ພາຍຫຼັງພົບປະລະດັບສູງ ຄວາມຫວັງກັບຄືນການຄ້າສະຫະລັດ-ຈີນ ຍັງມືດມົນ

ຜູ້ຕາງໜ້າການຄ້າຂອງສະຫະລັດທ່ານ Katherine Tai, ວັນທີ 29 ມີນານີ້ ໃຫ້ຮູ້ວ່າ ການພົບປະເຈລະຈາການຄ້າ ສະຫະລັດ-ຈີນ ຈະມີຂຶ້ນໃນເວລາທີ່ເໝາະສົມ.

ຫ້ອງການຜູ້ຕາງໜ້າການຄ້າຂອງສະຫະລັດ ໃຫ້ຮູ້ວ່າ ທ່ານນາງ Tai ໄດ້ແລກປ່ຽນຄຳຄິດເຫັນກັບເຈົ້າໜ້າທີ່ການຄ້າສາກົນປະມານ 14 ຄົນ  ໃນວັນທຳອິດຂອງການຂຶ້ນຮັບຕຳແໜ່ງໃໝ່ ແຕ່ໃນນັ້ນບໍ່ໄດ້ມີຊື່ຂອງທ່ານຮອງນາຍົກລັດຖະມົນຕີຈີນທ່ານ Luu Hac ຊຶ່ງເປັນຫົວໜ້າຄະນະເຈລະຈາການຄ້າຈີນກັບສະຫະລັດອາເມລິກາ.

ການເຈລະຈາການຄ້າສະຫະລັດ-ຈີນ ໄລຍະທີ ໜຶ່ງມີຂໍ້ກຳນົດວ່າ ຜູ້ຕາງໜ້າການຄ້າຂອງສະຫະລັດຈະພົບປະກັບຮອງນາຍົກລັດຖະມົນຕີຂອງຈີນ 6 ເດືອນໃດເທື່ອໜຶ່ງ ແຕ່ກາຍໄປ 2 ເດືອນແລ້ວ ຍັງບໍ່ເຫັນຫຍັງເກີດຂຶ້ນ ແລະ ກໍບໍ່ໄດ້ມີແຜນຫຍັງເລີຍໃຫ້ແກ່ການພົບປະ.

ໃນອາທິດທີ່ຜ່ານມາ, ກະຊວງການຄ້າຈີນ ກ່າວວ່າ: “ຍັງບໍ່ທັນມີຂໍ້ມູນໃດທີ່ພົວພັນ” ເຖິງການເປັນໄປໄດ້ທີ່ສອງຝ່າຍຈະພົບປະການຄ້າໄລຍະສອງ, ເຖິງແມ່ນວ່າ ລັດຖະມົນຕີການຕ່າງປະເທດສະຫະລັດ Antony Blinken ແລະ ທີ່ປຶກສາຄວາມໝັ້ນຄົງຂອງທຳນຽບຂາວ ທ່ານ Jake Sullivan ຫວ່າງບໍ່ດົນມານີ້ ໄດ້ມີການພົບປະກັບລັດຖະມົນຕີການຕ່າງປະເທດຈີນທ່ານ ຫວັງອີ້ ແລະ ສະມາຊິກກົມການເມືອງຂອງຈີນທ່ານ ເຢືອງຄຽດຈິ ຢູ່ທີ່ ອາລາສກາແລ້ວ ກໍຕາມ.

ທ່ານນາງ Tai ຢືນຢັນວ່າ ການລົງໂທດທາງດ້ານພາສີຂອງສະຫະລັດອາເມລິກາຕໍ່ກັບສິນຄ້ານຳເຂົ້າຈາກຈີນແມ່ນຍັງຄືເກົ່າ. ໃນລະຫວ່າງເດືອນກຸມພາຜ່ານມາ ລັດຖະມົນຕີກະຊວງການເງິນຂອງສະຫະລັດທ່ານ Janet Yellen ຢືນຢັນວ່າ ມາດຕະການຂຶ້ນພາສີຂອງ ທຣຳ ຍັງຈະສືບຕໍ່ນຳໃຊ້ໃນໄຍະນີ້.

ຄາດວ່າ ຈີນ ຈະຊື້ສິນຄ້າ ແລະ ການບໍລິການຂອງສະຫະລັດເພີ່ມເຕີມ 200 ຕື້ໂດລາ ໃນຮອບ 2 ປີ ພາຍຫຼັງມີການຕົກລົງກັນໃນເດືອນມັງກອນ 2020 ແຕ່ຂໍ້ມູນຫຼ້າສຸດຊີ້ໃຫ້ເຫັນວ່າ ເມື່ອຮອດເດືອນກຸມພາປີນີ້ ຈີນຫາກໍປະຕິບັດໄດ້ພຽງ 76% ຂອງແຜນການນຳເຂົ້າສິນຄ້າຈາກສະຫະລັດ ແລະ 57% ເປົ້າໝາຍສົ່ງອອກໄປສະຫະລັດ.