ທຳນຽບຂາວປະກາດມາດຕະການຕໍ່ຕ້ານ ການສ້າງຄວາມຮຸນແຮງຈາກຄວາມກຽດຊັງຊາວອາຊີ
ລັດຖະບານອາເມລິກາປະກາດຊຸດມາດຕະການເພື່ອຮັບມືກະແສການສ້າງຄວາມຮຸນແຮງຈາກຄວາມກຽດຊັງຊາວອາຊີທີ່ເພີ່ມຂຶ້ນ ເຊິ່ງລວມທັງກໍລະນີເກີດເຫດກວາດຍິງຮ້ານສະປາໃນແອດແລນຕາທີ່ມີຜູ້ຍິງອາຊີເສຍຊີວິດ 6 ຄົນ ໃນຕົ້ນເດືອນຜ່ານມາ.
ພາຍໃຕ້ຊຸດມາດຕະການດັ່ງກ່າວ ປະກອບມີການອະນຸມັດໃຊ້ງົບປະມານ 49,5 ລ້ານໂດລາສະຫະລັດ ຈາກກອງທຶນຊ່ວຍເຫລືອໂຄວິດ-19 ເພື່ອຊ່ວຍເຫລືອຊາວອາຊີ ແລະ ຊາວອາເມລິກາເຊື້ອສາຍອາຊີທີ່ຕົກເປັນເຫຍື່ອຄວາມຮຸນແຮງ ແລະ ຈັດຕັ້ງໜ່ວຍງານເພື່ອຕໍ່ຕ້ານແນວຄິດກຽດຊັງອາຊີ.
ຖະແຫລງການຈາກທຳນຽບຂາວຍັງລະບຸວ່າ: ກະຊວງຍຸຕິທຳອາເມລິກາກຳລັງວາງແຜນເພີ່ມການບັງຄັບໃຊ້ກົດໝາຍຕໍ່ການກໍ່ອາຊະຍາກຳທີ່ມຸ້ງເປົ້າໃສ່ຊາວອາຊີ ແລະ ຊາວອາຊີ-ອາເມລິກາ ແລະ ເຝົ້າລະວັງກໍລະນີກຽດຊັງເຊື້ອຊາດທີ່ເພີ່ມຂຶ້ນ.
ປະທານາທິບໍດີ ໂຈ ໄບເດັນ ກຽມແຕ່ງຕັ້ງຜູ້ອຳນວຍການຖາວອນ ເພື່ອເປັນຜູ້ນຳໃນການປະສານງານນະໂຍບາຍຂອງລັດຖະບານກາງທີ່ມີຕໍ່ຊຸມຊົນຊາວອາຊີ-ອາເມລິກາ, ຊົນພື້ນເມືອງຮາວາຍ ແລະ ຊຸມຊົນໃນໝູ່ເກາະປາຊີຟິກ ເຊິ່ງເປັນນະໂຍບາຍທີ່ລິເລີ່ມແຕ່ໃນຍຸກອະດີດປະທານາທິບໍດີ ບິລ ຄລິນຕັນ.
ຂະນະທີ່ທ່ານ ໄບເດັນ ຢືນຢັນວ່າ: ການກໍ່ອາຊະຍາກຳຕໍ່ຊາວອາຊີນັ້ນເປັນສິ່ງທີ່ຜິດ ແລະ ຕ້ອງຢຸດ.
ດ້ານກຸ່ມເຄື່ອນໄຫວສະໜັບສະໜູນຊາວອາຊີ-ອາເມລິກາ ແລະ ສສ ອາເມລິກາ ຕ່າງສະແດງຄວາມຍົກຍ້ອງໃນການເປັນຜູ້ນຳຂອງທ່ານ ໄບເດັນ ທີ່ກ້າຕັດສິນໃຈຄຸ້ມຄອງຄວາມປອດໄພ ແລະ ການເປັນຢູ່ຂອງຊາວອາຊີໃນອາເມລິກາ ເຊິ່ງຖືເປັນທ່າທີທີ່ຂັດແຍ່ງ ແລະ ສວນທາງກັບແນວທາງນະໂຍບາຍຂອງລັດຖະບານອະດີດປະທານາທິບໍດີ ໂດນັລ ທຣຳ.
ອ້າງອີງ:
https://www.reuters.com/…/us-usa-race-biden-idUSKBN2BM2JI
https://www.politico.com/…/biden-executive-actions-anti…
