ປັກກິ່ງເປັນເມືອງສີນ້ຳຕານ ພາຍຸຊາຍພັດເຂົ້າອີກຮອບ
ໃນຕອນເຊົ້າວັນທີ 28 ມີນາ ພື້ນທີ່ນະຄອນຫລວງປັກກິ່ງ ໄດ້ກາຍສະພາບເປັນສີນ້ຳຕານ ເຊິ່ງເປັນຜົນມາຈາກພາຍຸຊາຍຮອບ 2 ໃນໄລຍະ 2 ອາທິດ ທີ່ຫອບເອົາຝຸ່ນລະອອງຂະໜາດນ້ອຍທີ່ເປັນພິດລະດັບສູງ ຈາກທະເລຊາຍໃນປະເທດມອງໂກເລຍ ລວມທັງຈາກທະເລຊາຍທາງຕາເວັນຕົກສຽງເໜືອຂອງປະເທດ.
ເຊິ່ງເຮັດໃຫ້ການແນມເຫັນໃນເມືອງຫລວງຂອງຈີນຫລຸດລົງ ປາຍຍອດຂອງຕຶກສູງຫລາຍແຫ່ງຖືກບົດບັງດ້ວຍພາຍຸຊາຍ ແລະ ປະຊາຊົນຕ້ອງໃສ່ແວ່ນຕາ ເນື່ອງຈາກພາຍຸຝຸ່ນພັດແຮງຢູ່ຕາມຖະໜົນ.
ຂະນະທີ່ ລາຍງານດັດຊະນີຄຸນນະພາບອາກາດຢ່າງເປັນທາງການຂອງນະຄອນຫລວງປັກກິ່ງ ຂຶ້ນສູ່ລະດັບສູງສຸດ 500 ໂດຍຄ່າອະນຸພາກຝຸ່ນລະອອງຂະໜາດນ້ອຍ PM10 ສູງເກີນ 2.000 ໄມໂຄຣກຣຳຕໍ່ຄິວບິກແມັດ ໃນຫລາຍເຂດຂອງເມືອງ, ສ່ວນຄ່າ PM2,5 ສູງເກີນ 300 ໄມໂຄຣກຣຳຕໍ່ຄິວບິກແມັດ ສູງກວ່າຄ່າມາດຕະຖານຂອງນະຄອນຫລວງປັກກິ່ງ 35 ໄມໂຄຣກຣຳຫລາຍເທົ່າ.
ເຖິງຢ່າງໃດກໍຕາມ, ນະຄອນຫລວງປັກກິ່ງອາດຜະເຊີນພາຍຸຊາຍອີກໃນເດືອນເມສາ ເນື່ອງຈາກສະພາບອາກາດບໍ່ເອື້ອອຳນວຍໃນປີນີ້.
