ປະທານສູນກາງແນວລາວສ້າງຊາດຄົນໃໝ່ຈະສືບຕໍ່ບຸກທະລຸ 7 ບັນຫາໃຫຍ່ວຽກຈຸດສຸມ

ໃນໂອກາດມອບ-ຮັບຕຳແໜ່ງປະທານສູນກາງແນວລາວສ້າງຊາດຜູ້ເກົ່າ ແລະ ຜູ້ໃໝ່ ໃນວັນທີ 5 ເມສານີ້, ທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ຜູ້ໃໝ່ ໄດ້ໃຫ້ຄຳປະຕິຍານຕົນວ່າ: ຈະສືບຕໍ່ບຸກທະລຸ 7 ບັນຫາໃຫຍ່ທີ່ເປັນວຽກຈຸດສຸມ ຂອງອົງການແນວລາວສ້າງຊາດຄື:

1. ເພີ່ມທະວີຄວາມສາມັກຄີປອງດອງທົ່ວສັງຄົມ ເສີມຂະຫຍາຍບົດບາດຂອງແນວລາວສ້າງຊາດຂຶ້ນຕື່ມ;
2. ສືບຕໍ່ປັບປຸງແບບແຜນວິທີເຮັດວຽກ, ເອົາໃຈໃສ່ຈັດຕັ້ງປະຕິບັດພາລະບົດບາດ, ສິດ ແລະ ໜ້າຂອງແນວລາວສ້າງຊາດ,ເອົາໃຈໃສ່ປະສານງານກັບພາກສ່ວນຕ່າງໆ ທັງສູນກາງ ແລະ ທ້ອງຖິ່ນ ເພື່ອຮ່ວມກັນແກ້ໄຂບັນຫາສັງຄົມ;
3. ເອົາໃຈໃສ່ສຶກສາອົບຮົມ ປຸກລະດົມຂົນຂວາຍກຳລັງແຮງທົ່ວສັງຄົມ ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ;
4. ປັບປຸງກົງຈັກການຈັດຕັ້ງ, ເອົາໃຈໃສ່ວຽກງານກໍ່ສ້າງພັກ-ພະນັກງານ ຕາມທິດຍົກສູງຄຸນນະພາບ, ກະທັດຮັດ ແລະ ສົມເຫດສົມຜົນ;
5. ເພີ່ມທະວີການທູດປະຊາຊົນຕາມແນວທາງການຕ່າງປະເທດ ຂອງພັກ ແລະ ປັບປຸງວິທີການເຄື່ອນໄຫວ ໃຫ້ມີຫຼາຍຮູບຫຼາຍສີ;
6. ເສີມຂະຫຍາຍທ່າແຮງ ແລະ ບົດບາດຂອງໂຄງປະກອບກຳມະການແນວລາວສ້າງຊາດ ເຂົ້າໃນການຊ່ວຍເຫຼືອປະຊາຊົນທີ່ຍັງຫຍຸ້ງຍາກ, ທຸກຍາກ ຕາມເປົ້າໝາຍຂອງລັດຖະບານ ແລະ ອົງການປົກຄອງທ້ອງຖິ່ນ;
7. ສືບຕໍ່ນໍາພາກະກຽມດຳເນີນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ.