ສະຫະລັດ ຈະນຳໃຊ້ງົບປະມານ ລູກສອນໄຟ ຂີປານະວຸດ ໄປຄົ້ນຄວ້າ ເລື່ອງ ວັກຊີນ

ສຳນັກຂ່າວຕ່າງປະເທດ, ວັນທີ 30 ມີນານີ້ ໃຫ້ຮູ້ວ່າ ຮ່າງກົດໝາຍທີ່ກຳລັງສະເໜີຕໍ່ລັດຖະສະພາ ສະຫະລັດນັ້ນ ໄດ້ສະເໜີໃຫ້ສາມາດອະນຸຍາດນຳໃຊ້ງົບປະມານລູກສອນໄຟ ຂີປານະວຸດ ໄປຄົ້ນຄວ້າກ່ຽວກັບວິທີການປິ່ນປົວໂຄວິດ-19.

ສຳນັກຂ່າວສານ ສະປຸດນິກ ອ້າງຄຳຖະແຫຼງຂອງວຸດທິສະພາ Edward Markey ວ່າ: “ສະຫະລັດ ຄວນລົງທຶນໃຫ້ແກ່ການຄົ້ນຄວ້າວັກຊີນ ປ້ອງກັນໂຄວິດ-19 ໃຫ້ກວ້າງຂວາງ ກ່ອນທີ່ຈະຜະລິດອາວຸດທຳລາຍລ້າງຈາກໜ້າດິນຊະນິດໃໝ່. ກົດໝາຍ ICBM ມີສັນຍານເຕືອນວ່າ ໂລກຈະມີຄວາມປອດໄພຈາກອາວຸດນິວເຄຣຍ ແລະ ໃຫ້ບູລິມະສິດຕໍ່ຊີວິດຂອງຜູ້ຄົນ ດີກວ່າຈະຂ້າຟັນລັນແທງກັນ”.

ສະປຸດນິກໃຫ້ຮູ້ຕື່ມອີກວ່າ ຖ້າກົດໝາຍດັ່ງກ່າວຫາກຖືກຮັບຮອງ ກໍຈະສາມາດສະກັດກັ້ນການນຳໃຊ້ງົບປະມານລູກສອນໄຟໜ້າດີນປີ 2022 ໄວ້ໄດ້ ແລະ ຫັນງົບປະມານມາຮັບໃຊ້ໃນການຄົ້ນຄວ້າວັກຊີນປ້ອງກັນໂຄວິດ-19, ສ່ວນງົບປະມານທີ່ຈະນຳໃຊ້ເຂົ້າໃນການຜະລິດລູກສອນໄຟ ຕິດຫົວຮົບນິວເຄຣຍ W87-1 ນັ້ນ ໃຫ້ໂອນໃຫ້ສູນຄວບຄຸມ ແລະ ປ້ອງກັນໂຣກຂອງສະຫະລັດ(CDC).