ທ່ານ ວຽງສະຫວັດ ສີພັນດອນ ຂຶ້ນເປັນລັດຖະມົນຕີກະຊວງ ຍທຂ ຜູ້ໃໝ່ ຢ່າງເປັນທາງການ

ວັນທີ 29 ມີນາ 2021 ກະຊວງໂຍທາທິການ ແລະ ຂົນສົ່ງ (ຍທຂ) ໄດ້ຈັດພິທີມອບ – ຮັບໜ້າທີ່ລັດ ຖະມົນຕີກະຊວງ ຍທຂ ລະຫວ່າງ ທ່ານ ບຸນຈັນ ສິນທະວົງ ລັດຖະມົນຕີກະຊວງ ຍທຂ ຜູ້ເກົ່າ ແລະ ທ່ານ ວຽງສະຫວັດ ສີພັນດອນ  ຜູ້ໃໝ່  ຢ່າງເປັນທາງການ ໂດຍການໃຫ້ກຽດເຂົ້າຮ່ວມຂອງ ທ່ານ ກິແກ້ວ ໄຂຄໍາພິທູນ ກໍາມະການກົມການ ເມືອງສູນກາງພັກ ຮອງນາຍົກລັດຖະມົນຕີ.

ຕາມມະຕິຂອງກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ IX ສະບັບເລກທີ 9/ສພຊ ລົງວັນທີ 22/3/2021 ວ່າດ້ວຍການຮັບຮອງເອົາ ໂຄງປະກອບກົງຈັກລັດຖະບານ ແລະ ສະມາຊິກລັດຖະບານ ໂດຍໄດ້ແຕ່ງຕັ້ງໃຫ້ທ່ານ ວຽງສະຫວັດ ສີພັນດອນ ເປັນລັດຖະມົນຕີກະຊວງໂຍທາທິການ ແລະ ຂົນສົ່ງ ຜູ້ໃໝ່ ແລະ ດຳລັດຂອງປະທານປະເທດ ສປປ ລາວ ເລກທີ 116/ປປທ ລົງວັນທີ 24 ມີນາ 2021 ວ່າດ້ວຍການພັກການ-ຮັບອຸດໜູນບຳນານ ໂດຍໄດ້ອະນຸມັດໃຫ້ ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຜູ້ເກົ່າ) ອອກພັກການ-ຮັບອຸດໜູນບຳນານ.