ຟໍຣິດາປະກາດພາວະສຸກເສີນ ສັ່ງອົບພະຍົບປະຊາຊົນ ຫລັງນ້ຳເສຍເປັນພິດຮົ່ວໄຫລ
ລັດຟໍຣິດາຂອງອາເມລິກາປະກາດພາວະສຸກເສີນ ຫລັງເກີດເຫດນ້ຳເສຍທີ່ປົນເປື້ອນສານພິດຮົ່ວໄຫລຈາກອ່າງເກັບນ້ຳຂະໜາດໃຫຍ່ໃນເມືອງແທມປາເບ ສົ່ງຜົນໃຫ້ທາງການຕ້ອງສັ່ງອົບພະຍົບປະຊາຊົນ 300 ກວ່າຫລັງຄາເຮືອນອອກຈາກພື້ນທີ່.
ປະຊາຊົນໄດ້ຮັບຂໍ້ຄວາມແຈ້ງເຕືອນໃຫ້ຟ້າວອົບພະຍົບອອກຈາກເຮືອນທັນທີ ແລະ ມີການປິດທາງຫລວງທີ່ຢູ່ໃກ້ກັບອ່າງເກັບນ້ຳໄພນີພອຍ ໂດຍເຈົ້າໜ້າທີ່ເປີດເຜີຍວ່າ: ອ່າງເກັບນ້ຳດັ່ງກ່າວມີຂະໜາດໃຫຍ່ເຖິງ 31 ເຮັກຕາ ແລະ ກັກເກັບນ້ຳຫລາຍລ້ານແກລອນທີ່ປົນເປື້ອນຟອດຟໍຣັສ ແລະ ໄນໂຕຣເຈນຈາກໂຮງງານຟອດເຟດເກົ່າ.
ອ່າງເກັບນ້ຳທີ່ພົບການຮົ່ວໄຫລນັ້ນຢູ່ໃນກອງຟອດໂຟຢິບຊຳ ເຊິ່ງເປັນກາກກຳມັນຕະພາບລັງສີຈາກການຜະລິດປຸ໋ຍ ອີກທັງນ້ຳຍັງມີສ່ວນປະກອບຂອງເຣດຽມ ແລະ ຢູເຣນຽມປະລິມານເລັກໜ້ອຍທີ່ເກີດຂຶ້ນຕາມທຳມະຊາດ. ນອກຈາກນີ້ ກອງຟອດໂຟຢິບຊຳຍັງສາມາດປ່ອຍແກັສເຣດອນນຳອີກ.
ລາຍງານລະບຸວ່າ: ມີຄວາມພະຍາຍາມສ້ອມແປງຮອຍຮົ່ວໄຫລໃນຕອນເດິກຂອງຄືວັນທີ 2 ເມສາ ດ້ວຍການໃຊ້ຫີນ ແລະ ວັດສະດຸອື່ນໆອັດຮອຍຮົ່ວ ແຕ່ຄວາມພະຍາຍາມດັ່ງກ່າວບໍ່ປະສົບຜົນສຳເລັດ ສົ່ງຜົນໃຫ້ ຣອນ ເດິຊານຕິສ ເຈົ້າຄອງລັດຟໍຣິດາ ຕັດສິນໃຈປະກາດພາວະສຸກເສີນໃນວັນທີ 3 ເມສາ ເນື່ອງຈາກການປະກາດພາວະສຸກເສີນຈະເຮັດໃຫ້ລັດຟໍຣິດາສາມາດນຳເອົາງົບປະມານອອກມາໃຊ້ ເພື່ອສົ່ງເຄື່ອງສູບນໍ້າ ແລະ ປັ້ນຈັ່ນໄປພື້ນທີ່ປະສົບໄພໄດ້ຫລາຍຂຶ້ນ.
ອ້າງອີງ:
https://www.bbc.com/news/world-us-canada-56629013
