ຜັກ ແລະ ໝາກໄມ້ເຫລົ່ານີ້ຊ່ວຍທ່ານພິຊິດສຸຂະພາບທີ່ດີໄດ້ງ່າຍໆ

ຜັກ ແລະ ໝາກໄມ້ນັ້ນມີປະໂຫຍດຫລວງຫລາຍ ເພາະເປັນແຫ່ລງສານອາຫານທີ່ຄົບຖ້ວນ ດັ່ງ : ວິຕາມິນ, ແຮ່ທາດ ແລະ ສານອາຫານອື່ນໆ ຫາກກິນເປັນປະຈຳ ຮັບຮອງສຸຂະພາບຮ່າງກາຍຂອງທ່ານຈະແຂງແຮງ ແລະ ມື້ນີ້ພວກເຮົາກໍມີ 4 ຜັກ ແລະ ໝາກໄມ້ທີ່ຈະຊ່ວຍໃຫ້ທ່ານພິຊິດສຸຂະພາບທີ່ດີໄດ້ແບບງ່າຍໆ.

1. ໝາກກີວີ່ : ເປັນໝາກໄມ້ທີ່ໃຫ້ວິຕາມິນ C ຫລາຍກ່ວາໝາກກ້ຽງ ແລະ ຍັງມີວິຕາມິນ E ທີ່ຊ່ວຍໃນການຕໍ່ຕ້ານອະນຸມູນອິດສະລະ, ບຳລຸງຜິວໃຫ້ກ້ຽງງາມສົດໃສ ເຊິ່ງຈາກການສຶກສາວິໄຈຂອງມະຫາວິທະຍາໄລອອດສະໂລ ປະເທດນັອກແວ ໄດ້ພົບວ່າ : ການກິນໝາກກີວີ່ມື້ລະ 2 ໜ່ວຍ ຕິດຕໍ່ກັນເປັນໄລຍະເວລາ 1 ເດືອນ ຈະສາມາດຊ່ວຍຫລຸດການເກີດເສັ້ນເລືອດຂອດ ແລະ ເຮັດໃຫ້ໄຕຣກລີເຊີໄຣໃນເລືອດຫລຸດລົງໄດ້ເຖິງ 15%.
2. ໝາກໂມ : ຖືເປັນໝາກໄມ້ທີ່ມີປະໂຫຍດຫລາຍ ເຊິ່ງຫາກປຽບທຽບໃຫ້ໝາກເລັ່ນໃຫຍ່ເປັນແຫ່ລງຂອງສານອາຫານດັ່ງ ໄລໂຄປີນ ໝາກໂມກໍຈະເປັນແຫ່ລງຂອງສານອາຫານດັ່ງ ແຄໂຣທີນອຍ ເຊິ່ງແຄໂຣທີນອຍທີ່ຢູ່ໃນໝາກໂມສາມາດເຮັດໃຫ້ລະບົບການໄຫລວຽນເລືອດໃນຮ່າງກາຍເຮັດວຽກໄດ້ດີຍິ່ງຂຶ້ນ ແລະ ເຮັດໃຫ້ເລືອດສົມບູນຫລາຍຂຶ້ນ. ດັ່ງນັ້ນ, ການກິນໝາກໂມ 1 ປ່ຽງໃຫຍ່ ຈະໃຫ້ພະລັງງານ 46 ກາລໍຣີ ເຊິ່ງໝາກໂມມີນຳ້ຫລາຍເຖິງ 92% ຈຶ່ງເຮັດໃຫ້ໝາກໂມກາຍເປັນໝາກໄມ້ຊ່ວຍໃນການດັບກະຫາຍຄາຍຮ້ອນໄດ້ເປັນຢ່າງດີ.
3. ຜັກກະລໍ່າດາວ ຫລື ຜັກກະລໍ່ານ້ອຍ : ລັກສະນະຮູບຮ່າງຈະຄ້າຍຄືກັບຜັກກະລໍ່າໃນບ້ານເຮົາ, ແຕ່ແຕກຕ່າງກັນຄື ເລື່ອງຂອງຂະໜາດທີ່ນ້ອຍກ່ວາ ໂດຍຜັກກະລໍ່າດາວຍັງມີລົດຊາດທີ່ຄ້າຍຄືກັບຜັກກາດນາ ເຊິ່ງສ່ວນຫລາຍຈະພົບຜັກກະລໍ່າດາວໃນອາຫານຕາເວັນຕາ. ຜັກກະລໍ່າດາວອຸດົມໄປດ້ວຍວິຕາມິນຈຳນວນຫລາຍ ເຊັ່ນ : ວິຕາມິນ K, ວິຕາມິນ C, ທາດການຊຽມ, ທາດເຫລັກ ແລະ ເບຕ້າແຄໂຣທີນ ເປັນຕົ້ນ, ແຕ່ທີ່ມີຫລາຍທີ່ສຸດກໍແມ່ນວິຕາມິນ C ທີ່ຊ່ວຍເສີມສ້າງພູມຕ້ານທານໃຫ້ແກ່ຮ່າງກາຍ ແລະ ເສີມສ້າງຄໍລາເຈັນໃຫ້ຜິວ ເຮັດໃຫ້ຜິວສຸພາບດີ ກ້ຽງງາມສົດໃສ. ນອກຈາກນີ້, ຍັງມີສານພືດເຄມີທີ່ສາມາດຊ່ວຍຫລຸດໂອກາດການເກີດພະຍາດມະເຮັງໄດ້.
4. ຖົ່ວດຳ : ເປັນພືດທີ່ອຸດົມໄປດ້ວຍສານອາຫານຈຳນວນຫລາຍ ບໍ່ວ່າຈະເປັນທຣິບໂຕເຟນ ທີ່ເປັນສານຕັ້ງຕົ້ນການຜະລິດສານແຫ່ງຄວາມສຸກ, ແອນໂທໄຊຍານິນ ທີ່ຊ່ວຍຂັດຂວາງການເກີດຮອຍຫ່ຽວຍານ ທັງຍັງຊ່ວຍຫລຸດໂອກາດໃນການເກີດພະຍາດຫົວໃຈ ແລະ ຫລອດເລືອດສະໝອງ ທັງຍັງມີໂມລິບດີນໍ່າ ທີ່ຊ່ວຍຫລຸດໂອກາດໃນການເກີດພະຍາດມະເຮັງ ແລະ ປ້ອງກັນພະຍາດຄວາມດັນເລືອດ, ພະຍາດເລືອດຈາງ ເປັນຕົ້ນ. ນອກຈາກນີ້, ຖົ່ວດຳ ຍັງເປັນແຫ່ລງໂປຣຕິນທີ່ຄືກັນກັບຊີ້ນສັດ ເຊິ່ງການກິນຖົ່ວດຳມື້ລະ 1 ຖ້ວຍນ້ອຍ ຈະສາມາດຊ່ວຍໃຫ້ຮ່າງກາຍໄດ້ຮັບປະລິມານໂຟເລດທີ່ພຽງພໍຕໍ່ຄວາມຕ້ອງການຂອງຮ່າງກາຍ.