ປະຕູຫ້ອງປະຊຸມຂອງສະພາຕໍ່າສະຫະລັດ ຖືກປ່ຽນແທນດ້ວຍວັດຖຸກັນລູກກະສູນ

ໜັງສືພິມ The Hill  ລາຍງານເມື່ອວັນທີ 26 ມີນານີ້ວ່າ: ປະຕູເຂົ້າອອກຂອງຫ້ອງປະຊຸມສະພາຕໍ່າສະຫະລັດ ຖືກປ່ຽນແທນດ້ວຍຝາກັນລູກກະສູນ. ໂຄສົກຂອງປະທານສະພາຕໍ່າ ສະຫະລັດ ທ່ານ Drew Hammill ກ່າວວ່າ ໂຄງການປ່ຽນໃໝ່ປະຕູເຂົ້າອອກຂອງຫ້ອງປະຊຸມສະພາຕໍ່ານັ້ນ ມີມາກ່ອນທີ່ເກີດເຫດບຸກລຸກໃນເມື່ອວັນທີ 6 ມັງກອນທີ່ຜ່ານມາ. ໂຄງການປ່ຽນແທນປະຕູກັນລູກກະສູນຈະສືບຕໍ່ໃຫ້ແລ້ວກ່ອນກອງປະຊຸມທີ່ຈະມາເຖິງ.

ໜັງສືພິມ The Hill ໃຫ້ຮູ້ເພີ່ມເຕີມວ່າ ລະບົບປ້ອງກັນຄວາມປອດໄພໃນອາຄານລັດຖະສະພາໃນນະຄອນຫຼວງ  ວໍຊີງຕັນ ດີຊີ ຖືກກຳກັບຮັດແໜ້າເຂົ້າກວ່າເກົ່າ ພາຍຫຼັງເກີດເຫດຈະລາຈົນເມື່ອວັນທີ 6 ມັງກອນທີ່ຜ່ານມາ ຈາກຫຼາຍພັນຄົນສະໜັບສະໜູນທຣຳ ບຸກເຂົ້າໄປ ອັນເຮັດໃຫ້ມີ 5 ຄົນຕ້ອງປິດຊີວິດ, ໃນນັ້ນ ມີນາຍຕຳຫຼວດ 1 ຄົນ.