄົວ ສຸດທ້າຍມາກໍກາຍເປັນຄົນເສເພ, ຂີ້ລັກປຸ້ນຈີ້, ຂ້າເຈົ້າເອົາຂອງ ຍ້ອນຕິດເກມດັ່ງເຮົາເຄີຍເຫັນມາໃນແຫລ່ງຂ່າວບາງໄລຍະໃນສັງຄົມບ້ານເຮົາທຸກວັນນີ້.
