ຫລັກທຳມະໃນປະຫວັດຄວາມເປັນມາຂອງປີໃໝ່ລາວ

ຫລັກທຳມະໃນປະຫວັດຄວາມເປັນມາຂອງປີໃໝ່ລາວ - 564 - ຫລັກທຳມະໃນປະຫວັດຄວາມເປັນມາຂອງປີໃໝ່ລາວ
ຫລັກທຳມະໃນປະຫວັດຄວາມເປັນມາຂອງປີໃໝ່ລາວ - Untitled design - ຫລັກທຳມະໃນປະຫວັດຄວາມເປັນມາຂອງປີໃໝ່ລາວ
ໂດຍ: ຄຳພຸດ ເທບພະນົມ ເທສະການປີໃໝ່ລາວ ຫຼື ເວົ້າອີກຢ່າງໜຶ່ງວ່າ “ກຸດສົງການ” ກໍນັບມື້ນັບຫຍັບຈໍ້ມໍ່ເຂົ້າມາ. ຫລາຍທ່ານຫລາຍ ຄົນກໍຄືຊາວລາວທັງຊາດ ຕ່າງກໍກຽມຈິດກຽມໃຈຕ້ອນຮັບວັນບຸນດັ່ງກ່າວນີ້ ເຊິ່ງເປັນປະເພນີທີ່ຍິ່ງໃຫຍ່ອັນໜຶ່ງ ທີ່ຊາວລາວເຮົາໄດ້ສືບທອດ ປະຕິບັດກັນມາແຕ່ບູຮານນະການເປັນຕົ້ນແມ່ນການຫົດສົງພະພຸດທະຮູບ ແລະ ພະສົງ, ຜູ້ເປັນພໍ່ເປັນແມ່, ເຖົ້າແກ່ອາວຸໂສເພື່ອຂໍພອນ, ການບາສີ ສູ່ຂວັນ, ແຫ່ນາງສັງຂານ, ຕົບພະທາດຊາຍ ແລະ ອື່ນໆ ໄດ້ກາຍເປັນສິ່ງທີ່ໂດດເດັ່ນໃນເທສະການບຸນປີໃໝ່ລາວ ຢ່າງເບີກບານມ່ວນຊື່ນ ແລະ ໜ້າຈັບອົກຈັບໃຈຂອງຜູ້ມາທ່ຽວຊົມ. ໃນປະຫວັດຄວາມເປັນມາຂອງບຸນປີໃໝ່ລາວເພິ່ນ ໄດ້ກ່າວເຖິງພະຍາກະບິນລະພົມ, ກັບທ້າວທຳມະບານ ກຸມມານ ເຊິ່ງທາຍ ບັນຫາ ເລື່ອງສີລິ (ລາສີ) ຂອງຄົນ ໃນຕອນເຊົ້າ, ຕອນສວາຍ ແລະ ຕອນແລງຢູ່ໃສ? ເຊິ່ງຄຳ ຕອບທີ່ໄຂອອກມາກໍຄື: ຕອນ ເຊົ້າຢູ່ໜ້າ, ຕອນສວາຍ ຢູ່ເອິກ ແລະ ຕອນແລງຢູ່ຕີນ. ໃນທັດສະນະຂອງ ພະອາຈານ ໄພວັນ ມາລະວົງ ໄດ້ຕີ ຄວາມໝາຍຂອງປິດສະໜາຈາກຄຳຕອບດັ່ງກ່າວນີ້ໃນແງ່ມຸມທີ່ເປັນຫລັກທຳຄຳສອນ ໄວ້ຄື: ພະຍາກະບິນລະພົມ ເປັນຕົວແທນຂອງຜູ້ປົກຄອງ ຫລື ຜູ້ເປັນພໍ່ແມ່ທີ່ຕ້ອງມີສີ່ໜ້າ (ໜ້າທີ່) ເປັນຕົ້ນແມ່ນມີຄວາມເມດຕາ ໝາຍເຖິງຄວາມຮັກສະເໝີພາບບໍ່ຮັກຫລັງຊັງບ່ຽງ, ກະລຸນາຄືຄວາມຢາກສົ່ງເສີມໃຫ້ທຸກຄົນໄດ້ມີຊີວິດທີ່ດີ, ມຸທິຕາຄືຄວາມຍິນດີເມື່ອບຸກຄົນພາຍໃຕ້ປົກຄອງຂອງຕົນເອງໄດ້ດີ, ອຸເປກຂາຄືຄວາມຍຸຕິທຳຕໍ່ທຸກໆຄົນອັນນີ້ຄືສີ່ໜ້າ ຂອງພະຍາພົມ. ຍ້ອນເຫດນີ້ຫົວຂອງພະຍາພົມຈຶ່ງບໍ່ຄວນໃຫ້ຕົກລົງໄປສູ່ພື້ນດິນ, ນໍ້າ ແລະ ອາດກາດ ຄື ຕ້ອງຢູ່ໃນຈິດໃຈຂອງຄົນທີ່ເປັນເໝືອນພາຊະນະຮອງຮັບຫລັກທຳຄຳສອນເຫລົ່ານັ້ນໄວ້ໃຫ້ໝັ້ນ. ສ່ວນທ້າວ ທຳມະບານກຸມມານເປັນ   ຕົວແທນຂອງຄົນທີ່ຄວນຮັກສາໄວ້ເຊິ່ງທຳມະອັນ ເປັນສິ່ງຄຸ້ມຄອງໂລກນັ້ນກໍຄື ຫິລິ ໝາຍເຖິງຄວາມ ຢ້ານກົວຕໍ່ບາບ ແລະ ໂອດຕັບປະໝາຍເຖິງຄວາມລະອາຍຕໍ່ບາບທັງປວງ. ຫລັກທຳມະໃນປະຫວັດຄວາມເປັນມາຂອງປີໃໝ່ລາວ - 537 300x188 - ຫລັກທຳມະໃນປະຫວັດຄວາມເປັນມາຂອງປີໃໝ່ລາວ ນອກຈາກນີ້ໃນສິລິ 3  ປະການທີ່ເປັນຄຳທວາຍລະຫວ່າງພະຍາກະບິນລະພົມກັບທ້າວທຳມະບານກຸມມານນັ້ນມີຄວາມໝາຍຄື: ຂໍ້ທີໜຶ່ງ ຕອນເຊົ້າ ສີລິ (ລາສີ) ຂອງ ຄົນຢູ່ໜ້າ ຕື່ນຂຶ້ນມາຕ້ອງລ້າງ ໜ້າກ່ອນອອກຈາກເຮືອນ ໝາຍເຖິງເບື້ອງໜ້າອັນເປັນຄວາມຮູ້ສຶກນຶກຄິດໄຕ່ຕອງບັນຫາ, ຮູ້ຈັກວາງແຜນໃນການດຳລົງຊີວິດດ້ວຍສະຕິ, ສະໝອງ ແລະ ປັນຍາຈຶ່ງປຽບເໝືອນການລ້າງໜ້າ. ຂໍ້ທີສອງ ຕອນສວາຍ ສີລິ (ລາສີ) ຂອງຄົນຢູ່ເອິກຈຶ່ງຕ້ອງເອົານໍ້າລູບເອິກໝາຍເຖິງຄວາມຕັ້ງອົກຕັ້ງໃຈຕໍ່ໜ້າທີ່ການງານໃນປັດຈຸບັນຕ້ອງມີຄວາມໝັ້ນທ່ຽງແນ່ວແນ່ສິ່ງທີ່ເປັນນໍ້າລູບນັ້ນກໍຄື ຄວາມສະຫງົບ, ມີຈິດໃຈທີ່ສະມາທິວຽກງານຈຶ່ງຜ່ານພົ້ນໄປດ້ວຍດີ ແລະຂໍ້ສຸດທ້າຍ ຄືຕອນຄໍ່າ ສີລິ (ລາສີ) ຂອງ ຄົນຢູ່ຕີນ ດັ່ງນັ້ນກ່ອນເຂົ້າ ນອນຈຶ່ງຕ້ອງລາງຕີນໝາຍ ເຖິງການຊຳລະສະສາງບັນຫາຂອງຊີວິດ, ຮູ້ຈັກສະຫລຸບ ຜົນດີຜົນດ້ອຍ ເພື່ອປັບປຸງແກ້ໄຂບໍ່ໃຫ້ບັນຫາຕ່າງໆ ເປັນສິ່ງລົບກວນຈິດໃຈ, ການເຮັດສິ່ງໃດສິ່ງໜຶ່ງໃຫ້ສຳເລັດຜົນ ນັ້ນຄືສິ່ງທີ່ດີ, ບໍ່ເປັນໜີ້ເປັນສິນສິ່ງນີ້ຈຶ່ງປຽບເໝືອນການໃຊ້ນໍ້າລ້າງຕີນ ກ່ອນນອນ. ດ້ວຍເຫດຜົນທັງໝົດນີ້ເມື່ອເຖິງບຸນປີໃໝ່ຈຶ່ງມີການໃຊ້ນ້ຳຫອມ, ນໍ້າສະອາດຫົດສົງ ແລະ ອວຍພອນ ເຊິ່ງກັນແລະກັນ ໂດຍສະເພາະ ຜູ້ເປັນລູກ ຫລານຕ້ອງໄປ ຫົດສົງຜູ້ເຖົ້າແກ່ອາວຸໂສ ເພື່ອຂໍພອນ ແລະ ເມື່ອໄດ້ຮັບການຫົດສົງຈາກລູກຫລານກໍໄດ້ມີ ຄຳອວຍພອນເພື່ອ ເຮັດໃຫ້ເຂົາເຈົ້າໄດ້ມີຄວາມ ຊົມຊື່ນຍິນດີເຊັ່ນ: ຂໍໃຫ້ມີສຸຂະພາບແຂງແຮງ, ມີພະລະນາໄມອັນສົມບູນ, ເພີ່ມພູນ ດ້ວຍຊັບສົມບັດ, ມີໜ້າທີ່ການງານການເງິນ  ແລະ ໂຊກລາບລໍ້າລວຍຕ່າງໆ ຕາມທີ່ມະນຸດຄົນໜຶ່ງປາຖະໜາເພື່ອຄວາມສຸກແກ່ ຊີວິດຂອງເຂົາ. ຄຳອວຍພອນທີ່ຫລາຍທ່ານຫລາຍ ຄົນເອີ່ຍນັ້ນລ້ວນແຕ່ເປັນຄຳທີ່ດີ, ເປັນສີລິມຸງຄຸນແກ່ຊີວິດເຮັດໃຫ້ຜູ້ຮັບຕ່າງກໍມີຈິດໃຈເບີກບານພ້ອມທີ່ຈະນຳເອົາຄຳອວຍພອນນັ້ນເປັນກຳລັງໃຈແກ່ການດຳລົງຊີວິດ. ດັ່ງນັ້ນ, ເພື່ອເຮັດໃຫ້ບຸນປີໃໝ່ເປັນປີແຫ່ງຄວາມເບີກບານມ່ວນຊື່ນ, ເປັນສີລິມຸງຄຸນແກ່ຊີວິດ ແລະ ເພື່ອຊີວິດອັນດີງາມນັ້ນຕ້ອງປະກອບດ້ວຍການປະຕິບັດສິນຫ້າ, ມີຈິດໃຈທີ່ສະຫງົບໝັ້ນທ່ຽງຄືມີສະມາທິ ແລະ ໃຊ້ຊີວິດດ້ວຍສະຕິປັນຍາຈຶ່ງຈະພາໃຫ້ຊີວິດສົມດັ່ງປາຖະໜາທຸກສິ່ງທຸກປະການ.
ຫລັກທຳມະໃນປະຫວັດຄວາມເປັນມາຂອງປີໃໝ່ລາວ - Wave100S AD to Website 2020 0 - ຫລັກທຳມະໃນປະຫວັດຄວາມເປັນມາຂອງປີໃໝ່ລາວ
ຫລັກທຳມະໃນປະຫວັດຄວາມເປັນມາຂອງປີໃໝ່ລາວ - WhatsApp Image 2020 05 27 at 5 - ຫລັກທຳມະໃນປະຫວັດຄວາມເປັນມາຂອງປີໃໝ່ລາວ
ຫລັກທຳມະໃນປະຫວັດຄວາມເປັນມາຂອງປີໃໝ່ລາວ - WhatsApp Image 2020 05 27 at 5 - ຫລັກທຳມະໃນປະຫວັດຄວາມເປັນມາຂອງປີໃໝ່ລາວ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!