ຍທຂ ເປີດງານສັບປະດາແຫ່ງຊາດດ້ານຄວາມປອດໄພທາງຫລວງ ພາຍໃຕ້ຫົວຂໍ້ “ຂັບຂີ່ປອດໄພຕ້ອງໃສ່ສາຍຮັດນິລະໄພ”

ຄະນະກຳມະການແຫ່ງຊາດດ້ານຄວາມປອດໄພທາງຫຼວງ ກະຊວງໂຍທາທິການ ແລະ ຂົນສົ່ງ ຈັດງານສັບປະດາແຫ່ງຊາດດ້ານຄວາມປອດໄພທາງຫຼວງ ປະຈຳປີ 2021 ພາຍໃຕ້ຫົວຂໍ້: ຂັບຂີ່ປອດໄພ ຕ້ອງໃສ່ສາຍຮັດນິລະໄພ ໃນຕອນເຊົ້າວັນທີ 3 ເມສາ 2021 ທີ່ເດີ່ນພະທາດຫຼວງ ນະຄອນຫຼວງວຽງຈັນ. ມີພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ມີບັນດາລັດຖະມົນຕີ ຮອງລັດຖະມົນຕີ ຈາກກະຊວງໂຍທາທິການແລະຂົນສົ່ງ, ກະຊວງສາທາລະນະສຸກ, ກະຊວງສຶກສາທິການ ແລະ ກິລາ, ກະຊວງຖະແຫຼງຂ່າວວັດທະນະທຳແລະທ່ອງທ່ຽວ, ຜູ້ຕາງໜ້າຈາກກົມໃຫຍ່ຕຳຫຼວດກະຊວງປ້ອງກັນຄວາມສະຫງົບ, ຕາງໜ້າຈາກອົງການກາແດງລາວ ພ້ອມດ້ວຍພະນັກງານ, ທະຫານ, ຕຳຫຼວດ, ນັກຮຽນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂອກາດນີ້, ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການແລະຂົນສົ່ງ ທັງເປັນປະທານຄະນະກຳມະການແຫ່ງຊາດດ້ານຄວາມປອດໄພທາງຫຼວງ ກ່າວເຖິງຄວາມໝາຍຄວາມສຳຄັນຂອງສັບປະດາແຫ່ງຊາດດ້ານຄວາມປອດໄພທາງຫຼວງໃນຄັ້ງນີ້ວ່າ: ບັນຫາການເກີດອຸບັດເຫດຢູ່ຕາມທາງຫຼວງໃນທົ່ວໂລກ ມີອັດຕາເພີ່ມຂຶ້ນຢ່າງໄວວາ ໂດຍສະເພາະໃນບັນດາປະເທດທີ່ກຳລັງພັດທະນາ ເຊີ່ງໄດ້ສ້າງຄວາມສູນເສຍທັງດ້ານຊີວິດ ແລະ ຊັບສິນຂອງພົນລະເມືອງ ລວມທັງສົ່ງຜົນກະທົບຕໍ່ເສດຖະກິດ ແລະ ການພັດທະນາຂອງຫຼາຍປະເທດຢູ່ໃນໂລກ.

ຍ້ອນເຫັນໄດ້ຄວາມສຳຄັນຕໍ່ບັນຫານີ້ ອົງການສະຫະປະຊາຊາດ ຈື່ງໄດ້ມີມະຕິກ່ຽວກັບການປັບປຸງຄວາມປອດໄພທາງຫຼວງໃນທົ່ວໂລກ ໂດຍມອບໝາຍໃຫ້ຫ້ອງການອົງການສະຫະປະຊາຊາດ ແລະ ອົງການອະນາໄມໂລກປະຈຳພາກພື້ນ ສົມທົບກັບພາກສ່ວນກ່ຽວຂ້ອງ ຈັດສັບປະດາຄວາມປອດໄພທາງຫຼວງສາກົນຂຶ້ນ ເພື່ອຍົກສູງສະຕິຄວາມປອດໄພໃນການນຳໃຊ້ທາງຫຼວງ ຫຼຸດຜ່ອນການເກີດອຸບັດເຫດ ແລະ ການເສຍຊີວິດ ຂອງຜູ້ນຳໃຊ້ທາງຫຼວງໃນທົ່ວໂລກ.