H&M ຢືນຢັນບໍ່ຖອນຕົວຈາກຕະຫລາດຈີນ ພ້ອມຮຽກຄວາມເຊື່ອໝັ້ນກັບຄືນມາ
H&M ອອກມາສະແດງທ່າທີຕໍ່ກະແສຕໍ່ຕ້ານຢູ່ຈີນ ປະກາດສູ້ຕໍ່ໂດຍບໍ່ໄດ້ລະບຸຈະແຈ້ງວ່າຈະກັບມາໃຊ້ຝ້າຍຊິນຈຽງ ຫລື ບໍ່.
ວັນທີ 31 ມີນາ 2021 ເວັບໄຊຂອງ H&M ເປີດເຜີຍຖະແຫລງການເຖິງກໍລະນີທີ່ຊາວຈີນອອກມາຕໍ່ຕ້ານສິນຄ້າ ຈາກກໍລະນີທີ່ບໍລິສັດເຄີຍອອກມາປະກາດຢຸດການໃຊ້ຝ້າຍຈາກເຂດປົກຄອງຕົນເອງຊິນຈຽງ ໂດຍຢືນຢັນວ່າ: ຈະເຮັດທຸກຢ່າງເພື່ອແກ້ໄຂຄວາມທ້າທາຍໃນປັດຈຸບັນ ແລະ ຫາທາງຈະກ້າວໄປຂ້າງໜ້າຕໍ່ໄປ.
ຕາມຖະແຫລງການລະບຸວ່າ: ຈີນເປັນຕະຫລາດສຳຄັນຫລາຍ ແລະ ຍັງເປັນເປົ້າໝາຍໄລຍະຍາວຂອງບໍລິສັດ, ຜ່ານມາ H&M ຕ້ອງການເປັນຜູ້ຊື້ທີ່ມີຄວາມຮັບຜິດຊອບ ທັງໃນປະເທດຈີນ ແລະ ປະເທດອື່ນໆ ແລະ ກຳລັງເບິ່ງເລື່ອງກົນລະຍຸດການຫາວັດຖຸດິບເພື່ອກ້າວຕໍ່ໄປ.
ໃນຖານະບໍລິສັດລະດັບໂລກ H&M ໄດ້ປະຕິບັດຕາມກົດໝາຍ ແລະ ຂໍ້ບັງຄັບໃນທຸກປະເທດທີ່ເຂົ້າໄປລົງທຶນ ແລະ ຍັງຫວັງຈະເຈາະຈົງໃສ່ທຸລະກິດຫລັກ ຄືການນຳແຟຊັນ ແລະ ການອອກແບບໄປສູ່ລູກຄ້າທົ່ວໂລກ.
ບໍລິສັດຍັງທຸ້ມເທກັບການຮຽກຄວາມເຊື່ອໃຈ ແລະ ຄວາມເຊື່ອໝັ້ນກັບມາຈາກລູກຄ້າ, ເພື່ອນຮ່ວມງານ ແລະ ພັນທະມິດທາງທຸລະກິດຢູ່ຈີນ ໂດຍເຊື່ອວ່າຈະສາມາດເຮັດວຽກຮ່ວມກັນ ເພື່ອພັດທະນາອຸດສາຫະກຳແຟຊັນໄດ້, ໃນຂະນະທີ່ຍັງດຳເນີນທຸລະກິດດ້ວຍຄວາມຮັບຜິດຊອບຢູ່.
ການກ່າວຫາວ່າຝ້າຍຈາກພາກພື້ນຊິນຈຽງເປັນຜົນຜະລິດຈາກການບັງຄັບໃຊ້ແຮງງານກຳລັງເປັນບັນຫາສຳຄັນໃນເວທີໂລກ ທີ່ປະເທດຕາເວັນຕົກນຳມາໃຊ້ໂຈມຕີຈີນ. ນອກຈາກ H&M ແລ້ວ, ຊາວຈີນຍັງໄດ້ປະກາດຕໍ່ຕ້ານສິນຄ້າຈາກ Adidas ແລະ Nike ທີ່ລະບຸວ່າຈະບໍ່ໃຊ້ຝ້າຍຊິນຈຽງນຳອີກ.
ອ້າງອີງ:
https://hmgroup.com/news/statement_hm_china/
