ອາເມລິກາສັ່ງໃຫ້ໂຮງງານໃນບັລຕິມໍທີ່ປະສົມສ່ວນປະສົມວັກຊີນ Johnson & Johnson ແລະ AstraZeneca ເຂົ້ານຳກັນຈົນວັກຊີນເສຍ ໃຫ້ຜະລິດສະເພາະວັກຊີນ Johnson & Johnson ຊະນິດດຽວ
ຈາກກໍລະນີທີ່ The New York Times ເປີດເຜີຍຂໍ້ມູນວ່າພະນັກງານທີ່ເຮັດວຽກໃນໂຮງງານຂອງບໍລິສັດ Emergent BioSolutions ໄດ້ປະສົມສ່ວນປະສົມວັກຊີນໂຄວິດ-19 ຂອງບໍລິສັດ Johnson & Johnson ແລະ ບໍລິສັດ AstraZeneca ເຂົ້ານຳກັນ ຈົນເຮັດໃຫ້ມີວັກຊີນທີ່ໃຊ້ບໍ່ໄດ້ 15 ລ້ານກວ່າໂດສ ປາກົດວ່າເຈົ້າໜ້າທີ່ສາທາລະນະສຸກອາວຸໂສຂອງອາເມລິກາຄົນໜຶ່ງທີ່ບໍ່ເປີດເຜີຍຊື່ລະບຸວ່າ: ທາງການອາເມລິກາໄດ້ໃຫ້ໂຮງງານແຫ່ງນີ້ຜະລິດວັກຊີນຂອງ Johnson & Johnson ພຽງບໍລິສັດດຽວແລ້ວ ແລະ ສັ່ງໃຫ້ AstraZeneca ຢຸດການໃຊ້ໂຮງງານແຫ່ງນີ້.
ນອກຈາກນີ້ ຍັງມີລາຍງານວ່າ: ກະຊວງສາທາລະນະສຸກອາເມລິກາສັ່ງໃຫ້ Johnson & Johnson ແຕ່ງຕັ້ງທີມຜູ້ນຳໃໝ່ໃນການເບິ່ງແຍງຂະບວນການຜະລິດໃນທຸກດ້ານທີ່ໂຮງງານແຫ່ງນີ້.
ທາງດ້ານ Johnson & Johnson ອອກຖະແຫລງການຢືນຢັນການເຂົ້າຮັບຜິດຊອບໂຮງງານດັ່ງກ່າວ ແລະ ຢືນຢັນວ່າບໍລິສັດຈະຈັດສົ່ງວັກຊີນຈຳນວນ 100 ລ້ານໂດສໃຫ້ລັດຖະບານອາເມລິກາພາຍໃນທ້າຍເດືອນພຶດສະພານີ້.
ຂະນະທີ່ AstraZeneca ລະບຸວ່າຈະເຮັດວຽກຮ່ວມກັບລັດຖະບານຂອງປະທານາທິບໍດີ ໂຈ ໄບເດັນ ເພື່ອຫາສະຖານທີ່ອື່ນໃນການຜະລິດວັກຊີນຕໍ່ໄປ. ເຖິງຢ່າງໃດກໍຕາມ, ວັກຊີນຂອງ AstraZeneca ຍັງບໍ່ໄດ້ຮັບອະນຸມັດໃຫ້ນຳໃຊ້ໃນອາເມລິກາເທື່ອ ເຊິ່ງຕ່າງກັບ Johnson & Johnson ທີ່ໄດ້ຮັບອະນຸມັດໃຫ້ນຳໃຊ້ສຸກເສີນໃນອາເມລິກາແລ້ວ, ສ່ວນທຳນຽບຂາວຍັງບໍ່ໄດ້ໃຫ້ຄວາມເຫັນໃດໆຕໍ່ກໍລະນີດັ່ງກ່າວ.
ສະຖານະການຫລ້າສຸດທີ່ເກີດຂຶ້ນ ແລະ ຖືກເປີດເຜີຍຄັ້ງທຳອິດໂດຍ The New York Times ຖືເປັນອຸປະສັກຕໍ່ຄວາມພະຍາຍາມຂອງ AstraZeneca ໃນອາເມລິກາ ໂດຍລັດຖະບານອາເມລິກາວິຈານ AstraZeneca ທີ່ໃຊ້ຂໍ້ມູນທີ່ຫລ້າສະໄໝໃນຜົນການທົດລອງວັກຊີນ ເຊິ່ງຕໍ່ມາຜົນການສຶກສາດັ່ງກ່າວກໍຖືກແກ້ໄຂ, ສ່ວນກໍລະນີການປະສົມສ່ວນປະສົມຂອງວັກຊີນສອງຊະນິດເຂົ້ານຳກັນ Johnson & Johnson ລະບຸວ່າ: ວັກຊີນຊຸດທີ່ນຳໃຊ້ບໍ່ໄດ້ນັ້ນຍັງບໍ່ໄດ້ຜະລິດໄປເຖິງຂັ້ນຕອນການບັນຈຸ ແລະ ການສຳເລັດຂະບວນການບັນຈຸວັກຊີນເພື່ອແຈກຢາຍແຕ່ຢ່າງໃດ.
The New York Times ລາຍງານໂດຍອ້າງແຫລ່ງຂ່າວເປັນເຈົ້າໜ້າທີ່ສາທາລະນະສຸກອາວຸໂສໃນລະດັບລັດຖະບານກາງສອງທ່ານ ທີ່ຊີ້ວ່າ: ກໍລະນີທີ່ລັດຖະບານສັ່ງໃຫ້ໂຮງງານດັ່ງກ່າວຜະລິດວັກຊີນຂອງ Johnson & Johnson ພຽງຊະນິດດຽວເປັນໄປເພື່ອປ້ອງກັນບໍ່ໃຫ້ເກີດການປະສົມສ່ວນປະສົມຜິດພາດອີກ. ສື່ດັ່ງກ່າວຍັງລາຍງານອີກວ່າ: ເຈົ້າໜ້າທີ່ລັດຖະບານກາງມີຄວາມກັງວົນວ່າເຫດການດັ່ງກ່າວຈະບັນທອນຄວາມເຊື່ອໝັ້ນຂອງສາທາລະນະຕໍ່ວັກຊີນໂຄວິດ-19.
