ລົມພາຍຸພັດເຂົ້າເມືອງພຽງ ແຂວງໄຊຍະບູລີ ສ້າງຄວາມເສຍຫາຍເກືອບ 20 ຕື້ກີບ

ຕາມການລາຍງານຂອງກອງເລຂາ ຄະນະກໍາມະການຄຸ້ມຄອງໄພພິບັດຂັ້ນເມືອງ ເມືອງພຽງແຂວງໄຊຍະບູລີ ໃຫ້ຮູ້ວ່າ: ໃນວັນທີ 28 ມີນາຜ່ານ​ມາ ເວລາ 18:30 ​ໂມງ ໄດ້ເກີດມີລົມພາຍຸພັດເຮືອນຂອງປະຊາຊົນ 3 ບ້ານຄື: ບ້ານ​ນາ​ແລ, ບ້ານ​ວັງ​ຄໍາ ​ແລະ ບ້ານ​ໜອງ​ບົວທອງ ໄດ້ຮັບຜົນເສຍຫາຍເກືອບ 20 ຕື້ກີບ.

ໃນວັນທີ 31 ມີນາ, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມພາກສ່ວນກ່ຽວຂ້ອງໄດ້ລົງກວດກາເບິ່ງຜົນເສຍຫາຍຕົວຈິງຢູ່ເຂດທີ່ຖືກຜົນກະທົບດັ່ງກ່າວ, ພ້ອມທັງໄດ້ເນັ້ນໜັກໃຫ້ພາກສ່ວນທີ່ກ່ຽວຂ້ອງກວດກາ ແລະ ເກັບກໍາຂໍ້ມູນຜົນເສຍຫາຍຂອງປະຊາຊົນ ແລະ ບໍລິສັດທີ່ປູກກ້ວຍຄືນໃຫ້ລະອຽດ ພ້ອມທັງສັງລວມລາຍງານຫາຂັ້ນເທິງຕາມຂັ້ນຕອນ ແລະ ໃຫ້ການຊ່ວຍເຫລືອເບື້ອງຕົ້ນ ແກ່ຄອບຄົວທີ່ຖືກກະທົບໜັກຢ່າງຮີບດ່ວນ.