6 ວິທີກວດເບິ່ງວ່າທ່ານມີຄວາມເຄັ່ງຄຽດສະສົມຈາກການເຮັດວຽກຫລືບໍ່ ?
March 30, 2021 - 3:36 PM
ການນັ່ງເຮັດວຽກຢູ່ໂຕະເປັນເວລາດົນໆ ອາດຈະມີຄວາມເຄັ່ງຄຽດສະສົມເກີດຂຶ້ນ. ອາການທີ່ພົບໄດ້ແມ່ນເຈັບຫົວ, ປວດຕາ, ປວດກ້ານຄໍ, ປວດບ່າໄຫລ່, ປວດຫລັງ, ເຈັບແອວ, ເຄັ່ງ, ເກັງກ້າມຊີ້ນ … ຫາກເປັນແບບນີ້ດົນໆອາດຈະເຮັດໃຫ້ເກີດພະຍາດອື່ນໆຕາມມາໄດ້. ມື້ນີ້ພວກເຮົາມີ 6 ວິທີຄາຍຄຽດ ເພື່ອກວດເບິ່ງວ່າທ່ານມີຄວາມເຄັ່ງຄຽດສະສົມຈາກການເຮັດວຽກຫລືບໍ່ມາແນະນຳບັນດາທ່ານ ດັ່ງນີ້ :
- ທ່ຽວພັກຜ່ອນໃນມື້ພັກ : ໃນມື້ພັກໃຫ້ໄປທ່ຽວໃນສະຖານທີ່ທ່ອງທ່ຽວທີ່ທ່ານມັກ ເຖິງວ່າການເດີນທາງຈະໄກ ແລະ ເມື່ອຍກໍຕາມ ເປັນຕົ້ນແມ່ນໄປທ່ຽວຕ່າງແຂວງ, ຂຶ້ນພູ, ສ່ອງນົກເບິ່ງສັດປ່າ, ເບິ່ງນຳ້ຕົກຕາດ ຫລື ແຫ່ລງທ່ອງທ່ຽວທຳມະຊາດຕ່າງໆ ຫລັງຈາກທ່ຽວກັບມາແລ້ວອາການປວດເຄັ່ງຫລຸດລົງ ສະແດງວ່າການພັກຜ່ອນໃນມື້ພັກຂອງທ່ານຄາຍຄວາມເຄັ່ງຄຽດທີ່ສະສົມມາຈາກການເຮັດວຽກໄດ້.
- ປ່ຽນສະຖານທີ່ເຮັດວຽກ : ຫາກທ່ານລອງປ່ຽນສະຖານທີ່ເຮັດວຽກ ຫລື ລອງອອກໄປເຮັດວຽກນອກສະຖານທີ່ ໂດຍຮັກສາຮູບແບບໂຕະ, ຕັ່ງໄວ້ຄືເກົ່າ ແລ້ວພົບວ່າເຮັດວຽກໄດ້ດີຂຶ້ນ ສະແດງວ່າທ່ານມີຄວາມເຄັ່ງຄຽດສະສົມຢູ່ພໍສົມຄວນ.
- ຈັດໂຕະໃໝ່ : ການຈັດໂຕະໃໝ່ໃຫ້ເບິ່ງສົດຊື່ນ, ສະອາດ, ເປັນລະບຽບຮຽບຮ້ອຍ, ເປີດເພງເບົາໆຟັງ, ເອົາກະຖາງດອກໄມ້ທີ່ທ່ານມັກມາວາງ ເພື່ອຜ່ອນຄາຍຄວາມເຄັ່ງຄຽດ ແລ້ວພົບວ່າການເຮັດວຽກດີຂຶ້ນ ສະແດງວ່າທ່ານມີຄວາມເຄັ່ງຄຽດສະສົມຈາກການເຮັດວຽກ.
- ຮັບອາສາເຮັດວຽກໃຫ້ກັບຄົນທີ່ທ່ານຮັກ : ການທີ່ທ່ານຮັບອາສາເຮັດວຽກໃຫ້ກັບຄົນທີ່ທ່ານຮັກ ອາດຈະເປັນໝູ່, ຄົນຮັກ ຫລື ຄອບຄົວ ແລະ ວຽກທີ່ທ່ານອາສາຊ່ວຍເປັນວຽກທີ່ທ່ານມັກ ແລະ ເຕັມໃຈເຮັດນຳແລ້ວ ເຖິງຈະເຮັດໃນສະຖານທີ່ເຮັດວຽກເກົ່າທຸກຢ່າງກໍຕາມ ຫາກພົບວ່າຫລັງເຮັດວຽກອາສາສຳເລັດແລ້ວ ຮູ້ສຶກດີຂຶ້ນ ສະແດງວ່າທ່ານມີຄວາມເຄັ່ງຄຽດສະສົມຈາກວຽກປະຈຳຂອງທ່ານ.
- ມີກິດຈະກຳທີ່ຕັ້ງໃຈລໍຖ້າຢູ່ຫລັງເລີກວຽກ : ເຖິງຈະເຮັດວຽກຕາມປົກກະຕິຄືເກົ່າທຸກຢ່າງ, ແຕ່ໃນຕອນແລງມື້ນັ້ນມີງານລ້ຽງສັງສັນ ຫລື ກິດຈະກຳທີ່ຕັ້ງໃຈລໍຖ້າທີ່ຈະເຂົ້າຮ່ວມຢູ່ ເຮັດໃຫ້ຮູ້ສຶກວ່າໂຕເບົາ, ບໍ່ມີອາການເຈັບປວດຄືແຕ່ລະມື້ທີ່ຜ່ານມາ ສະແດງວ່າທ່ານມີຄວາມເຄັ່ງຄຽດສະສົມ.
- ເຮັດວຽກບ່ອນເກົ່າ, ແຕ່ປັບປຸງສະຖານທີ່ : ເຖິງຈະມີວຽກຫລາຍ ບັນຫາໜັກຄືເກົ່າ, ແຕ່ເມື່ອລອງປ່ຽນຫ້ອງເຮັດວຽກ ບໍ່ວ່າຈະເປັນໂຕະ, ຕັ່ງ, ຜ້າກັ້ງ, ຜ້າພົມ, ເຟີນິເຈີອື່ນໆ ຫລື ເອີ້ນງ່າຍໆວ່າມີການປັບປ່ຽນປັບປຸງຫ້ອງເຮັດວຽກໃໝ່ໝົດຫ້ອງ ແລ້ວທ່ານຄົ້ນພົບວ່າເຮັດວຽກໄດ້ດີຂຶ້ນ, ອາການເຈັບປວດກ້າມຊີ້ນຫລຸດລົງ ສະແດງວ່າທ່ານມີຄວາມເຄັ່ງຄຽດສະສົມຈາກການເຮັດວຽກ ອາດຈະເກີດຈາກການນັ່ງໂຕະ, ຕັ່ງເຮັດວຽກທີ່ບໍ່ເໝາະສົມກັບຮູບຮ່າງທ່າທາງຂອງທ່ານ.
