ສິ່ງທີ່ຍາກທີ່ສຸດໃນການເລີ່ມຕົ້ນຄວາມຝັນ

ຫລາຍໆຄົນມີຄວາມຝັນເປັນຂອງຕົນເອງ ເຊິ່ງຫລາຍໆຄົນກໍສາມາດເຮັດມັນສຳເລັດ, ແຕ່ກໍມີອີກຫລາຍໆຄົນເຊັ່ນກັນທີ່ຕ້ອງຖິ້ມຄວາມຝັນເຫລົ່ານັ້ນເອົາໄວ້ກາງທາງ ກ່ອນຈະຍ່າງໄປໃນເສັ້ນທາງໃໝ່.

ເລື່ອງຍາກທີ່ສຸດໃນການເລີ່ມຕົ້ນເຮັດຕາມຄວາມຝັນກໍຄື “ຄວາມຢ້ານ”, ຢ້ານຈະເປັນໂຕຂອງໂຕເອງ, ຢ້ານການກ້າວຂາອອກຈາກຂອບເຂດພື້ນທີ່ປອດໄພ ຫລື ພື້ນທີ່ສະບາຍ ຫລື ຢ້ານຈະເຮັດມັນບໍ່ສຳເລັດ. ໃນສະໄໝບູຮານນະການ ມະນຸດໃຊ້ຄວາມຢ້ານໃນການປົກຄອງຄົນ ຈົນກະທັ້ງຫລາຍໆຄົນຕິດຄວາມເຊື່ອເກົ່າໆເຫລົ່ານັ້ນ ແລ້ວເອົາມາໃຊ້ກັບຊີວິດຕົນເອງ ເຊິ່ງເປັນເລື່ອງບໍ່ດີເລີຍ.

ຫລາຍໆຄົນຍອມໃຫ້ບຸກຄົນພາຍນອກເຂົ້າມາເປັນເຈົ້າຂອງຈິດວິນຍານຕົນເອງ, ບໍ່ກ້າເຮັດຕາມທີ່ຫົວໃຈຕົນເອງຮຽກຮ້ອງ ເຊັ່ນ : ທ່ານຢາກເປັນນັກຮ້ອງ, ແຕ່ກໍຕ້ອງມາເຮັດວຽກບໍລິສັດ, ທ່ານຢາກເຮັດວຽກບໍລິສັດ ແຕ່ກໍຕ້ອງມາເຮັດວຽກເປັນໜ່ວຍງານລັດ, ທ່ານຢາກເປັນພະນັກງານບໍລິສັດ ແຕ່ກໍຕ້ອງອອກມາຂາຍເຄື່ອງ ເປັນຕົ້ນ. ທັງນີ້ອາຊີບເຫລົ່ານີ້ເຮົາບໍ່ໄດ້ບອກວ່າອາຊີບໃດດີກ່ວາໃຜ, ແຕ່ເຮົາຢາກສື່ວ່າທຸກອາຊີບມີຄວາມສຳຄັນ ແລະ ມີໜ້າທີ່ເປັນຂອງຕົນເອງຄືກັນໝົດ ພຽງແຕ່ໂດຍພື້ນຖານແລ້ວຄົນເຮົາມີຄວາມມັກບໍ່ຄືກັນ, ຄືກັບທຳມະຊາດ ເຊິ່ງຖືກຳເນີດຂຶ້ນມາພ້ອມສ້າງສັນຄວາມແຕກຕ່າງຢ່າງໄຮ້ຂີດຈຳກັດ ບໍ່ວ່າຈະເປັນທະເລ, ພູເຂົາ, ປ່າດົງດິບ, ທະເລຊາຍ ເປັນຕົ້ນ ເພາະມີຄວາມແຕກຕ່າງ ໂລກຂອງເຮົາຈຶ່ງມີຄວາມຈົບງາມ ແລະ ມີເອກະລັກ ແນ່ນອນວ່າມະນຸດເອງກໍຄືກັນ.

ສະນັ້ນ, ຈົ່ງຢ່າຢ້ານເປັນໂຕຂອງໂຕເອງ ຈົ່ງຢ່າຢ້ານທີ່ຈະຍ່າງຕາມຄວາມຝັນ, ຈົ່ງຢ່າຢ້ານໃນຄວາມລົ້ມເຫລວ ເພາະຄວາມລົ້ມເຫລວລ້ວນປະກົດຢູ່ໃນຊີວິດຂອງຜູ້ປະສົບຄວາມສຳເລັດທຸກຄົນ ບໍ່ວ່າຈະແມ່ນ ທ່ານ ແຈັກໝ່າ ນັກທຸລະກິດລະດັບໂລກຜູ້ກໍ່ຕັ້ງກຸ່ມອາລີບາບາ, ຜູ້ພັນແຊນເດີ ຜູ້ກໍ່ຕັ້ງໄກ່ຈືນ ເຊິ່ງມີສາຂາກະຈາຍຢູ່ທົ່ວໂລກດັ່ງ KFC, ວໍ ດິສນີ ເອງກໍເຄີຍຖືກປະຕິເສດ ແລະ ຖືກປະໝາດຫລາຍໆເທື່ອ ລວມທັງຄົນອື່ນໆອີກຫລວງຫລາຍ ຫລາຍຄົນອາດບອກວ່າ ບໍ່ໄດ້ຢາກຍິ່ງໃຫຍ່ຄືກັບຄົນເຫລົ່ານັ້ນ ພຽງແຕ່ຢາກເຮັດຄວາມຝັນຂອງຕົນໃຫ້ເປັນຈິງເທົ່ານັ້ນ ເຊັ່ນ : ຢາກເປັນນັກຮ້ອງ, ຢາກເປີດຮ້ານອາຫານນ້ອຍໆຈັກຮ້ານ, ຢາກເປັນພະນັກງານໃນອົງກອນທີ່ມີຊື່ສຽງ, ຢາກຂຽນໜັງສືອອກມາຈັກເຫລັ້ມ, ຢາກອອກເດີນທາງໄປຕ່າງປະເທດ ເປັນຕົ້ນ ເຊິ່ງມັນກໍຍິ່ງງ່າຍຂຶ້ນຕື່ມອີກ.

ທ່ານຮູ້ຫລືບໍ່ວ່າການອອກໄປເຮັດຕາມໃຈປາຖະໜາຕາມທີ່ຕົນເອງຕ້ອງການ ບໍ່ແມ່ນຄົນເຫັນແກ່ໂຕ, ແຕ່ຄົນທີ່ເຫັນແກ່ໂຕແທ້ໆແມ່ນຄົນທີ່ຊີ້ນິ້ວສັ່ງໃຫ້ຄົນອື່ນໃຊ້ຊີວິດດັ່ງທີ່ຕົນເອງຕ້ອງການ, ຖ້າທ່ານໝັ້ນໃຈວ່າສິ່ງທີ່ທ່ານຕ້ອງການບໍ່ໄດ້ເຮັດໃຫ້ສັງຄົມ ຫລື ຄວາມອ້ອມຂ້າງເດືອດຮ້ອນ, ບໍ່ຜິດກົດໝາຍ, ບໍ່ຜິດສິນທຳ, ບໍ່ໄດ້ທຳຮ້າຍ ຫລື ກໍ່ກວນຜູ້ອື່ນ ເຮົາຢາກໃຫ້ທ່ານອອກໄປໃຊ້ຊີວິດໃນຂະນະນີ້ເລີຍ ກ່ອນຈະບໍ່ເຫລືອເວລາຊີວິດໃຫ້ໃຊ້.