4 ອາຫານຕ້ານຄວາມເຄັ່ງຄຽດ ຊ່ວຍໃຫ້ອາລົມດີ ພ້ອມທັງໄດ້ສຸຂະພາບ
April 2, 2021 - 2:50 PM
- ນົມອຸ່ນໆກ່ອນເຂົ້ານອນ : ນົມເປັນເຄື່ອງດື່ມທີ່ທຸກທ່ານຮູ້ຈັກກັນເປັນຢ່າງດີ ນອກຈາກຈະມີປະໂຫຍດຕໍ່ຮ່າງກາຍແລ້ວ ຍັງຊ່ວຍໃຫ້ຮູ້ສຶກອີ່ມທ້ອງ ທັງຍັງຊ່ວຍແກ້ອາການເຈັບຫົວ, ປວດທ້ອງນ້ອຍປະຈຳເດືອນ ແລະ ສິ່ງສຳຄັນຍັງຊ່ວຍໃຫ້ທ່ານນອນຫລັບສະບາຍຂຶ້ນນຳ. ດັ່ງນັ້ນ, ຫາກທ່ານກຳລັງເຄັ່ງຄຽດຈົນນອນບໍ່ຫລັບ ໃຫ້ລອງດື່ມນົມອຸ່ນໆຈັກຈອກກ່ອນນອນ ຮັບຮອງວ່າທ່ານຈະນອນຫລັບງ່າຍຂຶ້ນ ແລະ ຕື່ນມາດ້ວຍອາລົມສົດຊື່ນແຈ່ມໃສ ພ້ອມສຳລັບການເຮັດວຽກໃນເຊົ້າມື້ໃໝ່ໄດ້ແລ້ວ.
- ເຄື່ອງດື່ມຊາຂຽວ : ນອກຈາກຈະແຊບແລ້ວຍັງສາມາດຫາດື່ມໄດ້ບໍ່ຍາກ. ຊາຂຽວມີສັບພະຄຸນໃນການຊ່ວຍປິ່ນປົວອາການເຈັບຫົວໄປຈົນເຖິງພະຍາດຊຶມເສົ້າໄດ້ ທັງຍັງຊ່ວຍໃຫ້ທ່ານຮູ້ສຶກຜ່ອນຄາຍອາລົມໄດ້ເປັນຢ່າງດີ ສະນັ້ນ ເມື່ອໃດທີ່ຮູ້ສຶກເຄັ່ງຄຽດ ລອງຫາຊາຂຽວຮ້ອນໆມານັ່ງດື່ມໃນຕອນເຊົ້າ ຫລື ໃນຕອນກາງເວັນຂະນະນັ່ງເຮັດວຽກ ຈະໄດ້ເຮັດໃຫ້ຈິດໃຈສະຫງົບເຢັນລົງໄດ້ບໍ່ຫລາຍກໍໜ້ອຍ.
- ຊັອກໂກແລັດດຳ : ດ໊າກຊັອກໂກແລັດນອກຈາກຈະແຊບແລ້ວ ຍັງມີສ່ວນຊ່ວຍໃນການໄຫລວຽນຂອງເລືອດໃຫ້ໄປລ້ຽງສະໝອງໄດ້ດີຂຶ້ນ ສົ່ງຜົນຕໍ່ການຈື່ຈຳຂອງສະໝອງທີ່ເປັນໄປໃນດ້ານດີ ຫາກທ່ານກິນດ໊າກຊັອກໂກແລັດ ຫລື ຊັອກໂກແລັດດຳໃນຕອນກາງເວັນ ສະໝອງຈະຫລັ່ງສານເອັນດໍຟິນອອກມາ ເຊິ່ງສານຊະນິດນີ້ຈະເຮັດໃຫ້ທ່ານຮູ້ສຶກອາລົມດີ ແລະ ຊ່ວຍຫລຸດຄວາມເຄັ່ງຄຽດໄດ້.
- ປາແຊວມັອນ : ຊີ້ນປາແຊວມັອນມີປະໂຫຍດຕໍ່ຮ່າງກາຍຫລວງຫລາຍ ເພາະນອກຈາກຈະເປັນໂປຣຕິນທີ່ດີ ອຸດົມໄປດ້ວຍສານອາຫານອັດແໜ້ນ, ມີກາລໍຣີຕໍ່າແລ້ວ ຍັງຊ່ວຍໃຫ້ທ່ານນອນຫລັບງ່າຍຂຶ້ນນຳ ທັງຍັງຊ່ວຍຫລຸດຄວາມສ່ຽງໃນການເກີດພະຍາດຊຶມເສົາໄດ້ອີກທາງໜຶ່ງ. ສະນັ້ນ, ລອງຫາລາຍການອາຫານທີ່ໃຊ້ປາແຊວມັອນໃນການປຸງແຕ່ງມາກິນເປັນອາຫານຄາບຫລັກສະຫລັບກັນກັບຊີ້ນສັດຊະນິດອື່ນໆແດ່ ຈະໄດ້ຊ່ວຍໃຫ້ຮ່າງກາຍໄດ້ຮັບສານອາຫານທີ່ເໝາະສົມຕໍ່ການຫລຸດຄວາມເຄັ່ງຄຽດ.
