ຈໍານວນຜູ້ເສຍຊີວິດຈາກໂຄວິດ-19 ທົ່ວໂລກສູງເຖິງ 3 ລ້ານຄົນແລ້ວ
ຂໍ້ມູນຈາກຣອຍເຕີລະບຸວ່າ: ໃນວັນທີ 6 ເມສາ 2021 ຈຳນວນຜູ້ເສຍຊີວິດຈາກໂຄວິດ-19 ທົ່ວໂລກສູງເຖິງ 3 ລ້ານຄົນແລ້ວ ໂດຍຜູ້ເສຍຊີວິດກັບມາເພີ່ມຂຶ້ນອີກໃນຫລາຍປະເທດ ໂດຍສະເພາະບຣາຊິລ ແລະ ອິນເດຍ ເຊິ່ງສາເຫດສຳຄັນມາຈາກເຊື້ອໄວຣັສກາຍພັນເພີ່ມຂຶ້ນ. ຂະນະທີ່ຄົນກໍຮູ້ສຶກເມື່ອຍຕໍ່ມາດຕະການລັອກດາວ ແລະ ຂໍ້ຈຳກັດຕ່າງໆ.
ຈາກຂໍ້ມູນຂອງຣອຍເຕີພົບວ່າ: ໃຊ້ເວລາຫລາຍກວ່າ 1 ປີ ທີ່ຈຳນວນຜູ້ເສຍຊີວິດທົ່ວໂລກຈາກໂຄວິດຈະເຖິງລະດັບ 2 ລ້ານຄົນ, ແຕ່ໃຊ້ເວລາພຽງ 3 ເດືອນເທົ່ານັ້ນ ຈຳນວນຜູ້ເສຍຊີວິດກໍເພີ່ມຂຶ້ນອີກ 1 ລ້ານຄົນ.
ຕອນນີ້ ບຣາຊິລເປັນປະເທດທີ່ມີຜູ້ເສຍຊີວິດຈາກໂຄວິດສະເລ່ຍແຕ່ລະວັນສູງທີ່ສຸດໃນໂລກ ໂດຍໃນແຕ່ລະວັນ ທຸກໆ 4 ຄົນທີ່ເສຍຊີວິດຈະມີຄົນໜຶ່ງທີ່ຢູ່ໃນບຣາຊິລ.
ສ່ວນຢູ່ທະວີບເອີຣົບ ເຊິ່ງມີ 51 ປະເທດ ມີຈຳນວນຜູ້ເສຍຊີວິດຈາກໂຄວິດລວມກັນເກືອບ 1 ລ້ານ 1 ແສນຄົນ ເຊິ່ງຈຳນວນຜູ້ເສຍຊີວິດຢູ່ອັງກິດ, ຣັດເຊຍ, ຝຣັ່ງ, ອິຕາລີ ແລະ ເຢຍລະມັນ ລວມກັນຄິດເປັນ 60% ຂອງຜູ້ເສຍຊີວິດໃນເອີຣົບ.
ຂະນະທີ່ອາເມລິກາ ຍັງຄອງແຊ້ມຈຳນວນຜູ້ເສຍຊີວິດຈາກໂຄວິດຫລາຍທີ່ສຸດໃນໂລກ ຫລື ປະມານ 5 ແສນ 5 ໝື່ນ 5 ພັນຄົນ ຄິດເປັນປະມານ 19% ຂອງຜູ້ເສຍຊີວິດຈາກໂຄວິດທົ່ວໂລກ, ແຕ່ເຈົ້າໜ້າທີ່ສາທາລະນະສຸກເຊື່ອວ່າ: ການເລັ່ງສັກວັກຊີນໃນອາເມລິກາຈະຊ່ວຍປ້ອງກັນບໍ່ໃຫ້ຈຳນວນຜູ້ເສຍຊີວິດເພີ່ມຂຶ້ນ.
