ມາດຕະການ ແລະ ນະໂຍບາຍໃໝ່ໆໃນຫວຽດນາມ

- advert banner 728 90 728x90 - ມາດຕະການ ແລະ ນະໂຍບາຍໃໝ່ໆໃນຫວຽດນາມ

ໂດຍ: ວິ​ເສດ ສະ​ແຫວ​ງສຶກສາ

ບົດ​ນີ້ ສັງ​ລວມ​ເອົາ​ນະ​ໂຍບາຍ ກໍ​ຄືລະບຽບ​ການ​ໃໝ່​ໆ​ຢູ່ ສສ ຫວຽດນາມ ​ເພື່ອ​ຄຸ້ມ​ຄອງ​ລັດ, ຄຸ້ມ​ຄອງ​ເສດຖະກິດ-ສັງຄົມ ​ເຊັ່ນ​ຂ່າວ​ໃນ​ກາງ​ເດືອນ​ມິຖຸນາ​ຜ່ານ​ມາ ​ໄດ້​ເວົ້າ​ເຖິງ​ການ​ຮັບຮອງ​ເອົາ​ກົດໝາຍສະໜັບສະໜູນ​ທຸລະ​ກິດ​ຂະໜາດ​ນ້ອຍ ​ແລະ ຂະໜາດ​ກາງ ​ໂດຍ​ສະ​ມາ​ຊິກ​ສະພາ​ແຫ່ງ​ຊາດ​ຫວຽດນາມ. ຜົນ​ການ​ລົງ​ຄະ​ແນນ​ສຽງ​ຮັບຮອງ​ນັ້ນມີ​ສຽງ​ເຖິງ 83% ຂອງ​ຈຳນວນ​ສະມາຊິກ​ທັງ​ໝົດ. ນີ້​ສະ​ແດງ​ໃຫ້​ເຫັນ​ວ່າ: ກົດໝາຍ​ມີ​ຄວາມ​ສຳຄັນ​ຍິ່ງ​ຕໍ່​ພາລະກິດ​ພັດທະນາ​ປະ​ເທດ​ຊາດ​ໃນ​ຍຸກ​ເຊື່ອມ​ໂຍງ​ພາກພື້ນ ​ແລະ ສາກົນ. ພາຍ​ໃຕ້​ກົດໝາຍ​ດັ່ງກ່າວ, ທຸລະ​ກິດ​ຂະໜາດ​ນ້ອຍ ​ແລະ ກາງ​ຈະ​ສາມາດ​ເຂົ້າ​ເຖິງ​ກອງທຶນ​ສິນ​ເຊື່ອ​ສະດວກ​ສະບາຍ​ຂຶ້ນ, ​ໄດ້​ຮັບ​ນະ​ໂຍບາຍ​ພາສີ​ທີ່​ກະຕຸກ​ຊຸກຍູ້, ມີ​ພື້ນທີ່​ສຳລັບ​ການ​ຜະລິດ​, ​ເຂົ້າ​ເຖິງ​ເຕັກ​ໂນ​ໂລ​ຊີ​ທີ່​ທັນ​ສະ​ໄໝ, ສາມາດ​ຂະຫຍາຍ​ຕະຫລາດ​ສຳລັບ​ຜະລິດ​ຕະພັນ, ​ໄດ້​ຮັບ​ການ​ແນະນຳ ​ແລະ ການ​ຊ່ວຍ​ເຫລືອ​ທາງ​ກົດໝາຍ ກໍ​ຄື​ການ​ພັດທະນາ​ຊັບພະຍາກອນ​ມະນຸດ​ໃຫ້​ມີ​ຄຸນ​ນະພາ​ບ ​ແລະ ມີ​ກຳລັງ​ໃນ​ການ​ແຂ່ງຂັນ​ສູງ. ກົດໝາຍ​ສະໜັບສະໜູນ​ທຸລະ​ກິດ​ຂະໜາດ​ນ້ອຍ ​ແລະ ກາງ​ປະກອບ​ດ້ວຍ​ເນື້ອ​ໃນ​ທີ່​ມີ​ຊັດ​ສ່ວນລະອຽດ ​ເຊັ່ນ​ຫລັກການ, ​ແຫ​ລ່ງປັດ​ໄຈ ​ແລະ ຄວາມ​ຮັບຜິດຊອບ​ຂອງ​ການຈັດຕັ້ງທີ່​ກ່ຽວຂ້ອງ ກໍ​ຄື​ສ່ວນ​ບຸກຄົນ. ອີກ​ເລື່ອງ​ໜຶ່ງ​ທີ່​ເປັນ​ຂ່າວ​ກ່ຽວ​ກັບ​ຫວຽດນາມ ກໍ​ຄື​ທາງ​ກະຊວງ​ປ້ອງ​ກັນ​ຄວາມ​ສະຫງົບ​ຂອງ​ປະ​ເທດ​ນີ້​ໄດ້​ມອບ​ໝາຍ​ໃຫ້​ກົມ​ຄວບ​ຄຸມ​ຄວາມ​ປອດ​ໄພ​ຂອງ​ເຄືອ​ຂ່າຍ​ອິນ​ເຕີ​ເນັດ ​ເຊັ່ນ​ຂໍ້​ຕົກລົງ​ກັບ​ບໍລິສັດ​ສາຍ​ການບິນ​ຫວຽດນາມ ​ເພື່ອ​ຮ່ວມ​ກັນ​ປ້ອງ​ກັນ​ການ​ໂຈມ​ຕີ​ລະບົບ​ອິນ​ເຕີ​ເນັດ ທັງ​ນີ້​ກໍ​ເພາະວ່າ​ຂະ​ແໜງ​ການບິນ ບໍ່​ວ່າ​ຈະ​ເປັນ​ຂອງ​ປະ​ເທດ​ໃດ​ກໍ​ລ້ວນ​ແຕ່​ຈຳ​ເປັນ​ຕ້ອງ​ໄດ້​ນຳ​ໃຊ້​ເຕັກ​ໂນ​ໂລ​ຊີ​ສື່ສານ​ຫລາຍ​ທີ່​ສຸດ​ໃນ​ການ​ປະຕິບັດ​ງານ. ການ​ຈູ່​ໂຈມ​ລະບົບ, ຂໍ້​ມູນ​ຂ່າວສານ​ຂອງ​ການບິນ​ນັ້ນ ຖື​ເປັນ​ການ​ຂົ່ມຂູ່​ທີ່​ອັນຕະລາຍ​ທີ່​ສຸດ. ພາຍ​ໃຕ້​ຂໍ້​ຕົກລົງ​ດັ່ງກ່າວ, ທາງ​ກະຊວງ​ປ້ອງ​ກັນ​ຄວາມ​ສະຫງົບ ​ແລະ ບໍລິສັດ​ສາຍ​ການບິນ​ຫວຽດນາມ ຈະ​ໄດ້​ຮ່ວມ​ກັນ​ກວດກາ​ຕີ​ລາຄາ​ກ່ຽວ​ກັບ​ຄວາມ​ປອດ​ໄພ​ຂອງ​ການ​ບິນ, ຮ່ວມ​ກັນ​ຊອກ​ຮູ້ ​ແລະ ປ້ອງ​ກັນ​ໄວ້​ລ່ວງ​ໜ້າ​ທຸກ​ການ​​ໂຈມ​ຕີ​ທາງ​ເຄືອ​ຂ່າຍ​ອິນ​ເຕີ​ເນັດ​ທີ່​ອາດ​ຈະ​ມີ​ຂຶ້ນ ​ໂດຍ​ຈະ​ໄດ້​ຈັດການ​ສຳ​ມະ​ນາ​ເຝິກອົບຮົມ​ດ້ານ​ວິຊາ​ການ​ທີ່​ຈຳ​ເປັນ. ທ່ານ ຮວງ​ເຟືອ​ກທວນ (Hong Phuoc Thuan) ຫົວໜ້າ​ກົມ​ຄວບ​ຄຸມ​ຄວາມ​ປອດ​ໄພ​ເຄືອ​ຂ່າຍ​ອິນ​ເຕີ​ເນັດ ກະຊວງ​ປ້ອງ​ກັນ​ຄວາມ​ສະຫງົບ​ຫວຽດນາມ ມີ​ຄຳ​ເຫັນ​ກ່ຽວ​ກັບ​ບັນຫາ​ນີ້​ວ່າ: ຄວາມ​ປອດ​ໄພ​ຂອງ​ເຄືອ​ຂ່າຍ​ອິນ​ເຕີ​ເນັດ​ໃນ​ໂລກ​ປັດຈຸບັນ​ປະສົບ​ກັບ​ບັນຫາ​ສັບສົນ​ນັບ​ມື້ນັບ​ເພີ່ມ​ທະວີ​ຂຶ້ນ ​ໂດຍ​ສະ​ເພາະ​ແມ່ນ​ໃນ​ກົນ​ໄກ​ສະໜອງ​ຂໍ້​ມູນ​ຂ່າວສານ​ທີ່​ສຳຄັນ ​ເຊິ່ງ​ໃນ​ນັ້ນລວມທັງ​ໃນ​ຂະ​ແໜງ​ການບິນ​ດ້ວຍ.

- Tiger Head 728x90 - ມາດຕະການ ແລະ ນະໂຍບາຍໃໝ່ໆໃນຫວຽດນາມ
- 1 1 - ມາດຕະການ ແລະ ນະໂຍບາຍໃໝ່ໆໃນຫວຽດນາມ

​ເລື່ອງຕໍ່​ໄປ​ແມ່ນ​ກ່ຽວ​ກັບ​ໝາຍໝັ້ນຄັ້ນມື​ຂອງ​ທາງ​ການ​ຫວຽດນາມ​ກ່ຽວ​ກັບ​ແຜນ​ປັດ​ເຂ່ຍ​ລົດຈັກ​ອອກ​ຈາກ​ວົງ​ສັນຈອນ​ພາຍ​ໃນ​ນະຄອນຫລວງ​ຮ່າ​ໂນ້ຍ​ໃຫ້​ໄດ້​ໃນ​ປີ 2030 ​ແນ​ໃສ່​ແກ້​ໄຂ​ບັນຫາ​ການ​ຈະລາຈອນ​ແອ​ອັດ, ມົນ​ລະ​ພິດ​ທາງ​ອາກາດ ​ແລະ ​ແນ່ນອນ​ທັງ​ເພື່ອ​ຫລຸດຜ່ອນ​ອຸປະຕິ​ເຫດ​ທີ່​ມັກ​ເກີດ​ຂຶ້ນກັບ​ລົດຈັກ​ໃນ​ອັດຕາ​ສູງ. ​ໄປ​ພ້ອມໆ​ກັບ​ແຜນ​ຫ້າມ​ໃຊ້​ລົດຈັກ​ພາຍ​ໃນ​ນະຄອນຫລວງ​ນີ້, ທາງ​ການ​ກໍ​ໄດ້​ດຳ​ເນີນ​ການ​ປັບປຸງ​ລະບົບ​ໂດຍສານ​ລວມໝູ່​ໃຫ້​ສະດວກ​ສະບາຍ, ວ່ອງ​ໄວ ​ແລະ ​ເປັນ​ທີ່​ໄວ້​ໃຈ​ໄດ້​ຂອງ​ຜູ້​ຊົມ​ໃຊ້. ຂ່າວ​ຈາກ​ຜູ້​ໄປ​ເຫັນ​ມາ​ກັບ​ຕາ​ກ່ຽວ​ກັບ​ເລື່ອງ​ນີ້​ໃຫ້​ຮູ້​ວ່າ: ທາງ​ການ​ຮ່າ​ໂນ້ຍ​ໄດ້​ເລີ່​ມທົດ​ລອງ​ນຳ​ໃຊ້​ລົດ​ໂດຍສານ​ສາທາລະນະ​ທີ່​ທັນ​ສະ​ໄໝ, ສະດວກ​ສະບາຍ ພ້ອມ​ທັງ​ມີ​ສິ່ງ​ອຳນວຍ​ຄວາມ​ສະດວກ​ຢູ່​ບາງ​ເສັ້ນທາງ​ແລ້ວ. ​ເລື່ອງ​ທີ່​ຂໍ​ເອົາ​ມາ​ປິດ​ທ້າຍ​ບົດ​ນີ້​ແມ່ນ​ກ່ຽວ​ກັບ​ຄຳ​ສະ​ເໜີ​ຂອງ​ນາຍົກລັດຖະມົນຕີຫວຽດນາມ ທ່ານ ຫງວຽນ​ຊວນ​ຟຸກ ​ໃຫ້​ບັນດາ​ກະຊວງ, ສຳນັກງານ, ອົງການ​ຂອງ​ລັດ ​ເອົາ​ໃຈ​ໃສ່​ແກ້​ໄຂ, ຕອບ ຫລື ​ໃຫ້​ຄວາມ​ກະຈ່າງ​ແຈ້ງ​ໂດຍ​ໄວ​ຕໍ່​ຄຳ​ຖາມ ກໍ​ຄື​ຄວາມ​ຂັດຂ້ອງ​ໝອງ​ໃຈ​ຂອງ​ປະຊາຊົນ ກໍ​ຄື​ບໍລິສັດ​ຕ່າງໆ​ກ່ຽວ​ກັບ​ບັນຫາ​ຕ່າງໆ​ທີ່​ສົ່ງ​ເຖິງ​ພາກສ່ວນ​ກ່ຽວຂ້ອງ. ການ​ແກ້​ໄຂ​ນັ້ນຕ້ອງ​ໃຫ້​​ເປັນ​ໄປ​ຕາມ​ລະບຽບ​ການ​ກ່ຽວ​ກັບ​ຂັ້ນຕອນ​ການ​ຮັບ, ການຄົ້ນຄວ້າ​ພິຈາລະນາ ​ແລະ ການ​ແກ້​ໄຂ​ບັນຫາ​ທີ່​ໄດ້​ຮັບ​ມາ.

error: Content is protected !!