ເຄັ່ງຄຽດຈົນເຈັບຫົວ ແກ້ໄດ້ດ້ວຍວິທີງ່າຍໆ ໂດຍບໍ່ຕ້ອງກິນຢາ

ອາການເຈັບຫົວບາງຢ່າງກໍເປັນອາຫານທີ່ເຮົາສາມາດປິ່ນປົວໄດ້ດ້ວຍຕົນເອງ ຫາກບໍ່ໄດ້ເຈັບຫົວຢ່າງຮຸນແຮງປານໃດ ຫລື ມີລັກສະນະທີ່ເກີດຂຶ້ນຢ່າງກະທັນຫັນທັນທີທັນໃດ ໂດຍເຮັດໄດ້ດັ່ງຕໍ່ໄປນີ້ :

1. ຜ່ອນຄາຍຄວາມເຄັ່ງຄຽດໂດຍການປັບປ່ຽນສິ່ງແວດລ້ອມ : ຫາກທ່ານຮູ້ສຶກອິດເມື່ອຍອ່ອນເພຍ ທັງທາງຮ່າງກາຍ ແລະ ຈິດໃຈ ກໍຄວນຜ່ອນຄາຍໂດຍການໃຫ້ຕົນເອງໄດ້ພັກຜ່ອນຈັກໜ້ອຍ ອາດຈະເປັນການພັກສາຍຕາຊົ່ວຄາວກໍໄດ້ ເພາະທ່ານອາດຮູ້ສຶກເຄັ່ງູຽດກັບວຽກປະຈຳທີ່ເຮັດຢູ່ ຈຶ່ງຄວນຫາເວລາໄປເຮັດຢ່າງອື່ນແດ່ທີ່ຈະຊ່ວຍໃຫ້ທ່ານໄດ້ພັກຜ່ອນສະໝອງຫລາຍຂຶ້ນ. ອັນໃດກໍໄດ້ທີ່ທ່ານມັກ ແລະ ສົນໃຈ, ຈະປູກຕົ້ນໄມ້, ເຮັດສວນຜັກ, ຫລິ້ນດົນຕີ, ແຕ້ມຮູບ, ອ່ານໜັງສື ກໍເປັນກິດຈະກຳຄາຍຄວາມເຄັ່ງຄຽດໄດ້ໝົດ ຫລື ອາດໄປພົບປະໝູ່ເພື່ອນ ຫລື ຫາເຄື່ອງດື່ມອຸ່ນໆມາດື່ມຈັກຈອກ ຫລື ຈະເຊືອບຫລັບຈັກໜ້ອຍ ກໍໜ້າຈະຊ່ວຍຫລຸດຜ່ອນອາການເຈັບຫົວໄດ້ຄືກັນ.
2. ດົມກິ່ນຈາກທຳມະຊາດ : ການໄດ້ສືບດົມກິ່ນທຳມະຊາດ ເຊັ່ນ : ເປືອກໝາກກ້ຽງ, ເປືອກໝາກຂີ້ຫູດ ຈະຊ່ວຍບຳບັດອາການເຈັບຫົວໄດ້.
3. ຈັດແຕ່ງຫ້ອງໃໝ່ : ການຈັດແຕ່ງຫ້ອງໃໝ່ໃຫ້ເບິ່ງສົດໃສສະບາຍຕາສະບາຍໃຈຫລາຍຂຶ້ນ ກໍຈະຊ່ວຍໃຫ້ທ່ານຮູ້ສຶກຜ່ອນຄາຍຫລາຍຂຶ້ນໄດ້.
4. ໃຊ້ຢາຫອມ : ສຳລັບຄົນທີ່ມີເວລາໜ້ອຍ ຍັງມີວິທີການງ່າຍໆທີ່ຊ່ວຍບຳບັດຄວາມເຄັ່ງຄຽດໄດ້ຄືກັນ ເຊັ່ນ : ໃຊ້ຢາຫອມ ໂດຍຊົງຢາຫອມກັບນຳ້ຮ້ອນຈັກຈອກດື່ມ, ສືບດົມກິ່ນຫອມໆຈາກໂຕຢາທີ່ລະເຫີຍເປັນອາຍຂຶ້ນມາ ພຽງເທົ່ານີ້ກໍຈະຫລຸດຜ່ອນອາການເຄັ່ງຄຽດ ຫລື ອາການເຈັບຫົວລົງໄດ້.
5. ບຳບັດດ້ວຍກິ່ນຈາກທຳມະຊາດ : ການໄດ້ດົມກິ່ນຈາກທຳມະຊາດຈະຊ່ວຍໃຫ້ທ່ານຮູ້ສຶກຜ່ອນຄາຍຫລາຍຂຶ້ນ ແລະ ມີຄວາມປອດໄພນຳ ຈະເປັນນຳ້ມັນຫອມລະເຫີຍຈາກພືດສະໝຸນໄພ, ກິ່ນໝາກກ້ຽງ, ກິ່ນດອກລາເວັນເດີ ກໍໃຊ້ໄດ້ຜົນດີຄືກັນ.
6. ອອກກຳລັງກາຍ : ການອອກກຳລັງກາຍຈະຊ່ວຍໃຫ້ການເຮັດວຽກຂອງລະບົບໝູນວຽນເລືອດດີຂຶ້ນ, ເຮັດໃຫ້ທ່ານຮູ້ສຶກຜ່ອນຄາຍຫລາຍຂຶ້ນ ທັງຮ່າງກາຍ ແລະ ຈິດໃຈ ແລະ ຫາກໄດ້ໄປອອກກຳລັງກາຍໃນບ່ອນທີ່ມີອາກາດບໍລິສຸດ ກໍຈະຍິ່ງເຮັດໃຫ້ຮູ້ສຶກສົດຊື່ນຜ່ອນຄາຍໄດ້ຫລາຍຍິ່ງຂຶ້ນ.