ປະຊາຊົນຢູ່ເຂດຊົນນະບົດ ໄດ້ເຂົ້າເຖິງໂພຊະນາການ

ແຂວງຫົວພັນແມ່ນແຂວງໜຶ່ງ ທີ່ປະຊາຊົນຢູ່ເຂດຫ່າງໄກຊອກຫລີກ ໄດ້ເຂົ້າເຖິງໂພຊະນາການ, ເຊິ່ງເຫັນໄດ້ວ່າດັດສະນີການຂາດສານອາຫານຂອງເດັກນ້ອຍ ແມ່ນປະມານຈັດຕັ້ງປະຕິບັດໄດ້ 12% ທຽບໃສ່ເປົ້າໝາຍແມ່ນສາມາດບັນລຸໄດ້ຕາມຄາດໝາຍ ໂດຍການວຽກງານຮ່ວມມືກັບໂຄງ ການປັບປຸງດ້ານໂພຊະນາການ ຢູ່ 30 ບ້ານ ແຂວງຫົວພັນ, ເຊິ່ງມີຫລາຍກິດຈະກໍາໄດ້ຮັບການສົ່ງເສີມ ແລະ ໄດ້ຮັບການພັດທະນາ.

ທ່ານ ວິລະພອນ ພົມວົງສີ ຫົວໜ້າພະແນກສາທາລະນະສຸກແຂວງຫົວພັນ ໄດ້ໃຫ້ສຳພາດຕໍ່ນັກຂ່າວ ເມື່ອອາທິດຜ່ານມານີ້ວ່າ: ແຂວງຫົວພັນ ໄດ້ຮັບທຶນຊ່ວຍເຫລືອ ຈາກອົງການຈັດຕັ້ງສາກົນຕ່າງໆ ນັບແຕ່ປີ 2018 ເປັນຕົ້ນມາ, ໜຶ່ງໃນນັ້ນກໍແມ່ນໂຄງການຊ່ວຍເຫລືອ ຈາກສະຫະພາບເອີຣົບ (EU) ແລະ ອົງການອຸຍນີເຊັບ (UNICEF) ຢູ່ແຂວງຫົວພັນ ໂດຍຈັດຕັ້ງບັນດາກິດຈະກຳຢູ່ເມືອງຊຳເໜືອ ຈຳນວນ 30 ບ້ານ. ໃນນັ້ນ, ປະກອບມີກິດຈະກໍາລ້ຽງລູກດ້ວຍນົມແມ່ 1.000 ວັນ, ການສະໜອງດ້ານການບໍລິໂພກອາຫານ, ດ້ານໂພຊະນາການຕ່າງໆ, ຈັດຫານ້ຳສະອາດ, ສົ່ງເສີມປະຊາ ຊົນເປັນເຈົ້າດ້ານສຸຂະອະນາໄມ, ສ້າງກອງທຶນສຳລັບແມ່ຍິງບ້ານ, ສົ່ງເສີມການຕ່ຳຫູກທໍ່ໄໝ ແລະ ອື່ນໆ.

ເລີ່ມແຕ່ມີໂຄງການດັ່ງກ່າວ, ເຫັນໄດ້ວ່າຕົວຊີ້ວັດຕ່າງໆ ຢູ່ຂັ້ນບ້ານ ມີການປ່ຽນແປງ ແລະ ພັດທະນາດີຂຶ້ນ ໂດຍສະເພາະ ການປ່ຽນແປງດ້ານພຶດຕິກຳຂອງປະຊາຊົນ ຕໍ່ວຽກງານໂພຊະນາການ, ໃນນັ້ນອົງການອຸຍນີເຊັບ ໄດ້ໃຫ້ການຊ່ວຍເຫລືອນ້ຳສະອາດ, ນ້ຳລິນ, ວິດຖ່າຍ, ໂຮງຮຽນ, ໃຫ້ຄວາມຮູ້ພື້ນຖານ ກ່ຽວກັບດ້ານການຮັກສາສຸຂະພາບແມ່ ແລະ ເດັກ ໂດຍການໂຄສະນາຜ່ານໂປສເຕີ, ປຶ້ມ, ແຜນພັບ ແລະ ໄດ້ສົ່ງເສີມດ້ານທຶນຮອນໃນການເຮັດກິດຈະກຳ ເຊື່ອມສານໃຫ້ແກ່ປະຊາຊົນ ເຊັ່ນ: ການສັກຢາກັນພະຍາດ, ວຽກງານດ້ານໂພຊະນາການ, ຊັ່ງນ້ຳໜັກ, ແທກລວງສູງໃຫ້ແກ່ເດັກນ້ອຍໃນລຸ່ມ 5 ປີ, ກິດຈະກຳຝາກທ້ອງແມ່ຍິງຖືພາ, ການວາງແຜນຄອບຄົວ, ການໃຫ້ຄວາມຮູ້ດ້ານສຸຂະສຶກສາ ແລະ ການຢ້ຽມຢາມຫລັງເກີດຂອງພະນັກງານແພດໝໍ.

ທ່ານ ວິລະພອນ ພົມວົງສີ ກ່າວຕື່ມວ່າ: ເຖິງວ່າໂຄງການດັ່ງກ່າວ, ຈະສິ້ນສຸດລົງໃນວັນທີ 15 ທັນວາ 2021 ນີ້, ແຕ່ຢາກໃຫ້ອົງການຈັດຕັ້ງສາກົນຕ່າງໆ ກໍຄື ສະຫະພາບເອີຣົບ ແລະ ອົງ ການອຸຍນີເຊັບ ສືບຕໍ່ໃຫ້ການສະໜັບສະໜູນຊ່ວຍເຫລືອ ປັບປຸງວຽກງານໂພຊະນາການ ແລະ ວຽກງານຕ່າງໆ ໃຫ້ແກ່ປະຊາຊົນແຂວງຫົວພັນຕື່ມອີກ.