H&M 6 ແຫ່ງຢູ່ຈີນ ຖືກຫ້າງສັບພະສິນຄ້າສັ່ງປິດແບບບໍ່ມີກຳນົດ ແລະ 500 ສາຂາຄົ້ນຫາບໍ່ໄດ້ແລ້ວໃນແອັບນຳທາງ
ຍັງເປັນວິກິດທີ່ລຸກລາມຕໍ່ເນື່ອງສຳລັບ H&M ຈາກກໍລະນີທີ່ຖືກຜູ້ບໍລິໂພກຊາວຈີນອອກມາຂວ້ຳບາດຈາກການອອກມາລະບຸວ່າ: ຈະບໍ່ມີການໃຊ້ຝ້າຍທີ່ມາຈາກພາກພື້ນຊິນຈຽງຂອງຈີນ ຫລັງຖືກລະບຸມາຈາກການບັງຄັບໃຊ້ແຮງງານ, ຫລ້າສຸດເຈົ້າຂອງພື້ນທີ່ໃຫ້ເຊົ່າໄດ້ສັ່ງປິດຮ້ານແບບບໍ່ມີກຳນົດ.
Bloomberg ລາຍງານວ່າ: ມີຮ້ານຂອງ H&M ຢ່າງໜ້ອຍ 6 ແຫ່ງໃນຈີນ ຖືກຫ້າງສັບພະສິນຄ້າ ເຊິ່ງເປັນເຈົ້າຂອງພື້ນທີ່ໃຫ້ເຊົ່າສັ່ງປິດ. ສື່ທ້ອງຖິ່ນລາຍງານວ່າ: ມີການນຳເອົາປ້າຍໂຄສະນາຂອງຍີ່ຫໍ້ H&M ອອກ. ຂະນະທີ່ H&M China ກ່າວກັບ Nikkei Asia ວ່າ: ຮ້ານຄ້າບາງແຫ່ງຢຸດດຳເນີນກິດຈະການ, ແຕ່ບໍ່ໄດ້ໃຫ້ລາຍລະອຽດ ແລະ ຍັງບໍ່ແນ່ນອນວ່າເປັນການປິດຖາວອນ ຫລື ບໍ່.
ຂະນະດຽວກັນ ຍັງມີລາຍງານວ່າ: ຮ້ານຄ້າຂອງ H&M ບໍ່ສາມາດຄົ້ນຫາໄດ້ອີກແລ້ວໃນ Baidu Maps ທີ່ຄ້າຍຄື Google Maps ຂອງຈີນ ລວມທັງບໍລິການແຜນທີ່ຂອງ Alibaba ໄດ້ລົບທີ່ຕັ້ງຮ້ານຄ້າຂອງ H&M ອອກ ເຊິ່ງໃນວັນທີ 30 ພະຈິກ 2020 H&M ເປີດດຳເນີນກິດຈະການຮ້ານຄ້າ 505 ແຫ່ງທົ່ວປະເທດຈີນ ຄິດເປັນ 5,2% ຂອງຍອດຂາຍທັງໝົດ ເຮັດໃຫ້ຈີນເປັນຕະຫລາດໃຫຍ່ອັນດັບ 4 ຂອງ H&M ຮອງຈາກເຢຍລະມັນ, ອາເມລິກາ ແລະ ອັງກິດ.
ກ່ອນໜ້ານີ້ ມີລາຍງານວ່າ: ຮ້ານຄ້າຢ່າງເປັນທາງການຂອງ H&M ໃນ Tmall ເຊິ່ງເປັນແພກຟອມອີຄອມເມີດຂອງ Alibaba ບໍ່ສາມາດເຂົ້າເຖິງໄດ້ນັບແຕ່ວັນທີ 24 ມີນາ. ຂະນະທີ່ People’s Daily ສື່ຢ່າງເປັນທາງການຂອງຈີນລາຍງານວ່າ: ການຄົ້ນຫາຜະລິດຕະພັນ H&M ໃນແພກຟອມ JD.com ແລະ Pinduoduo ບໍ່ພົບເນື້ອຫາໃດໆອີກຕໍ່ໄປ.
ວິກິດຄັ້ງນີ້ລຸກລາມຂຶ້ນ ຫລັງຈາກຖະແຫລງການຂອງ H&M ທີ່ເກີດຂຶ້ນໃນປີຜ່ານມາ ໄດ້ສະແດງຄວາມກັງວົນຕໍ່ລາຍງານການບັງຄັບໃຊ້ແຮງງານໃນຊິນຈຽງ ໂດຍຈະມີການຢຸດໃຊ້ຝ້າຍຈາກຊິນຈຽງ ແລະ ຕັດການພົວພັນກັບຜູ້ສະໜອງຂອງຈີນ. ຖະແຫລງການຄັ້ງນັ້ນໄດ້ຍົກຂຶ້ນມາບັນຫາອີກ ຫລັງໃນອາທິດຜ່ານມາ ສະຫະພາບເອີຣົບ, ອັງກິດ, ອາເມລິກາ ແລະ ການາດາ ໄດ້ກຳນົດມາດຕະການຂວ້ຳບາດກັບເຈົ້າໜ້າທີ່ລະດັບສູງຂອງຈີນ ທີ່ຖືກລະບຸວ່າ: ກ່ຽວຂ້ອງກັບການບັງຄັບໃຊ້ຊາວອຸຍກູໃນຊິນຈຽງ.
ທາງການຈີນໄດ້ອອກມາປະຕິເສດຂໍ້ກ່າວຫາເລື່ອງການລະເມີດສິດທິມະນຸດ ໃນການຖະແຫລງຂ່າວທີ່ຈັດໂດຍກະຊວງການຕ່າງປະເທດຂອງປະເທດໃນປັກກິ່ງ, ເຈົ້າໜ້າທີ່ລັດຖະບານຊິນຈຽງ ກ່າວວ່າ: ພາກພື້ນນີ້ໄດ້ເອົາຊະນະໄພຄຸກຄາມຈາກຄວາມຮຸນແຮງຂອງຜູ້ກໍ່ການຮ້າຍໃນອະດີດດ້ວຍສະຖຽນລະພາບທາງເສດຖະກິດ ແລະ ຄວາມໝັ້ນຄົງ ໂດຍບໍ່ຈຳເປັນຕ້ອງອະທິບາຍໃຫ້ລະອຽດ.
ອ້າງອີງ:
- https://www.bloomberg.com/…/who-chief-critiques-covid…
- https://www.businessinsider.com/hm-boycott-wiped-from…
- https://asia.nikkei.com/…/H-M-shops-in-China-forced-to…
