ລັດຖະບານຂະຫຍາຍກຸ່ມເປົ້າໝາຍ ທີ່ຈະໄດ້ຮັບວັກຊີນປ້ອງກັນພະຍາດໂຄວິດ-19
ທ່ານ ພອນປະເສິດ ອຸນາພົມ ຫົວໜ້າກົມອະນາໄມ ແລະ ສົ່ງເສີມສຸຂະພາບ ກະຊວງສາ ທາລະນະສຸກ ໄດ້ລາຍງານໃຫ້ຮູ້ ໃນວັນທີ 6 ເມສາ 2021 ນີ້ວ່າ: ມາຮອດປັດຈຸບັນ ສປປ ລາວ ສາມາດສັກຢາວັກຊີນທັງໝົດ 122.491 ຄົນ, ໃນນັ້ນ ສຳເລັດການສັກຄົບສອງຄັ້ງ ມີ 6.171 ຄົນ.
ໃນໄລຍະຜ່ານ ສປປ ລາວ ໄດ້ຮັບວັກຊີນປ້ອງກັນພະຍາດໂຄວິດ-19 ຈາກການຊ່ວຍເຫລືອ ຈາກຕ່າງປະເທດ ທັງໝົດ 3 ຊະນິດຄື: ຊີໂນຟາມ, AstraZeneca ແລະ Sputnik V ເຊິ່ງໃນເບື່ອງຕົ້ນລັດຖະບານໄດ້ເລັ່ງໃສ່ 3 ກຸ່ມເປົ້າໝາຍທີ່ມີຄວາມສ່ຽງສູງຕໍ່ການຕິດເຊື້ອພະຍາດໂຄວິດ-19 ຄື: ພະນັກງານແພດ-ໝໍ, ພະນັກງານທີ່ເຮັດວຽກຢູ່ບັນດາສູນກັກກັນ ແລະ ພະນັກງານທີ່ເຮັດວຽກຢູ່ຕາມຈຸດຜ່ານແດນຕ່າງໆ ມາຮອດປັດຈຸບັນເຫັນວ່າສາມາດສັກວັກຊີນສຳເລັດຕາມເປົ້າໝາຍແລ້ວ.
ນອກຈາກນີ້, ລັດຖະບານ ຍັງໄດ້ຂະຫຍາຍກຸ່ມເປົ້າໝາຍໃຫ້ກວ້າງອອກຕື່ມອີກ 6 ກຸ່ມເປົ້າໝາຍຄື: ພະນັກງານທີ່ເຮັດວຽກກ່ຽວກັບການຂົນສົ່ງ ເປັນຕົ້ນການຂົນສົ່ງທາງບົກ, ທາງອາກາດ ແລະ ທາງນໍ້າ; ພະນັກງານທີ່ເຮັດວຽກກ່ຽວກັບການທ່ຽວທ່ອງເຊັ່ນ: ໂຮງແຮມ, ເຮືອນພັກ; ຜູ້ປະກອບການໃນຕະຫລາດ (ຂາຍຍົກ, ຂາຍຍ່ອຍ), ບັນດາຮ້ານອາຫານ, ຮ້ານຂາຍເຄື່ອງ; ພະນັກງານ ທະນາຄານ; ຄູ-ອາຈານ; ພະນັກງານຂົງເຂດໄຟຟ້າ ແລະ ນໍ້າປະປາຕື່ມອີກ ທັງນີ້ແນໃສ່ຂະຫຍາຍຕາໜ່າງໃນການບໍລິການສັກວັກຊີນໃຫ້ທົ່ວເຖິງ.
ໃນໂອກາດນີ້, ຫົວໜ້າກົມອະນາໄມ ແລະ ສົ່ງເສີມສຸຂະພາບ ໄດ້ເຊີນຊວນ ກຸ່ມຄົນທີ່ຢູ່ໃນກຸ່ມເປົ້າໝາຍດັ່ງກ່າວ ຮີບຮ້ອນເຂົ້າໄປຮັບວັກຊີນປ້ອງກັນພະຍາດໂຄວິດ-19 ຢູ່ຕາມໂຮງໝໍສູນກາງ, ໂຮງໝໍເມືອງ, ໂຮງໝໍແຂວງທີ່ຢູ່ໃກ້ບ້ານ ແນໃສ່ປ້ອງກັນ ແລະ ສະກັດກັ້ນການລະບາດຂອງພະຍາດໂຄວິດ-19 ບໍ່ໃຫ້ເກີດການລະບາດໃນຮອບໃໝ່.
