4 ເປົ້າໝາຍ ປະຕິຍານຕົນຂອງລັດຖະມົນຕີກະຊວງສຶກສາທິການ ແລະ ກິລາຄົນໃໝ່
April 1, 2021 - 12:16 PM
ເນື່ອງໃນໂອກາດພີທີ ມອບ-ຮັບ ໜ້າທີ່ລັດຖະມົນຕີກະຊວງສຶກສາທິການ ແລະ ກິລາ ຜູ້ເກົ່າ ທ່ານ ນາງ ແສງເດືອນ ຫລ້າຈັນທະບູນ ແລະ ທ່ານ ພຸດ ສິມມາລາວົງ ຜູ້ໃໝ່ ໃນວັນທີ 1 ເມສານີ້.
ທ່ານ ພຸດ ສິມມາລາວົງ ໄດ້ກ່າວຄຳປະຕິຍານຕົນວ່າ: ເພື່ອປະຕິບັດໜ້າທີ່ການເມືອງຂອງຕົນ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ່ XI ຂອງພັກ ກໍຄືການຈັດຕັ້ງຜັນຂະຫຍາຍມະຕິກອງປະຊຸມຄັ້ງປະຖົມມະລຶກຂອງສະພາແຫ່ງຊາດ ຊຸດທີ IX ແລະ ມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກກະຊວງໃຫ້ປະກົດຜົນເປັນຈິງຄື:
- ຈະສືບຕໍ່ສຸມທຸກເຮື່ອແຮງ ແລະ ຄວາມຮູ້ຄວາມສາມາດຂອງຕົນຮ່ວມກັບໜູ່ຄະນະໃນການປະຕິບັດໜ້າທີ່ການເມືອງທີ່ພັກ-ລັດ ກໍຄືປະຊາຊົນລາວບັນດາເຜົ່າ ທີ່ໄດ້ມອບໝາຍໃຫ້ໃນການພັດທະນາການສຶກສາ-ກິລາ ແລະ ການພັດທະນາຊັບພະຍາກອນມະນຸດ ຂອງ ສປປ ລາວ ໃຫ້ມີຜົນສຳເລັດຕາມຄາດໝາຍທີ່ວາງໄວ້;
- ຈະສືບຕໍ່ສຶກສາອົບຮົມສະມາຊິກພັກ, ຜູ້ບໍລິຫານການສຶກສາ ແລະ ກິລາ ແລະ ຄູອາຈານ ໃນຂອບເຂດທົ່ວປະເທດ ໃຫ້ປະຕິບັດໜ້າທີ່ຂອງຕົນດ້ວຍຄວາມຮັບຜິດຊອບສູງ ມີຈັນຍະບັນ-ຈັນຍະທຳ, ປະຕິບັດໜ້າທີ່ຮັບໃຊ້ປະຊາຊົນ ດ້ວຍຄວາມບໍລິສຸດສັດຊື່ ແລະ ຮັບຜິດຊອບສູງ;
- ຈະສືບຕໍ່ຮັດແໜ້ນຄວາມສາມັກຄີຢູ່ພາຍໃນ ແລະ ພາຍນອກໃຫ້ເຂັ້ມແຂງ ໂດຍສະເພາະສືບຕໍ່ພົວພັນກັບບັນດາປະເທດເພື່ອນມິດຍຸດທະສາດ ບັນດາອົງການຈັດຕັ້ງສາກົນ ເພື່ອຍາດແຍ່ງທຶນຮອນມາຈັດຕັ້ງປະຕິບັດວຽກຈຸດສຸມຂອງກະຊວງໃນໄລຍະ 5 ປີຕໍ່ໜ້າ;
- ຈະສືບຕໍ່ຮໍ່າຮຽນເອົາແບບແຜນການດຳລົງຊີວິດ ແລະ ພາລະກິດທີ່ໄດ້ຮັບການມອບໝາຍ ຂອງ ທ່ານ ນາງ ແສງເດືອນ ຫລ້າຈັນທະບູນ ໃຫ້ເປັນຮູບປະທຳ ເຂົ້າໃນຊີວິດພຶດຕິກຳຕົວຈິງ.
