ຈີນເລີ່ມສັກວັກຊີນປ້ອງກັນໂຄວິດ-19 ໃຫ້ນັກຂ່າວຂອງຕ່າງປະເທດ ແລະ ສະມາຊິກໃນຄອບຄົວ
ວັນທີ 26 ມີນາ 2021, ສຳນັກຂ່າວ Kyodo News ຂອງຍີ່ປຸ່ນ ລາຍງານວ່າ: ຈີນເລີ່ມດຳເນີນການສັກວັກຊີນປ້ອງກັນພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ໃຫ້ນັກຂ່າວຂອງຕ່າງປະເທດຈາກຍີ່ປຸ່ນ ແລະ ປະເທດອື່ນໆ ໃນວັນທີ 23 ມີນາຜ່ານມາ.
ລາຍງານລະບຸວ່າ: ກຸ່ມນັກຂ່າວຂອງຕ່າງປະເທດ ແລະ ສະມາຊິກໃນຄອບຄົວຂອງພວກເຂົາທີ່ມີອາຍຸ 18-59 ປີ ໄດ້ຮັບວັກຊີນປ້ອງກັນພະຍາດໂຄວິດ-19 ຂອງ Sinovac ລາຄາ 90 ຢວນ ໃນນະຄອນຫລວງປັກກິ່ງ ຂອງຈີນ ແລະ ຈະໄດ້ຮັບວັກຊີນໂດສທີ 2 ໃນເດືອນເມສານີ້.
ກຸ່ມນັກຂ່າວໄດ້ລົງນາມເອກະສານຍິນຍອມກ່ອນເຂົ້າຮັບວັກຊີນ ເຊິ່ງລະບຸຂໍ້ຄວາມເປັນພາສາອັງກິດວ່າ: “ບໍ່ມີວັກຊີນໃດທີ່ໄດ້ຜົນ 100% ແລະ ເນື່ອງຈາກສະພາບສຸຂະພາບສ່ວນບຸກຄົນແຕກຕ່າງກັນໄປ ບາງຄົນອາດຍັງສາມາດຕິດເຊື້ອ ຫລື ຜະເຊີນອາການໃດໆ ຫລັງສັກວັກຊີນໄດ້”.
ຂະນະທີ່ເອກະສານອີກສະບັບໜຶ່ງລະບຸວ່າ: “ຈີນຕັດສິນໃຈສະເໜີການສັກວັກຊີນໃຫ້ນັກຂ່າວຂອງຕ່າງປະເທດໃນປັກກິ່ງ ເພື່ອອຳນວຍຄວາມສະດວກຕໍ່ການເຮັດວຽກ ແລະ ການດຳລົງຊີວິດ. ເຖິງຢ່າງໃດກໍດີ, ຜູ້ຮັບວັກຊີນຍັງຕ້ອງປະຕິບັດຕາມມາດຕະການປ້ອງກັນ ແລະ ຄວບຄຸມທັງໝົດຕໍ່ໄປ”.
ທັງນີ້, ການດຳເນີນດັ່ງກ່າວມີຂຶ້ນຫລັງຊຽງໄຮ້ ເຊິ່ງເປັນອີກໜຶ່ງເມືອງສາກົນໃນຈີນ ປະກາດແຜນການສັກວັກຊີນປ້ອງກັນພະຍາດໂຄວິດ-19 ທີ່ຜະລິດໃນຈີນໃຫ້ຊາວຕ່າງປະເທດທີ່ມີຄຸນສົມບັດຖືກຕ້ອງຕາມຂໍ້ກຳນົດ ເຮັດໃຫ້ຊຽງໄຮ້ກາຍເປັນເມືອງທຳອິດຂອງຈີນທີ່ເຜີຍແຜ່ແຜນການສັກວັກຊີນໃຫ້ຊາວຕ່າງປະເທດ.
ອ້າງອີງ: ສຳນັກຂ່າວຊິນຮົວ
