ໄບເດັນ ປະກາດເລັ່ງກະຈາຍວັກຊີນຜູ້ໃຫຍ່ໃນອາເມລິກາ ມີສິດສັກໄດ້ນັບແຕ່ 19 ເມສາ ເປັນຕົ້ນໄປ
ອາເມລິກາເລື່ອນເວລາໃນການສັກວັກຊີນໄລຍະຕໍ່ໄປໃຫ້ໄວຂຶ້ນ ຮັບປາກພ້ອມແຈກຢາຍສູ່ປະເທດອື່ນຫລັງຄວບຄຸມສະຖານະການໄດ້ແລ້ວ.
ວັນທີ 6 ເມສາ 2021, ສຳນັກຂ່າວ CNN ລາຍງານຄຳຖະແຫລງຂອງປະທານາທິບໍດີ ໂຈ ໄບເດັນ ທີ່ປະກາດເລື່ອນກຳນົດການສັກວັກຊີນປ້ອງກັນພະຍາດໂຄວິດ-19 ໃຫ້ປະຊາຊົນນອກກຸ່ມສ່ຽງໃຫ້ໄວຂຶ້ນ ມາເປັນ 19 ເມສາ ຈາກທີ່ເຄີຍຕັ້ງໃຈວ່າຈະເລີ່ມສັກໃຫ້ຄົນທົ່ວໄປໄວຜູ້ໃຫຍ່ໃນວັນທີ 1 ພຶດສະພາ.
ປະທານາທິບໍດີ ໄບເດັນ ຍັງເປີດເຜີຍວ່າ: ມີປະຊາຊົນໄດ້ຮັບວັກຊີນໄປແລ້ວ 150 ລ້ານໂດສ ໃນໄລຍະທີ່ທ່ານດຳລົງຕຳແໜ່ງ 75 ມື້ທຳອິດ ແລະ ຫວັງວ່າຈະເຮັດໄດ້ຕາມເປົ້າໝາຍທີ່ວາງໄວ້ ຄື 200 ລ້ານໂດສ ໃນວັນທີ 100 ຫລັງທ່ານຂຶ້ນເປັນປະທານາທິບໍດີ.
ຂໍ້ມູນຈາກ Our World in Data ລະບຸວ່າ: ອາເມລິກາ ເປັນປະເທດທີ່ສັກວັກຊີນໂຄວິດ-19 ຫລາຍທີ່ສຸດໃນໂລກ ຈຳນວນ 167,19 ລ້ານໂດສ ໃນວັນທີ 5 ເມສາ, ອັນດັບ 2 ຄືຈີນ ສັກໄປແລ້ວ 142,8 ລ້ານໂດສ.
ສ່ວນແຜນວຽກສຳລັບການສັກວັກຊີນໃນຂັ້ນຕໍ່ໄປ, ອາເມລິກາ ຕັ້ງເປົ້າວ່າຈະເປີດໃຫ້ 90% ປະຊາຊົນໃນໄວຜູ້ໃຫຍ່ເລີ່ມໄປຮັບວັກຊີນໄດ້ນັບແຕ່ວັນທີ 19 ເມສາ ພ້ອມຂະຫຍາຍສະຖານທີ່ສຳລັບສັກວັກຊີນຈາກ 17.000 ແຫ່ງ ເປັນ 40.000 ແຫ່ງ ເພື່ອຮອງຮັບຕໍ່ຄວາມຕ້ອງການວັກຊີນໃນປະຊາກອນກຸ່ມໃຫຍ່ຂອງປະເທດ.
ພາຍຫລັງຊາວອາເມລິກາໄດ້ຮັບວັກຊີນພຽງພໍແລ້ວ, ປະທານາທິບໍດີ ໄບເດັນ ເນັ້ນວ່າ: ຈະແຈກຢາຍວັກຊີນໃຫ້ປະເທດອື່ນໆຕໍ່ໄປ ເພາະເຖິງວ່າຈະແກ້ໄຂບັນຫາໃນອາເມລິກາໄດ້, ແຕ່ອາດບໍ່ຍຸຕິທຳ ຖ້າບໍ່ໄດ້ແກ້ໄຂໃຫ້ທົ່ວໂລກ ບໍ່ມີກຳແພງ ຫລື ຮົ້ວໃດທີ່ສູງພໍຈະປົກປ້ອງໄພຈາກໄວຣັສໄດ້.
ປັດຈຸບັນ ອາເມລິກາເລີ່ມມີຈຳນວນຜູ້ຕິດເຊື້ອຫລຸດລົງ ກາຍເປັນອິນເດຍທີ່ມີຜູ້ຕິດເຊື້ອແຕ່ລະວັນຫລາຍທີ່ສຸດແທນ ນັບແຕ່ເລີ່ມເຂົ້າສູ່ເດືອນເມສາ ຫລື ຖ້າປຽບທຽບເປັນອັດຕາຕໍ່ປະຊາກອນ, ຝຣັ່ງຖືເປັນປະເທດທີ່ມີຜູ້ຕິດເຊື້ອຫລາຍທີ່ສຸດໃນໄລຍະເກືອບ 2 ເດືອນຜ່ານມາ.
ອ້າງອີງ: https://edition.cnn.com/…/coronavirus…/index.html
