ພະນັກງານເດີນອາກາດ ບໍ່ກັກຕົວ ແພ່ເຊື້ອໂຄວິດໃສ່ຄົນອື່ນ ຮັບໂທດຈຳຄຸກ 2 ປີ

ເຢືອງຕວນເຮົາ ອາຍຸ 29 ປີ, ພະນັກງານເດີນອາກາດຂອງບໍລິສັດ ຫວຽດນາມ ແອລາຍ, ຕອນເຊົ້າວັນທີ 30 ມີນານີ້ ຖືກສານປະຊາຊົນນະຄອນໂຮ່ຈິມິນ ຕັດສິນລົງໂທດຈຳຄຸກ 2 ປີ ໃນຂໍ້ຫາລະເມີດຂໍ້ຫ້າມຂອງບໍລິສັດໃນການປ້ອງກັນໂຄວິດ-19.

ສານຕັດສິນໂທດ ວັກ 1 ມາດຕາ 240 ກົດໝາຍອາຍາ ບໍ່ປະຕິບັດຕາມຂໍ້ກຳນົດຂອງກົດໝາຍວ່າດ້ວຍການປະຕິບັດມາດຕະການໄລຍະຫ່າງທາງສັງຄົມ ທີ່ສ້າງຜົນເສຍຫາຍຢ່າງຮ້າຍແຮງ. ເຖິງຢ່າງໃດກໍຕາມ ຈຳເລີຍໃຫ້ການຮ່ວມມື ແລະ ຈິງໃຈໃຫ້ການທີ່ເປັນປະໂຫຍດຕໍ່ຄະດີ, ເປັນຫົວຫນ້າຄອບຄົວ ເປັນເສົາຫລັກຕົ້ນຕໍລ້ຽງຄອບຄົວ, ຜູ້ເປັນພໍ່ກຳລັງນອນປ່ວຍ…ຈຶ່ງບໍ່ມີຄວາມຈຳເປັນຕ້ອງກັດຕົວ.

ເຢືອງຕວນເຮົາ ໃຫ້ການຕໍ່ສານວ່າ ຕົນເອງມາຈາກຍີ່ປຸ່ນເຂົ້າຫວຽດນາມເມື່ອວັນທີ 14 ພະຈິກ 2020 ແລະ ໄດ້ເຂົ້າກັກຕົວຢູ່ທີ່ສູນກັກກັນຂອງບໍລິສັດ ຫວຽດນາມ ແອລາຍ ຈັດໄວ້ ແຕ່ວັນທີ 14-18 ພະຈິກ 2020. ບໍລິສັດກຳນົດວ່າ: ສະມາຊິກຂອງຈຸບິນແຕ່ລະຄົນ ເມື່ອບິນກັບຄືນມາຕ້ອງກັກຕົວ, ບໍ່ໃຫ້ພົບປະຄອບຄົວຫລືໄກ້ສິດກັບບຸກຄົນໃດທັງນັ້ນ, ແຕ່ເຢືອງຕວນເຮົາກໍຍັງຝືນດື້ພົບກັບອີກສອງຄົນ ໃນຈຸບີນທີ່ກັບມາຈາກ ຣູມານີ ທີ່ກວດພົບວ່າຕິດເຊື້ອໂຄວິດ-19.

ພາຍຫຼັງກວດຫາເຊື້ອຜົນເປັນລົບ, ວັນທີ 18 ພະຈິກ 2020 ເຢືອງຕວນເຮົາ ໄດ້ເມືອກັກຕົວຢູ່ກັບເຮືອນ. ໃນເວລານັ້ນ ເຢືອງຕວນເຮົາ ພ້ອມກັບເພື່ອນຜູ້ຊາຍຄົນໜຶ່ງທີ່ໄດ້ໄປເຂົ້າຮ້ານອາຫານ, ດື່ມກາເຟ ແລະ ໄດ້ເຂົ້າຮ່ວມສອບເສັງພາສາອັງກິດໃນມະຫາວິທະຍາໄລ Sea-Intelligence.

ວັນທີ 28 ພະຈິກ 2020, ເຢືອງຕວນເຮົາ ແລະ ເພື່ອນຜູ້ນັ້ນ ມີຜົນກວດເປັນບວກ, ເຊິ່ງໄດ້ແພ່ເຊື້ອໃສ່ເດັກຄົນໜຶ່ງອາຍຸ 1 ປີ ແລະ ນັກສຶກສາຍິງຄົນໜຶ່ງໃນສູນພາສາອັງກິດ. ຜົນເສຍຫາຍທີ່ ເຢືອງຕວນເຮົາ ສ້າງຂຶ້ນໃຫ້ແກ່ຊຸມຊົນໃນຄັ້ງນີ້ສູງເຖິງ 4,475 ຕື້ດົງ ຊຶ່ງລວມທັງຄ່າໃຊ້ຈ່າຍການກວດຫາເຊື້ອ ຂອງຜູ້ໃກ້ສິດ ແລະ ການກັກຕົວຂອງກໍລະນີໃກ້ສິດ.

ເຢືອງຕວນເຮົາ ຍອມຮັບພຶດຕິກຳທີ່ຕົນສ້າງຂຶ້ນ ແຕ່ເນື່ອງຈາກວ່າມັນມີຫຼາຍປັດໄຈທີ່ນຳໄປເຖິງການແພ່ເຊືອ ຊຶ່ງຕົນເອງບໍ່ໄດ້ມີເຈດຕະນາ.