ໄພພິບັດລະດູຮ້ອນຄືມັດຈຸລາດທີ່ຢູ່ໃກ້ຕົວ
ໂດຍ: ທິດກໍ່າ
ເລີ່ມແຕ່ເດືອນມີນາ, ເມສາ ແກ່ຍາວໄປຮອດພຶດສະພາ, ມິຖຸນາ ເປັນຊ່ວງໄລຍະລະດູຮ້ອນ. ຫາກຕັ້ງໂຈດກັນວ່າ ໃນຊ່ວງລະດູນີ້ ໄພພິບັດທີ່ມັກເກີດຂຶ້ນມາກະທົບກັບພວກເຮົານັ້ນມີອັນໃດແດ່ ? ຄຳຕອບໂຈດມັນກໍມີຫລາຍອັນຫລາຍຢ່າງທີ່ຈະກາຍເປັນມັດຈຸລາດທີ່ມາກະທົບ ແລະ ທຳລາຍຊີວິດອິນຊີ ແລະ ຊັບສິນພວກເຮົາເຊັ່ນ: ເກີດອັກຄີໄພໄຟໄໝ້ປ່າ, ໄໝ້ບ້ານໄໝ້ເຮືອນ ແລະ ໄໝ້ວັດຖຸສິ່ງຂອງສາລະພັດຢ່າງ. ສ່ວນຜົນກະທົບອີກປະການໜຶ່ງກໍແມ່ນເລື່ອງພະຍາດບາດເຍົາ, ອະຫິວາທ້ອງລ່ວງ, ເຈັບໄຂ້ໄດ້ພະຍາດຕ່າງໆ ເຊິ່ງພວກເຮົາເຄີຍເອີ້ນກັນວ່າ: ພະຍາດຕາມລະດູການ ຫລື ພະຍາດລະດູຮ້ອນ. ອັນພິເສດກວ່າໝູ່ ເຊິ່ງພວກເຮົາພວມຜະເຊີນ ແລະ ພາກັນຕ້ານຢູ່ໃນປັດຈຸບັນກໍແມ່ນການແຜ່ລະບາດຂອງພະຍາດໂຄວິດ-19. ນອກຈາກສິ່ງຕ່າງໆທີ່ກ່າວມານີ້ແລ້ວ ຍັງມີພາຍຸລົມແຮງ, ຝົນຕົກໜັກ, ໝາກເຫັບຕົກ, ຟ້າຜ່າ ເຫລົ່ານີ້ເປັນຕົ້ນ.
ໃນປັດຈຸບັນ, ສະພາບດິນຟ້າອາກາດຢູ່ປະເທດເຮົາໄດ້ມີການປ່ຽນແປງໄປໃນແຕ່ລະປີ, ພວກເຮົາຍິ່ງຕ້ອງໄດ້ລະມັດລະວັງຢ່າງໃກ້ຊິດອີ່ຫລີ. ຕົວຢ່າງໃນວັນທີ 28 ມີນາ 2021 ເວລາ 18 ໂມງ 30 ນາທີ ໄດ້ມີລົມພາຍຸພັດເຮືອນຊານບ້ານຊ່ອງຂອງປະຊາຊົນ 3 ບ້ານທີ່ຂຶ້ນກັບເມືອງພຽງ ແຂວງໄຊຍະບູລີ ຄືບ້ານນາແລ, ບ້ານວັງຄຳ ແລະ ບ້ານໜອງບົວທອງ ມີຜົນເສຍຫາຍເຖິງ 20 ຕື້ກີບ. ນອກຈາກນັ້ນ ຍັງມີສວນກ້ວຍຂອງສອງບໍລິສັດລົງທຶນຖືກທຳລາຍເສຍຫາຍດ້ວຍມູນຄ່າເກືອບ 20 ຕື້ກີບ. ຕໍ່ມາໃນວັນທີ 29 ມີນາຜ່ານມາ ກໍມີຂ່າວວ່າພຽງມື້ດຽວມີແຜ່ນດິນໄຫວເຖິງ 4 ຄັ້ງຢູ່ແຂວງໄຊຍະບູລີ ແລະ ແຂວງໄຊສົມບູນ ເຊິ່ງແຜ່ນດິນໄຫວແຕ່ລະຄັ້ງມີຄວາມແຮງສັ່ນສະເທືອນແຕ່ 2 ຫາ 4 ຣິກເຕີ. ນີ້ກໍສະແດງໃຫ້ເຫັນວ່າ ໄພພິບັດຢູ່ປະເທດເຮົາໄດ້ເລີ່ມເຂົ້າມາໃກ້ຕົວທຸກຂະນະແລ້ວ. ເວົ້າເລື່ອງໄພພິບັດທາງທຳມະຊາດຢູ່ປະເທດເຮົາ ໂດຍສະເພາະໃນຊ່ວງລະດູຮ້ອນໃນແຕ່ລະປີ ມັນກໍນັບມື້ມີລັກສະນະຮຸນແຮງຂຶ້ນເລື້ອຍໆ ອາທິດຫລັງໆຜ່ານມານີ້ ຍັງໄດ້ພັດຖະຫລົ່ມເຮືອນຊານບ້ານຊ່ອງເຂດເທສະບານແຂວງເຊກອງ ເຮັດໃຫ້ເສົາໄຟຟ້າຫັກ ແລະ ເສຍຫາຍຫລາຍສິບຕົ້ນ. ແຫລ່ງຂ່າວຈາກອຸຕຸນິຍົມ ແລະ ອຸທົກກະສາດ ຍັງໄດ້ບອກຕື່ມວ່າ: ນັບແຕ່ວັນທີ 2-4 ເມສາ 2021 ຈະມີພາຍຸ ທັງຝົນທັງລົມພັດຖະຫລົ່ມໃນຫລາຍຈຸດຢູ່ພາກເໜືອ ແລະ ພາກກາງຂອງປະເທດ ອາດກໍ່ໃຫ້ເກີດການເສຍຫາຍວັດຖຸຊັບສິນຫລາຍຢ່າງ ໂດຍສະເພາະໃນເຂດເມືອງເຟືອງ ແຂວງວຽງຈັນ ນັບທັງພາກເໜືອພາກກາງຂອງປະເທດ.
ສິ່ງທີ່ກ່າວມາທັງໝົດນີ້ ແມ່ນໄພພິບັດໃນຊ່ວງລະດູຮ້ອນ ຈຶ່ງຂໍໃຫ້ທຸກຄົນ, ທຸກທ້ອງຖິ່ນ, ເຂດແຂວງໃນທົ່ວປະເທດ ຈົ່ງພ້ອມກັນເອົາໃຈໃສ່, ລະມັດລະວັງ ທັງເຝົ້າຕິດຕາມຢ່າງໃກ້ຊິດ ເພື່ອບໍ່ໃຫ້ຕົກຢູ່ໃນທ່າຮັບ. ດັ່ງພວກເຮົາຮູ້ນຳກັນແລ້ວວ່າ ຍາມລະດູຮ້ອນມັກມີໄພພິບັດຫລາຍຢ່າງທີ່ຈະມາກະທົບໃສ່ຊີວິດການເປັນຢູ່ ແລະ ທຳລາຍພື້ນຖານການຜະລິດຂອງພວກເຮົາ. ສ່ວນວິທີທາງທີ່ຈະຫລີກລ່ຽງໄດ້ນັ້ນ ຂໍໃຫ້ພ້ອມກັນໝັ່ນຕິດຕາມການປ່ຽນແປງສະພາບດິນຟ້າອາກາດຈາກກົມອຸຕຸນິຍົມ ແລະ ອຸທົກກະສາດພາຍໃນປະເທດ, ຂອງພາກພື້ນ ແລະ ທົ່ວໂລກ ເພາະສະໄໝນີ້ການຕິດຕາມແຫລ່ງຂ່າວຂໍ້ມູນຂ່າວສານມັນທັນສະໄໝກວ່າແຕ່ກ່ອນຫລາຍພັນເທົ່າແລ້ວ. ນອກຈາກນີ້ແລ້ວ ໃນການໄປມາທ່ອງທ່ຽວຕາມແຫລ່ງທຳມະຊາດກໍຕ້ອງໄດ້ລະມັດລະວັງ ເພາະຢ້ານຝົນຕົກໜັກກະທັນຫັນ ມີນ້ຳປ່າໄຫລຫລາກຊຸທັ່ງດິນເຈື່ອນ, ທາງເພ ຫລື ກໍລະນີອື່ນໆທີ່ອາດຈະຕາມມາ.
ເຖິງຢ່າງໃດກໍດີ, ເວົ້າເລື່ອງສະພາບໄພພິບັດໃນລະດູຮ້ອນຢູ່ປະເທດເຮົາ ຖ້າທຽບໃສ່ຫລາຍປະເທດໃນໂລກ ແລະ ພາກພື້ນກໍຍັງຖືວ່າເບົາບາງຢູ່ ຍ້ອນວ່າລາວເຮົາບໍ່ມີທະເລ, ຍັງມີພູຜາປ່າໄມ້ ແລະ ຫ້ວຍນ້ຳລຳເຊທີ່ອຸດົມສົມບູນ ແລະ ມີພື້ນທີ່ສູງກວ່າລະດັບນ້ຳທະເລເຖິງ 1000 ກວ່າແມັດ. ຈາກສະພາບດັ່ງກ່າວ ຈຶ່ງເຮັດໃຫ້ຄວາມຊຸ່ມຊື່ນສົດໃສຍືນຍົງຂອງທຳມະຊາດເປັນໄປຕາມລະດູການເປັນສ່ວນໃຫຍ່ ຈຶ່ງຂໍໃຫ້ທຸກຄົນເປັນເຈົ້າການປົກປັກຮັກສາທຳມະຊາດ ແລະ ສິ່ງແວດລ້ອມໃຫ້ຍືນຍົງ ເພື່ອຫລີກລ່ຽງມັດຈຸລາດທີ່ຈະມາທຳລາຍຊີວິດອິນຊີຂອງພົນລະເມືອງລາວແບບຮາບຄາບ ແລະ ບັງເອີນ.
